1Musa anzure Yɛtoro, Midiã sa'ori, yã kɛ̀ Ludaa kɛ̀ Musanɛ kↄ̃n a gbɛ̃ Isarailinↄo mà, lán Dii ń bↄ́ɛ Igipiti nà.
2Àɛ kɛ̀ sↄ̃ Musa gĩakɛ à a naↄ̃ Zipora zĩ̀ bɛ
3kↄ̃n a nɛ́gↄ̃gbɛ̃ mɛ̀n plaaanↄ. À doo tↄ́n Gɛsↄmu, zaakɛ Musa bè gbɛ̃ zĩ̀tↄn a ũ danↄ bùsun.
4À doo tↄ́n Ɛliɛza, zaakɛ Musa bè a de Luda a faaba kɛ̀ à a bↄ Fili'auna fɛ̃ɛdaa lɛ́zĩ.
5Ben Yɛtoro fɛ̀ɛ èe mↄↄ Musa kiia kↄ̃n à nɛ́nↄ kↄ̃n à naↄ̃o guu kɛ̀ à bùra kàɛn Luda kpiii saɛ gbáan.
6À lɛ́kpãsã kɛ̀ Musanɛ à bè: Mɛ́ɛ mↄↄ n kiia kↄ̃n n naↄ̃o kↄ̃n n nɛ́ mɛ̀n plaaanↄo.
7Musa bↄ̀ à gàa à dà a anzurelɛ à kùɛ à lɛ́ pɛ̀ à gasua. Aↄ̃ kↄ̃ aafia gbèka, ben aↄ̃ gɛ̃̀ kpɛ́n.
8Musa yã kɛ̀ Dii kɛ̀ Fili'aunanɛ kↄ̃n Igipitinↄ Isarailinↄ yãnzi tↄ̃kɛ̃̀nɛ píngi kↄ̃n nawɛ̃a kɛ̀ aↄ̃ↄ è zɛ́ guunↄ píngi kↄ̃n lán Dii ń bↄ́ nào.
9Yɛtoro pↄↄ kɛ̀ nna yã maaa kɛ̀ Dii kɛ̀ Isarailinↄnɛa píngi kↄ̃n lán à ń bↄ́ Igipitinↄ ↄzĩ nào.
10Ben à bè: Wà Dii sáabu kpá lán à a bↄ Fili'auna kↄ̃n Igipitinↄ ↄzĩ nà.
11Má dↄ̃̀ sa kɛ̀ Dii bíta dɛ tãanↄla ń píngi. Kɛ̀ Igipitinↄ kya kàagu, à yã mↄ̀ńnɛ.
12Ben Yɛtoro sa'opↄ kɛ̀ wè ká tɛ́n à tɛ́ kũ ò Ludaa kↄ̃n sa'opↄ pãndenↄ dↄ. Ben Aruna kↄ̃n Isaraili gbɛ̃nsinↄ ń píngi mↄ̀ wà pↄ́ blèo Luda aɛ.
13Kɛ̀ guu dↄ̀ Musa vɛ̃̀ɛ èe yã gↄ̃gↄ̃ↄńnɛ, aↄ̃ↄ káɛzi zaa kↄngↄ ai uusiɛ.
14Kɛ̀ Musa anzure yã kɛ̀ èe kɛɛńnɛ è píngi, ben à à là à bè: Bↄ́n nɛ́ɛ kɛɛ kↄ̃n gbɛ̃ kɛ̀nↄ lɛɛ? Bↄ́yãnzi nɛ́ɛ yãkpaɛ kɛɛńnɛ ndo, baade píngi káɛnzi zaa kↄngↄ ai uusiɛ?
15Musa wèàla à bè: Gbɛ̃nↄ è mↄ́ ma kiia aↄ̃ Luda pↄyeziyã mamɛ.
16Tó aↄ̃ yãkete vĩ, aↄ̃è mↄ́ ma kiia mà yã pì gↄ̃gↄ̃ńnɛ mà Luda doka kɛ̀ à dìɛnↄ ońnɛ.
17Musa anzure bènɛ: Yã kɛ̀ nɛ́ɛ kɛɛ maaro.
18Nɛ́ kpasa, gbɛ̃ kɛ̀ aↄ̃ↄ kúnyonↄ é kpasa dↄ, zaakɛ zĩi pì dɛnla, nɛ́ fↄ̃ ǹ kɛ ndoro.
19Ǹ ma yã ma sa, mɛ́ lɛ́ damma, Luda égↄ̃ kúnyo. Nɛ́gↄ̃ dɛńnɛ yãgↄ̃gↄ̃ri ũ, nɛ́gↄ̃ gaa kↄ̃n ń yãnↄ Luda kiia,
20nɛ́gↄ̃ doka kɛ̀ Ludaa dìɛnↄ daańnɛ, nɛ́gↄ̃ zɛ́ kɛ̀ dɛ aↄ̃ sɛ́ ↄdↄↄańnɛ kↄ̃n yã kɛ̀ aↄ̃é kɛɛnↄ.
21Ǹ gbɛ̃ làakaride náanɛdee kɛ̀ aↄ̃ↄ Luda vĩa vĩ ben aↄ̃è ↄdↄnkpɛɛgbaa síroonↄ plɛplɛ ń tɛ́, ǹ ń diɛ gↄ̃ↄn wàa sↄsↄↄroonↄ dↄn'aɛdeenↄ ũ kↄ̃n gↄ̃ↄn basↄsↄↄroo kↄ̃n gↄ̃ↄn baplaa akurio kↄ̃n gↄ̃ↄn kurikurio,
22lɛ aↄ̃gↄ̃ yã gↄ̃gↄ̃ↄ gbɛ̃ pìnↄnɛ gurↄ píngi. Aↄ̃é mↄ́ n kiia kↄ̃n yã zĩ'ũunↄ píngi, mↄde aↄ̃é yã nɛ́ngonↄ gↄ̃gↄ̃ ń zĩnda. Beee bé eé n asoo lagonnɛ.
23Tó Dii wènnɛ, tó ń kɛ̀ lɛ, nɛ́ fuaro, gbɛ̃ pìnↄ é tá bɛ làakario kpaɛna.
24Musa a anzure yã mà à kɛ̀ lán à òare nà píngi.
25À gbɛ̃ làakarideenↄ plɛ̀plɛ Isaraili boriinↄ tɛ́ píngi à ń díɛ gↄ̃ↄn wàa sↄsↄↄroonↄ dↄn'aɛdeenↄ ũ kↄ̃n gↄ̃ↄn basↄsↄↄroo kↄ̃n gↄ̃ↄn baplaa akurio kↄ̃n gↄ̃ↄn kurikurio.
26Ben aↄ̃ègↄ̃ yã gↄ̃gↄ̃ↄńnɛ gurↄ píngi. Yã zĩ'ũun aↄ̃è mↄ́o Musa kiia, ben aↄ̃è yã nɛ́ngonↄ gↄ̃gↄ̃ ń zĩnda.
27Musa gàa à zɛ̀ a anzurenɛ, ben à tà a bùsun.
