Kisim Bek 18

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹Jetro em i pris bilong Midian na i tambu papa bilong Moses. Em i harim stori bilong olgeta samting God i mekim long Moses wantaim ol Israel. Na tu em i harim tok long olkain pasin Bikpela i bin mekim bilong bringim ol manmeri bilong en, ol Israel, i lusim Isip na i kam.

²Olsem na Jetro i kam lukim Moses. Bipo Moses i salim meri bilong en Sipora i go bek long papa bilong en. Na nau Jetro i bringim Sipora

³wantaim tupela pikinini man bilong Moses na ol i kam kamap. Nem bilong tupela pikinini i olsem, Gersom na Elieser. Moses i bin tok, “Mi man bilong narapela hap na mi stap long narapela kantri.” Olsem na em i kolim nem bilong namba wan pikinini man olsem, Gersom.

⁴Na bihain em i tok olsem, “God bilong papa i bin helpim mi na king bilong Isip i no bin kilim mi i dai.” Olsem na em i kolim namba 2 pikinini man bilong en, Elieser.

⁵Orait Jetro wantaim meri bilong Moses na tupela pikinini man bilong en, ol i kam kamap long ples drai klostu long maunten bilong God, em ples Moses i bin wokim kem na i stap long en.

⁶Na Jetro i salim tok long Moses olsem, “Mi Jetro, tambu bilong yu, wantaim meri na tupela pikinini man bilong yu, mipela i kam nau.”

⁷Moses i harim dispela tok na em i go bungim Jetro long rot. Na Moses i daunim het na bihain em i kis long em. Tupela i toktok long sindaun bilong tupela na bihain ol i go insait long haus sel bilong Moses.

⁸Na Moses i tokim Jetro long olgeta samting Bikpela i bin mekim long king bilong Isip na long ol manmeri bilong Isip, bilong helpim ol Israel. Na em i tokim Jetro long taim nogut na hevi i bin kamap long ol long rot, na long Bikpela i bin helpim ol na ol i stap gut.

⁹Jetro i harim dispela tok long ol gutpela samting Bikpela i bin mekim bilong kisim bek ol Israel long han bilong ol Isip, na em i amamas tru.

¹⁰Na em i tok, “Litimapim nem bilong Bikpela. Em i bin kisim bek yupela long han bilong king bilong Isip na long han bilong ol manmeri bilong en na yupela i lusim dispela wok kalabus nogut.

¹¹Nau mi save, Bikpela i winim olgeta arapela god, long wanem, em i bin lukautim yupela taim ol Isip i bikhet na mekim nogut long yupela.”

¹²Orait Jetro i bringim wanpela ofa bilong paia i kukim olgeta na i givim long God. Na em i mekim ol arapela ofa tu long God. Na Aron wantaim olgeta bikman bilong Israel i kam na i kaikai wantaim tambu bilong Moses long ai bilong God.

¹³Long de bihain, Moses i sindaun na harim kot bilong ol manmeri bilong Israel. Na planti manmeri i kam long Moses long moningtaim i go inap long apinun tru.

¹⁴Jetro i lukim ol dispela samting Moses i mekim bilong helpim ol manmeri, na em i tokim Moses olsem, “Olaman. Yu mekim planti tumas wok bilong helpim ol manmeri. Bilong wanem yu wanpela tasol i mekim dispela wok? Lukim olgeta manmeri i kam long moningtaim bilong toktok wantaim yu, na ol i sanap na wet i stap inap long apinun. Bilong wanem yu mekim olsem?”

¹⁵Na Moses i tokim em, “Ol manmeri i laik save long ol samting God i laik bai ol i mekim. Olsem na ol i kam long mi.

¹⁶Taim tupela man i gat kros long wanpela samting, tupela i save kam long mi na mi save skelim tok bilong tupela na mekim tok i dai. Na mi save skulim ol long olgeta lo bilong God.”

¹⁷Na Jetro i tokim em olsem, “Moses, yu no bihainim gutpela rot bilong mekim dispela wok.

¹⁸Dispela wok i bikpela tumas. Yu wanpela tasol i no inap mekim. Sapos yu yet i mekim, bai skin bilong yu i les nogut na bai ol manmeri tu i les.

¹⁹Harim tok bilong mi nau. Mi laik tokim yu long wanpela gutpela rot bilong mekim wok bilong yu. Sapos yu harim, God bai i stap wantaim yu. Ating i gutpela sapos yu stap olsem man bilong bringim tok bilong ol manmeri i go long God. Yu mas bringim tok pait bilong ol i go long em.

²⁰Na yu mas skulim ol long olgeta lo bilong God na tokim ol long rot ol i mas bihainim na pasin ol i mas mekim oltaim.

²¹Na tu, yu ken makim ol gutpela saveman bai ol i stap lida bilong ol manmeri. Sampela i mas bosim 1,000 manmeri na sampela i mas bosim 100 na sampela 50 na sampela 10-pela tasol. Yu mas makim ol man i save stap aninit long God, em ol man yumi inap bilip long ol na i no inap ol man i givim mani long ol bilong pulim ol long mekim pasin i no stret.

²²Bai ol dispela man i ken kamap jas bilong ol manmeri. Ol yet i ken stretim ol liklik trabel long kot. Tasol ol bikpela trabel ol i ken bringim long yu bilong stretim. Olsem na bai ol i ken helpim yu long karim hevi bilong dispela wok na bai wok bilong yu i no hat tumas.

²³Ol dispela samting mi tokim yu long mekim, God yet i laik yu mekim. Na sapos yu bihainim tok bilong mi, orait bai dispela wok i no inap mekim skin bilong yu i les. Na yupela i ken stretim trabel na tok bilong ol manmeri na ol i ken i stap bel isi na i go bek long ples bilong ol.”

²⁴Orait Moses i harim dispela gutpela tok bilong Jetro na i mekim olsem.

²⁵Em i makim ol gutpela saveman namel long ol Israel na putim ol i stap lida bilong 1,000 manmeri na 100 na 50 na 10-pela.

²⁶Na oltaim ol i bosim wok bilong kot. Ol yet i save stretim ol liklik trabel na hevi, tasol ol i bringim ol bikpela trabel i go long Moses na em yet i stretim.

²⁷Bihain long dispela, Moses i sekan long tambu bilong en, na Jetro i go bek long kantri bilong em yet.