2 Kɔdɛnti 7

1

2

3

4

5

6

7

8

9

10

11

12

13

¹N kɔbɛ Kuyie nti dɔúnnɛ̀ yɛ̀ɛ̀ nɔ̀ kó dimɑ̀ɑ̀ tú yɛsɑ̀ɑ̀yɛ̀ nyɛ, yóunɛ̀ kɛ̀ ti mɛntɛ́nɛ̀ timɑ́ɑ̀ dɛ̀ɛ̀ sĩ̀nkùnko tikɔ̃̀ntì nɛ̀ mɛyɛ̀mmɛ̀, kɛ́yetoo kɛ́ndò mpɑ́í pɑ́í kɛ́ndé Kuyie.

²N duɔ́nnɛ̀ di yɛ̀mmɛ̀ mɛmɔu, n yí cɑ̀ɑ̀rɛ̀ òmɔù dɛ̀mɑrɛ̀, n yí tɑnnɛ́ òmɔù tidɑwɑntì miɛkɛ, n yí ciitɛ́ òmɔù kɛ di o kpɛrɛ.

³Dɛ̀ í tú m bɛ́i mɛmmɛ kɛ di kpɑnnɛ̀, n di nɑ̀kɛ́mu kɛ̀ n tú n di duɔ́ n yɛ̀mmɛ̀ mɛmɔu kɛ ti wɛ̃nnɛ́, kɛ yó nwɛ̃ mmufòmmu miɛkɛ nɛ̀ mukṹṹ mmiɛkoo.

⁴N di tɑ̃́ mɛdiɛ̀ mmɛ kɛ̀ n yɛ̀mmɛ̀ di nɑɑtinɛ̀, kɛ̀ m mɔ̀kɛ dikɔ̃m̀bùɔ̀ kɛ̀ diwɛ̀ì m bo mɛsɑ̀ɑ̀ ndi kpɛ́í bɑ́ nɛ̀ ti mɛ nfɛ̃́ũ̀rìmɛ̀.

⁵N tùɔ̀kɛ dìì mɔ̀nnì Mɑseduɔnni kɛ mɑ́ɑ́nɛ̀ mɛhɑ́ɑ́rìmɛ̀ tipíìtì timɔu, n yí nnɑ kɛ om̀pɛ̀, kɛ́nhɑrìnɛ̀ biɛ nkɛ yĩɛ̃̀kù bɛtɔbɛ̀.

⁶Kuyie nkùù ɔ̃ɔ̃ bɑ́ntɛ̀ wèè yɛ̀mmɛ̀ cɑ̀ɑ̀rɛ̀, kɛ̀ kù m bɑ́ntɛ̀ kɛ̀ Titii tuɔkɛní.

⁷Dɛ̀ í tú dɛ̀ n nɑrikɛ ò tùɔ̀kɛnímɛ̀ mɑ́ɑ̀ kpɛ́í, nɛ̀ di sòò nɑ́ríkùnnɛ mɛ̀ɛ̀ botí o yɛ̀mmɛ̀ ò n nɑ̀kɛ́mu di dɔ́mɛ̀ kɛ́ n yɑ̀ nɛ̀ di yɛ̀mmɛ̀ sòò cɑ̀ɑ̀rɛ̀mɛ̀ nɛ̀ di mɔkɛ tìì kɔ̃nyɑuti n kpɛ́í dɛɛ̀ te kɛ̀ diwɛ̀ì dɔ̀kɛ m pĩ.

⁸N sòò di wɑ̃̀ri dipɑ́tíri kɛ́cɑɑ̀rɛ̀ di yɛ̀mmɛ̀ n yí dèmmu, bɑ́ kɛ̀ ǹ dèmmu dɛ kó idebìi í ɔɔtɛ, kɛ yɛ̃́ di yɛ̀mmɛ̀ cɑ̀ɑ̀rɛ̀mɛ̀ dimɔ̀nnì sɑ́m̀pɔ́ nwe.

⁹Dɛ̀ n nɑɑtimu di m̀mɔ̀nnì n di wɑ̃̀rimɛ̀ dɛ kó dipɑ́tíri dɛ̀ nɛ́ í tú n yɛ̃ ndi yɛ̀mmɛ̀ cɑ̀ɑ̀rɛ̀ mɛ̀ɛ̀ kpɛ́í, dɛ kó mɛyɛǹcɑɑ̀rìmɛ̀ di tee mmɛ̀ɛ̀ kpɛ́í nkɛ kɛ̀ di cèètɛ kɛ tũ̀nnɛ Kuyie nkù dɔ́ ku kɔbɛ mmɔkɛ mɛɛ̀ yɛǹcɑɑ̀rìmɛ̀ botí. N tũ n yí di cɑ̀ɑ̀rɛ̀ dɛ̀mɑrɛ̀.

¹⁰Mɛyɛǹcɑɑ̀rìmɛ̀ mɛ̀ɛ̀ tu Kuyie nkɔ̃mɛ mɛ̀ teénnɛ̀ onìtì nwe koò cèèri. Dɛ kó mɛyɛǹcɑɑ̀rìmɛ̀ botí bɛ̀ ɔ̃ɔ̃ í ǹdèmmu mɛ kpɛ́í. Kutenkù kuù nkó mɛyɛǹcɑɑ̀rìmɛ̀ í ceeri onìtì mɛ̀ ò kɔ̀ùmu.

¹¹Wéntɛ́nɛ̀ kɛ́yɑ̀ dɛ kó mɛyɛǹcɑɑ̀rìmɛ̀ miɛkɛ Kuyie mpĩ mmùù tɔ̃mmú, kɛ̀ dɛ̀ di yonkɛ, kɛ̀ di kɔ̃m̀bùɔ̀tìi do, kɛ̀ dí ndɔ́ kɛ́ n yɑ̀, kɛ́ítɛ́ kɛ́cómmú kɛ́dɛitɛ wèè dɔ̀ɔ̀ mɛyɛi, kɛ bɛnkɛ kɛ dò ndi í ò kòḿmú.

¹²N sòò í di wɑ̃̀ri dipɑ́tíri wèè dɔ̀ɔ̀ mɛyɛi nhò kpɛ́í nyoo ò cɑ̀ɑ̀rɛ̀ wè kpɛ́í. N di wɑ̃̀ri kɛ di bo dɔ̀ɔ̀ kɛ̀ dɛ̀ɛ bɛnkɛ di ti dɔ́mɛ̀ mmɛ.

¹³Di dɔ̀ɔ̀ kɛ̀ dɛ̀ n nɑrikɛmu, kɛ yìɛ́ kɛ n nɑrikɛ di sòò cɔutɛ́mɛ̀ Titi kɛ́nɑ́ríkùnnɛ o yɛ̀mmɛ̀.

¹⁴N sòò di sɑ̃ntɛmu Titi borɛ̀ kɛ sɔ̃́ nhò mu nyí kɔ̀too, kòò kɔ̀too kɛ sɔ̃́ ndɛ̀ mɛ̀nkɛ mɛ ndò. Nh ɔ̃ ndi nɑ́ɑ́ mɔ́mmuɔ nwe, kɛ́ndonnɛ̀ n sòò sɑ̃ntɛmɛ̀ Titi di borɛ̀ kɛ̀ di mɛ̀nkɛ dɛ nyɑ̀.

¹⁵Ò di dɔ́ mɛdiɛ̀ mmɛ, kɛ í yĩɛ̃ ndi sòò ò cɔutɛ́mɛ̀ kɛ́yie nho tié nkɛ́ nhò dé mɛdiɛ̀.

¹⁶N yɛ̀mmɛ̀ di nɑɑtinɛ̀mu, n yí di yĩɛ̃̀kù tìmɑtì miɛkɛ.