2 Kɔdɛnti 10

1

2

3

4

5

6

7

8

9

10

11

12

13

¹Mí Pɔɔri míì dɔ́ kɛ́ di bɛ́innɛ̀. Mí nwèè yɔ̀ɔ̀ nKirisi n dɔ̀ɔ̀ mɛ̀ɛ̀ sɑ̀ɑ̀ nkpɛ́í, kɛ́ndònnɛ̀ di miɛkɛ bɛ̀mɑbɛ̀ tumɛ̀ nh ɔ̃ nyɔɔ̀ n di bonɛ̀ dìì mɔ̀nnì kɛ́dɛ́tɛ́ kɛ́kpenkɛ.

²Bɑ́ɑ́ duɔ́nnɛ̀ kɛ̀ n kɔtoo dìì yiè di ciɛ kɛ̀ n nɑ́ɑǹtì ńkpeńnì, n yí yó nnɑ́ɑ́nnɛ̀ bɛ̀ɛ̀ yɛ̀mmɛ̀ dò n dɔɔri nɛ̀ onìtì kó mɛciì nkɛ yĩɛ̃̀kù.

³Ti tú bɛnìtìbɛ̀ mbɛ, ti nɛ́ í mɑù nɛ̀ onìtì kó mɛciì.

⁴Ti kó tikpɑ̀rìnɛntì í tú kutenkù kuù nkpɛti, ti tú Kuyie nkpɛti nti kɛ kpeńnì, kɛ bo nɑ kɛ́pɔntɛ sicɛ̃kperí.

⁵Ti ti nkɔùnɛ̀ mɛyɑ́ɑ̀bìsíyɛ̀mmɛ̀ nɛ̀ sifeí kɔ̃mɛ, dɛ̀ɛ̀ ti dítìnko Kuyie mbíɛ́kɛ̀. Ti ti mpĩĩnnɛ̀ mɛnitiyɛ̀mmɛ̀ kɛ mɛ niù Kirisi borɛ̀, kɛ̀ mɛ̀ yìé nho kpɛti.

⁶Kɛ̀ di yie ndìì mɔ̀nnì ti kpɛti ti bo kpetínnɛ́ bɛ̀ɛ̀ yetírí Kuyie nkpɛti.

⁷Bɛ̀ wèí dɛ̀ɛ̀ wenni dɛ̀ndɛ fɛnɔ̀nfɛ̀. Kòò mɔù yɛ̀mmɛ̀ dò nhò tu Kirisi kou, wè nyɛ̃́ kɛ dò nti múnkɛ bɛ ntú.

⁸Di yɛ̀mmɛ̀ dò m pɔtì Kuyie nni niímmɛ̀ kpɛ́í nkɛ. N do dòmmu kɛ́mpɔtì kɛ̀ dɛ̀ɛ pɛ̃ɛ̃tɛ́ mɛmmɛ bɑ́ ifɛi bɑ́ nni mbo, kɛ yɛ̃́ Kuyie kuù n niímmɛ̀ kɛ̀ m bo pĩ́ mmutɔ̃mmú kɛ di kpénkùnnɛ, dɛ̀ í tú n yóó di bɔ.

⁹N yí di wɑ̃ũ yɛpɑ́tɛ kɛ̀ bo donnɛ́ di kɔ̃m̀bùɔ̀tì.

¹⁰Bɛ̀mɑbɛ̀ nɑ̀ɑ́ nkɛ tú: M pɑ́tɛ nɑ́ɑǹtì ɔ̃ nkpeńnì kɛ yóù, kɛ̀ n nɛ́ kɔ̀too nni ncĩ̀ĩ̀nnì kɛ nɑ́ɑ́ nkɛ kɔɔ́ nkɔɔ́ nkɛ̀ dɛ̀ dò mmɛsémmɛ̀ kpɛrɛ.

¹¹Wèè nɑ̀ɑ́ mmɛmmɛ wè nyɛ̃́ kɛ dò n di wɑ̃ũ tì nɛ̀ nh ɔ̃ɔ̃ kɔtoo kɛ́nnɑ́ɑ́ ntì dɛ̀ í cɑ̃́ɑ̃́.

¹²M bɑ́ɑ́ nɑ kɛ́mbeúnɛ̀ m mɑ́ɑ̀ bɛ̀ɛ̀ yɛ̀mmɛ̀ dò mbɛ̀ dɛu. Bɛ̀ tu tiyɛìntì nti kɛ ɛrìnɛ̀ bɛmɑ́ɑ̀ bɛtɔbɛ̀.

¹³M bɑ́ɑ́ nɑ kɛ́nsɑ̃ntí m mɑ́ɑ̀ kɛ̀ dɛ̀ɛ pɛ̃ɛ̃tɛ́ Kuyie nni mbennɛ́ nɛ̀ dɛ̀, n yó nsɑ̃ntí m mɑ́ɑ̀ Kuyie nni mbennɛ́nɛ̀ dɛ̀ ndɛ. Dɛ̀ɛ̀ tú m bo kɔtoomɛ̀ di ciɛ.

¹⁴N nɑ nyĩ n dɔ̀ɔ̀ n do í dò nkɛ́dɔɔ̀ dɛ̀ ndɛ kɛ̀ n do í kɔ̀too di ciɛ, míì mɛ nkɔ̀too di ciɛ kɛ di nɑ̀kɛ́ Kirisi kó Tinɑ́ɑǹsɑ̀ɑ̀tì.

¹⁵Ti í dɔ́ kɛ́mpɔtìnɛ̀ bɛtɔbɛ̀ pĩ mmùù tɔ̃mmú. Ti dɔ́ di tɑ̃́kùmɛ̀ mɛɛ̀ kpenkɛ, kɛ̀ n tɔ̃mmúu yíɛ́ kɛ́dɛukɛ di cuokɛ̀, mù nɛ́ bɑ́ɑ́ pɛ̃ɛ̃tɛ́ Kuyie nyɛ̃ mmù ḿberínɛ̀ dɛ̀.

¹⁶Dɛ kó difɔ̃nkúò m bo nɑ kɛ́nɑ́kɛ́ Tinɑ́ɑǹsɑ̀ɑ̀tì yɛhɛkɛ̀ tɛyɛ̀ òmɔù mu nyí nɑ̀kɛ́ yɛ̀, n yí dɔ́ n sɔɔtɛ́ òmɔù pĩ ndɛ̀ mutɔ̃mmú.

¹⁷Wèè dɔ́ kɛ́mpɔtì wè mpɔtì nɛ̀ Kuyie nhò dɛɛtɛ́mɛ̀.

¹⁸Kuyie nsɑ̃ntí wè weè tu onìtì dɛ̀ í tú wèè sɑ̃ntí omɑ́ɑ̀.