Epístola 2 a los Corintios 7

1

2

3

4

5

6

7

8

9

10

11

12

13

¹Nuna aatus anagtabau asamtai aneetaig yatsug aidauh, ubag aidauh, shiig kuitamamsa pujaku iina iyashin, wakannumash pegkegchau etamaina duka ashí idaisa pujumainaitji. Apajuí ajantusa diinaku, ni pegkegma ibauk atasa kakanmamainaitji.

²Dekaskenum anejattsa dijattsatajum, wagki makichik aentskesh pegkegchauk takagsachmayag nuaduí. Jutiik atumin pegkegchau etamainuk jintintuachuitjime. Makichik aentsú wajiiji atankitasaikish wainkaik tsanugchabiaji.

³Wika junak atumek nunin ainagme tusan augmatkun tatsujime. Yaunchuk tibaijim nunisnuk, wika atumnak aneajime ijuntsan pujustasan, jaaknush atumjaig jakatasan wakegajai.

⁴Dekaskenmag ii anentaibaujiya duka uusá tutsuk ashí ujakbaijime. Atumin anentaimtaknuk ememasan anentaimjai. Waitiaknush atumiin anentaimkun shiig aneasan dakunkut pujajai.

⁵Macedonia taawabiag duwi nagkamsa waitiag nunisaik yamaikish ayamsaik batsattsuji. Ashí yantamnum utugchatak igkuibiaji, tikich aidau jutii etsegbaunak dakituidau asag pampanjamainakui ishamkagtaku.

⁶Tujash Apajuí aents waituidaun anentain ichichtina nunú, Titun awetugma jutiinash anentain ichichtamjabi.

⁷Tujash imá ni taa duwikik nunikchamjai, ni atumin waipak ichichmamjau asa, atum jutii waijatkatasa wakegamun, nuigtú wi waitiamu antukjum kuashat wake besemag batsatkujum, uyumatjuinajum nuna ujatkamtai antukan, nuní nagkaemasan shiig aneasmajai.

⁸Tuja wi papí agaja awemamu ausajum, imá senchi wake besemag anentaimsamugmin ujatkamtai antukan, wishakam kuashat wake besemag dekapjabiajai. Nuniknush nunakek anentaimtuk pujatsjai. Dekas awemamainchauna awemayag tusankesh anentaimtatsjai.

⁹Yamaik shiig aneajai, tujash atum wake besemag batsamsaujum duwi nuniatsjai. Atum wake besemag batsatkujum Apajuiyai ataktú wakitkiujum duwi. Duka Apajuí dutijamkui nunikugme, nuaduí atumin pegkegchau awagmamaina duka dutikashjiapi taji.

¹⁰Apajuí wake besemag anentaimtijama nunak, iina pujutin yapajia uwemjati tusa dutijamui, nuniau asamtai nu anentaimtaku waitú pujumainuk atsawai. Untsu Apajuí nemagchau aidau wake besemag dekapenayatak pujutjin yapajinashkug, Apajuijai tuke kanaak kanamain ainawai.

¹¹Atumek wake besemag pujakjumesh Apajuí wakega dutiksagmek katsunjaugme. ¡Nunú yamai diistajum wají ajutjamsaje! Nunak atumiin utugchat awa nuna shiig dekamtijamak, minashkam ayamjutkatatus dutijamawaje. Kajeamush, nuigtushkam ishamamush ajutjamsaje, nunikjum mina waitkatasajum wakekaugme, nunikjum ya pegkegchaun takaawa dusha suwimak susaugme. Nu dutikaujum duwi iwainmamkaugme, atumesh dekas nunú pegkegchau dakituinajum duka.

¹²Wi papiin agagmayag nunak imá aents pegkegchaun takasua nuna yaigtasanuk agagchabiajai. Nuniachkunush pegkegchaun takasua nuna apajin yaigtasankesh agagchabiajai. Ayatak atum jutii puyatjusjum antugkagtajum nuna iwaintuktasan agatjamjime.

¹³Ashí nu atumin nagkaetamkiuwa duka jutiinak ichichtamjauwai. Tujash nunú ichichmamjamua nuní nagkaemas shiig aneasmaji. Tito shiig dakujus pujau wainku, duka ashí atum aidautigmeap dakujutak egketuaugme taji.

¹⁴Wi atumin ememattsan anentaimtamun Titunash ujakmajai. Nuna tija nunak pegkegchauk juwakchajai. Ii ashí dekaskea nu pachisa atum ememattsa tibaijim nunisag Titushkam waipakaje.

¹⁵Nigka atumnak senchi anempajume, ni atumin segapakuish betek umijujakbau asa. Nuigtushkam eme anentsá jukimu asa.

¹⁶Wika atumiin shiig kajinmamsan pujag duwi shiig aneajai.