1Âgo bureŋ, wiac iŋucnere biŋe qanârekicnere wiac mamakâcnezi maŋ sahac‐nâŋec hegâpâreekac i ʒure ɋaɋackenʒepeneŋ. Erâ Anutu araŋ bacnehuc maŋɋaɋac jaha junʒepeneŋ.
2Ŋoŋe maŋŋeŋic mi sakare‐nârenʒepieŋ. Nâŋe ŋoŋerao wiac hehesic mi embeŋ, me wiac‐ŋeŋic ima mi qambeŋ, me wiac‐ŋeŋic moc kâŋgâc mi rombeŋ.
3No dâŋ i musâqorec‐ŋopahuc mi mukopac. No miŋecne mac ŋazapac, maŋnâŋeczi ʒâfic‐ŋopaŋgopeneŋ, i ŋoŋehec mâmâc hâmonaŋte me junaŋte.
4Maŋnanezi ŋoŋerao siŋkeha wemo afecne muafec‐ŋopakopac, no bunane boc bâmiriŋkekicne, ʒâic busâqocko ʒeri kâcɋene fua‐narekac.
5Makedonia mâreŋko ware fisirâ wemocko âke uruerâ junʒapeŋ. Ʒira sahacte biŋe ʒika â maŋte biŋe hâhâwic, wiac izi fuarâ sisi hâhâŋ enâreha jumbeŋ.
6Bebekâne bâmiriŋ‐jopaekac Anutu eki hâcne ine nâŋere bâbâmiriŋte Tito ecneme risiewec.
7Erâ risiewec irec sawa mâcne, ŋoŋe bubiaŋ dâŋ âzâcnembiŋ, i bafisime manarâ bunâŋec uruewec. Erâ no woricnuhuc jueŋgopieŋ â ki busâqochec jueŋgopieŋ â nore erâ gie‐ŋeŋic dopeckehuc ʒoɋac eeŋgopieŋ, i nâzâme bubiaŋ fekicne manapo.
8No mârâc papia moc qâreŋke‐ŋarehuc maŋʒâic bâfua‐ŋarepo, irec bunane mi sâqorekac. Qâreŋkepo ira jâmbomac bunane sâqorewec. Ʒi ine manakopac, i dameŋ bembeŋne sawa maŋʒâic bâfua‐ŋarewec.
9Eme ʒi bubiaŋ manakopac, ine buʒâic manambiŋ irec mâcne, buʒâiczi ŋoŋerao maŋ bâbârisie bâfuawec, irec bunane biaŋkekac. Anutu mamana‐ticnere sâcko buʒâic ɋaɋacne manambiŋte dâŋnâŋeczi mi bâsâqorec‐ŋopawec.
10Buʒâic ɋaɋacne izi maŋ bâbârisie bâfuame ŋiczi biaŋkezo, eme buʒâic iŋucne bâfuaocmuzi ʒâhec irec mi maname sâqoreocmu. Â buʒâic gâpâcne, ŋic mamanare sâcko fuaekac, izi ine maŋmutuc bâfuame sipirickezo.
11Honeniŋ me, buʒâic ɋaɋacnezi ŋoŋerao fârine wemo afecne bâfuawec: Fâro, fuŋne babataniŋ, sâqocne bâbâsue, hâhâwic, mu hejâpec, ʒoɋac, bâbâtiŋ, wiac iŋuc hâcne bâfuawec. Eme sâqocnere hehesoŋ â ŋeŋezic ŋoŋerao mi fokac, irec fuŋne taniŋkewec.
12Mârâc papia qâreŋke‐ŋarepo, i ŋic sâqocne bawec ere erâ mâcne, me sâqocne bajarewec jaŋere erâ wâc mâcne, dâŋ ŋazapene Anuture maio micrereŋ‐ŋeŋicte fuŋne taniŋkeocte irec qâreŋke‐ŋarepo. Eme ŋoŋe iŋuc hâcne ehuc bunâŋec bâmiriŋkembiŋ.
13Erâ bunâŋec bâmiriŋkembiŋ sawa mâcne, ŋoŋe Tito bubiaŋ qacnepie risieme nâŋe wemo afecne mana biaŋ embeŋ.
14No mârâc jaha muafec‐ŋopahuc Tito âzâcnepo, dâŋ i burec mi ewec. Ŋoŋe dâŋ ŋazape fârinehec efârewec, iŋuc jaha Tito ŋoŋere mumumbiaŋ dâŋ âzâcnepo i wâc fârinehec jaha ewec.
15Tito ŋoŋerao fâme araŋ bacnehuc micne reŋkembiŋ, e irec manasuhuc maŋne ŋoŋere boc ecneekac.
16No ŋoŋere erâ maŋbahac tâmiric sâcne jupemu, irec bunane biaŋkekac.
