1Yinni Gusunɔn mɔru bɑkɑ yɑ seewɑ. Mɑ yɑ Yerusɑlɛmu wukiri nɡe ɡuru wii bɑkɑru. Yen bɛɛrɛ ye yɑ rɑɑ ɡirɑri sere ɡuru winɔ, u ye kɑrɑ u kɔ̃ temɔ. Win mɔru yen sɑɑ sɔɔ, u ǹ yɑɑye mɑ Yerusɑlɛmu yɑ sɑ̃ɑ win nɑɑ sɔnditiɑ.
2U Isirelibɑn wɑ̃ɑ yenu kɑ ben wusun ɡbɑ̃rɑnu kpuro sururɑ kɑ mɔru wɔnwɔndu sɑri. Ni wee nu wɔrukɑ temɔ. U ben bɑndu kɑ ten wiruɡibun dɑm buɑ.
3U Isirelibɑn dɑm kpuro buɑ win mɔru bɑkɑn sɔ̃. U tii bɔkuɑ sɑnɑm mɛ yibɛrɛbɑ bɑ bu wɔrim nɑ. Mɑ u Isireli be dɔ̃ɔ kɑre, mɑ dɔ̃ɔ wi, u bu di beri berikɑ.
4U bu win tɛndu ɡɑwe kɑ win nɔm ɡeu. Mɑ u bu yĩisi nɡe yibɛrɛ, u kpuro ɡo ye yɑ ɡeɑ sɑ̃ɑ ben nɔni sɔɔ. U derɑ win mɔru yɑburɑ nɡe dɔ̃ɔ ben wɑ̃ɑ yenɔ Yerusɑlɛmuɔ.
5Yinni Gusunɔ u Isirelibɑ wɔri nɡe yibɛrɛ. U bu mwɑ nɡe dɔ̃ɔ u ben dii ɡeenu di. U ben ɡbɑ̃rɑnu kɔsukɑ, mɑ u derɑ wuri yi nɔɔrɑmɔ bɑɑmɑ ben suunu sɔɔ.
6U win sɑ̃ɑ yeru kɔsukɑ. U derɑ bɑ ku rɑ mɑɑ sɑ̃ɑrun tɔ̃ɔ bɑkɑnu kɑ tɔ̃ɔ wɛ̃rɑruɡiru di. Win mɔru seewɑ kɑ dɑm. Mɑ u sinɑ boko kɑ yɑ̃ku kowobu yinɑ.
7U win sɑ̃ɑ yeru mi bɑ rɑ nùn yɑ̃kuru kue biru kisi. U yibɛrɛbɑ Yerusɑlɛmun dii ɡeenu nɔmu bɛriɑ. Mɑ wɔkinu nɔɔrɑ win sɑ̃ɑ yeru mi, nɡe tɔ̃ɔ bɑkɑnun sɑɑ.
8Yinni Gusunɔ u ɡɔ̃ru doke u Yerusɑlɛmun ɡbɑ̃rɑnu kɔsuku. Wee u nu kɔsukɑ kpuro mɑm mɑm. Yɑ kuɑ wɔnwɔndu bɑɑmɑ kpuro. Gbɑ̃rɑnu yiru ye kpuro yɑ kuɑ bɑnsu.
9Yen kɔnnɔsu su numɑ temɔ. Sin dɑ̃ɑ ye bɑ rɑ kɑ su sɛ̃suku yɑ bɔɔkirɑ. Mɑ bɑ yen sinɑ boko kɑ yen wiruɡibu ɡurɑ bɑ kɑ dɑ tem tukumɔ. Woodɑ mɑɑ sɑri. Bɑɑ Gusunɔn sɔmɔbu bɑ ǹ mɑɑ kɑ̃sinu wɑɑmɔ win min di.
10Wee, yen ɡuro ɡurobu bɑ sɔ̃ temɔ bɑ nɔsu mɑɑri. Bɑ tii torom wisi winɔ, bɑ sɑɑki deewɑ nuku sɑnkirɑnun sɔ̃. Mɑ yen wɔndiɑbɑ bɑ sɔ̃ bɑ tuke.
11Nɛn nɔni yɑndɑmɔ wurin sɔ̃. Nɛn wɑsi ɡbisimɔ mɑ nɛn tororɑ kɑre. Domi nɛn tɔmbɑ kɑm kuɑ. Wee, bii wɛ̃ɛnu kɑ bibu bɑ wɑ̃ɑ Yerusɑlɛmun swɛɛ sɔɔ, bɑ ǹ mɑɑ dɑm mɔ.
12Bɑ ben mɛrobu sɔ̃ɔmɔ bɑ mɔ̀, mɑnɑ sɑ ko dĩɑnu wɑ. Mɑ bɑ wɔrukumɔ swɛɛ sɔɔ nɡe be bɑ mɛɛrɑ kuɑ. Gɑbɑ ɡbisukumɔ ben mɛron tororu wɔllɔ.
13Yerusɑlɛmu, mbɑ kon nun sɔ̃. Mbɑ kon kɑ nun weesinɑ. Wɑrɑ u mɑɑ nɔni sɔ̃ɔre nɡe wunɛ, n kɑ kpĩ n nun nukuru yɛmiɑsiɑ. Domi wunɛn nɔni swɑ̃ɑrɑ kpɑ̃ nɡe nim wɔ̃kun nim. Goo sɑri wi u koo kpĩ u tu kpeesiɑ.
14Wunɛn sɔmɔbu bɑ nun ɡɑri weesuɡii sɔ̃ɔwɑ. Bɑ ǹ nun wunɛn torɑnu sɔ̃ɔsi bu kɑ nun ɡbɑrɑ yorun di. Gɑri weesuɡiiyɑ bɑ nun sɔ̃ɔwɑ yi yi nun nɔni wɔ̃kuɑ.
15Wee, tɛ̃ wi u sɑrɔ u rɑ nun tɑkɑ koosiwɑ u yɛ̃ɛ, kpɑ u wiɑ ko u nɛɛ, wuu ɡeniwɑ bɑ rɑ rɑɑ soku wuu burɔ, ɡèn sɔ̃ hɑnduniɑn tɔmbu kpuro bɑ rɑ n nuku dobu mɔ̀?
16Kpɑ yibɛrɛbɑ bɑ n nɔɔ tɛndu bɛri bɑ n nun yɛ̃ɛmɔ bɑ n mɔ̀, sɑ nun mwɛ nɡe dĩɑ dɔkɑ. Wee, tɔ̃ɔ te sɑ mɑrɑ tɑ tunumɑ, sɑ tu wɑ.
17Yinni Gusunɔ u kuɑ ye u ɡɔ̃ru doke. U yibiɑ ye u ɡeruɑ sɑɑ yellun di u nɛɛ, u koo ko. Wee u wunɛ Yerusɑlɛmu kɑm kuɑ. U ǹ wunɛn wɔnwɔndu wɑ. U derɑ yibɛrɛbɑn nukurɑ dorɑ wunɛn sɔ̃, domi u bu dɑm kɑ̃.
18Yerusɑlɛmu, ɑ Yinni Gusunɔ nɔɔɡiru sueyo, ɑ de u wunɛn wuri nɔ. A nɔni yĩresu kokuo nɡe dɑɑru. A ku wɛ̃rɑ, ɑ ku wuri mɑri.
19A seewo ɑ wuri ko wɔ̃kuru, ɑ wunɛn ɡɔ̃ru kpuro kusiɑ Yinni Gusunɔn wuswɑɑɔ. A nɔmɑ yiiyo ɑ nùn kɑnɑ wunɛn bibun sɔ̃ be bɑ ɡbimɔ swɛɛ sɔɔ ɡɔ̃ɔrun sɔ̃.
20Yinni Gusunɔ, ɑ mɛɛrio ɑ wɑ. Wɑrɑ ɑ kuɑre nɡe mɛ. Mbɑn sɔ̃nɑ ɑ derɑ tɔn kurɔbɑ ben bibu temɑ be bɑ kĩ mi. Mbɑn sɔ̃nɑ ɑ derɑ yibɛrɛbɑ bɑ mɑɑ wunɛn sɔmɔbu kɑ yɑ̃ku kowobu ɡo wunɛn sɑ̃ɑ yerɔ.
21Wee bukurobu kɑ bibun ɡonu nu kpĩ swɛɛ sɔɔ. Bɑ nɛn wɔndiɑbɑ kɑ ɑluwɑɑsibɑ ɡo tɑbu sɔɔ. A derɑ bɑ bu sɑkirɑ wɔnwɔndu sɑri, wunɛn mɔrun sɑɑ.
22A nɛn yibɛrɛ be nɑ nɑsie sokusiɑ bɑɑmɑn di bɑ mɛnnɑ nɡe tɔ̃ɔ bɑkɑrun sɑɑ. Yen dɔmɑ te, ɡoo kun kisire. Goo kun mɑɑ seewe bii be nɑ kĩ nɑ seeyɑ sɔɔ. A derɑ nɛn yibɛrɛ u bu ɡo kpuro.
