1मिनु दाऊद रामाह ङा नायोथ रे प्रोक्शा, योनाथन आ बाक्तीक जाक्दीम्माक्त। मिनु मेकोमी योनाथन कली “गो मार पङा? आं दोस मार बाक्बा? मारदे इन आफोम आं कली साइक्चा माल्बा?” दे हिल्लो पवा बाक्त।
2मिनु योनाथनमी “मोदेंशो मदुम्ल। गे मबेक्नीनी। आं आफोम आं कली मदेंथु, आइक्च नु ठेयब गेय मारेइ मपाइब। ओदेंशो लोव़ आं आफोम आं रे दोपा ख्रुइक्बा ङा? मोदेंशो मपाइब” देंमाक्त।
3मिनु दाऊदमी “गे आं कली दाक्नीनी, दे इन आफोम तुइक्ब। मेकोमी ‘योनाथनम मतुइक्तल। तुइक्ताक्व हना, आ थुं खाइक्ब’ दे मिम्शो बाक्ब। थमा पा, परमप्रभु यावे ब्रोंइशा बाक्शो खोदेंशो पा बेक्तीक आं नेक्था बाक्त” दे कसम जवा बाक्त।
4मिनु योनाथनमी दाऊद कली “गे मार देंनीनी, गो मेको पाइनुङ” देंमाक्त।
5मिनु दाऊदमी योनाथन कली “दीसा औंसी बाक्ब। गो पिप नु बाक्शा, जचा माल्नुङ। गो नाक्त सां सम्म रू मेर लशा ख्रुइश्शा बाक्नुङ।
6इन आफोम आं मजाक्शो आ पर्बम लोव़ ग्रुंइताक्व हना, मेको कली ‘दाऊदमी बेथलेहेम आ खिंम रीब पा लचा माल्तीके, आं कली हिल्लो पती। मारदे हना मेकेर खिं ङा मुर नेल्लेमी बर्सम चढ़ेतीक चढ़ेचा माल्बाक्माक्त’ देनीन।
7मिनु मेकोम ‘ठीक बाक्ब’ देंत हना, मेको रिम्शो बाक्ब। तन्न मेको गाइश्शा चुरशा पाप्तु हना, मेकोमी आं पर्बम मरिम्शो मिम्शो बाक्ब, दे गे तुइक्नीनी।
8मोपतीके गे इन गेय पाइब, गो नु थमा सुइक्चा ङा गेय पने। मारदे हना गे नु गो परमप्रभु यावे आ ङोंइती कबल का पशो बाक्नस। गो दोस ताइब बाक्ती हना, गे आं कली साइय्यीनी। इन आफ बाक्तीकेमी मलाइय्यीनी” देंमाक्त। १सामुएल १८:३
9मिनु योनाथनम “मोदेंशो लोव़ मपन। आं आफोम इन कली साइक्चा मिम्शो गो तुइक्ताक्ङ हना, इन कली शेंनुङ” देंमाक्त।
10मिनु दाऊदम योनाथन कली “इन आफोम मरिम्शो लोव़ पाप्तु हना, मेको सुम आं कली तुइक्पाइक्बा?” देंमाक्त।
11मिनु योनाथनमी “गो नु पिने” देंमाक्त। मिनु मेको निम्फा हिरथ लसा बाक्त।
12मिनु योनाथनम दाऊद कली “गो इन कली, परमप्रभु यावे, इस्राएली आन परमप्रभु आ ङोंइती एको लोव़ पाइनुङ। दीसा कि नित्थ नाक्त आं आफ आ थुं थामु नोले मेकोम इन पर्बम रिम्शो मिम्शो बाक्त हना, गो इन कली तुइक्पाइक्नुङ।
13तन्न आं आफोम मरिम्शो मिम्शो बाक्त हना यो, गो इन कली तुइक्पाइक्नुङ। गो इन कली मतुइक्पाइक्ता हना नु इन कली मप्रोंइता हना, परमप्रभु यावेमी आं कली सजाइ गेवल। परमप्रभु यावे आं आफ नु बाक्शो खोदेंशो पा गे नु यो बाक्ल।
14गो ब्रोंइङा सम्म परमप्रभु यावेम आ गेना हना यो दाक्शा मप्रोंइशो खोदेंशो पा इन दाक्तीक आं कली कोंइदीन।
15परमप्रभु यावेम रागी रे दाऊद आ जोरी सत्रु नेल्ल क्याम्ताक्व हना यो, गे इन गेना हना यो दाक्तीक आं खिं ङा मुर आन रे मक्याम्दीन” दे योनाथनमी दाऊद कली देंमाक्त।
16मेना योनाथनमी दाऊद आ खिं ङा मुर नु कबल पा “परमप्रभु यावेम दाऊद आ जोरी सत्रु आन कली माल्शा ग्रुंइदल” देंमाक्त।
17मेको नु दाक्मुशो आ पर्बम योनाथनमी दाऊद नु कसम जवा बाक्त। मारदे हना, मेकोम मेको कली आंम कली खोदेंशो पा दाक्बाक्माक्त।
18मिनु योनाथनम दाऊद कली “दीसा औंसी बाक्ब। इन नित्तीक श्येत्थ बाक्शो तशा, गे मबाक्नीनी, दे तुंइसीब।
19मोपतीके नित्थ नाक्त इन ख्रुइक्तीके उइ मेर लने। इन ङोंइती ख्रुइक्तीकेम लशा, फुल्लु आ नेक्था बाक्कीन।
20मिनु गो मेको फुल्लु आ नेक्था ब्रा सां आप्नुङ।
21मिनु गो मेको वोंइश आल कली ब्रा इ ङोंइती बाक्नीम, दे माल्थ सोइक्ताक्ङ हना, गे ग्रूशा पिन। परमप्रभु यावे ब्रोंइशा बाक्शो खोदेंशो पा गे ठीक बाक्नीनी।
22तन्न गो मेको वोंइश आल कली ‘कोव़ङो, ब्रा इ नोले गे बाक्नीम। मेको खुप्शा चाक्को’ देंती हना, गे प्रोक्कीन। मारदे हना परमप्रभु यावेम इन कली सोइश्शो बाक्ब।
23गो निक्शी इस दातेम पशो लोव़ गेना हना यो लील, दे परमप्रभु यावे सांकछी बाक्ब” देंमाक्त।
24मोपतीके दाऊद रू मेर ख्रुइश्शा बाक्माक्त। मिनु औंसीमी भोज ठीक दुम नोले पिप जचा कली निस्से बाक्त।
25सावल ङोंइती खोदेंशो पा आ नित्तीकेम निस्से बाक्त। आ नित्तीके गारो आ नेक्था बाक्शो बाक्त। आब्नेर मेको आ नेक्था निस्से बाक्त। योनाथन चहिं राप्शा बाक्शो बाक्माक्त। तन्न दाऊद आ नित्तीक श्येत्थ बाक्माक्त।
26मेको नाक्त सावलम मारेइ मदेंमाक्त। मेको ग्रांग्रा दिशो दुम माइ। मोपतीके मजाक्म माइ, दे मिम्ता बाक्त। लेवी १५:१६
27औंसी आ दीसा दाऊद आ नित्तीक श्येत्थ बाक्माक्त। मिनु सावलम आ तौ योनाथन कली “सिनाक्त मुलाक्त येस्से आ तौ भोजम मारदे मजाक्म” दे हिल्लो पवा बाक्त।
28मिनु योनाथनम सावल कली “दाऊदमी ‘गो बेथलेहेम लाइनुङ’ दे लोव़ पाप्तु।
29मेकोमी ‘आं खिं ङा मुरपुकी चढ़ेचा कली सहर लशो बाक्नीम। आं लोक्बम आं कली मेक जाक्चा, दे ब्रेत्ताक्यी। मिनु गे आ कली शिशी पाइनीनी हना, आं लोक्ब आन कली ग्रुम्थ लचा गेयीनी’ देंत। मोपतीके मेको पिप नु जथ जाक्ने मचब” देंमाक्त।
30मिनु सावल योनाथन नु गाइश्शा मेको कली “गे दूली पाइब नु मटीब मीश आ तौ, गे येस्से आ तौ कली वारच सेल्शा, मुने दोक्शो बाक्नेवे। मिनु इ ममा इ कली जरमेशो आ पर्बम मुने दोक्त।
31येस्से आ तौ रागीम ब्रोंइशा बाक्म सम्म गे मलीनेवे। इ राज्य यो मलीब। मेको कली रीब पा एक चाक्चा कली ब्रेत्थ सोइक्तीमी। थमा पा मेको साइक्चा पुंइसीब बाक्ब” देंमाक्त।
32मिनु योनाथनमी आ आफ कली “मेको मारदे साइक्चा पुंइसीबा? मेकोम मार पवा ङा?” देंमाक्त।
33मेको लोव़म पतीके सावलमी आ तूतीक क्युक्शा, आ तौ कली साइक्चा मला बाक्त। मिनु योनाथनमी आ आफोम दाऊद कली साइक्चान माल्शो बाक्माक्त, दे तुइक्ता बाक्त। १सामुएल १८:११
34मिनु योनाथन गाइश्शा चुरशा आ नित्तीक रे बोक्शा, मारेइ मजवा बाक्त। मारदे हना दाऊद कली साइक्चा माल्शो आ पर्बम सुर्ता पवा बाक्त। आ आफोम दाऊद कली मरिम्शो पचा मिम्शो बाक्माक्त।
35मिनु आ दीसा सुनी देंशो खोदेंशो पा, योनाथन दाऊद कली ग्रुम्थ लमाक्त। मेको नु वोंइश आल का यो बाक्माक्त।
36मेकोमी मेको वोंइश आल कली “गो आं आप्शो ब्रा माल्थ लावो” दे मदा बाक्त। मेको वोंइश आल दोरमेनु, योनाथनम आ नोले गे ब्रा आबा बाक्त।
37मिनु मेको वोंइश आल योनाथनम ब्रा आप्तीकेम जाक्दीम्मेनु, योनाथनम “ब्रा इ नोले गे बाक्ब” दे ब्रेत्ता बाक्त।
38मिनु योनाथनमी मेको वोंइश आल कली “रीब पा लावो। देश मपावो” दे ब्रेत्ता बाक्त। मिनु मेको वोंइश आल ब्रा गुप्शा आ ठेयब मुर आ बाक्तीक चाक्गा बाक्त।
39मेको वोंइश आलम मारेइ मतुइश्शो बाक्माक्त। योनाथन नु दाऊदम ला आस ङोंइती देंशो लोव़ तुइक्तसे बाक्त।
40मिनु योनाथनम आ या मेको वोंइश आल कली गेशा “सहरम लतो” दे सोइक्ता बाक्त।
41मिनु मेको वोंइश आल लम नोले, दाऊद आ ख्रुइक्तीक फुल्लु आ नोले रे ग्रूशा, खेयप सां बाप्शा मान पवा बाक्त। मिनु मेको निक्शी पुक्पु पाइक्मुसा बाक्त। मिनु निम्फा ङाक्सा बाक्त। दाऊद योनाथन क्येङा शुश ङाक्माक्त।
42मिनु योनाथनम दाऊद कली “रिम्शो पा लावो। गे नु गो परमप्रभु यावे आ नेंमी कसम जशा, परमप्रभु यावे गे नु गो इस दातेमी बाक्ल। मेको इ चच युइ नु आं चच युइ आन दातेमी गेना हना यो बाक्ल” देंमाक्त। मिनु दाऊद बोक्शा लमाक्त। योनाथन चहिं सहर लेम्माक्त।
