1Nazrí'ile̱'e̱da' xudau' chiu' Lue', Dios, napu' dute̱ xel-la' waca.
2Dxaca lázrele̱'e̱da' sua' ga na', ne dxezá lazra' sua' lu xudau' chiu', Xran. Dute̱ da naca', ne dute̱ lázrdawa' dxul-la' chiu' Lue', Dios ban.
3Ba belún chje̱gu ca' xrú'uneba', na' buchuj ca' zaj de̱ lataj naga dxuluzríaba' biadu chee̱ba' ca' naga zua lu cugu chiu' Lue', Dios, napu' dute̱ xel-la' waca. Nacu' Lue' Wenná Bea chia', ne Dios chia'.
4Ba neza zrente̱ naca na chee̱ benne' ca' zaj zre̱'e̱ xudau' chiu'. Chadía chacanna xelúe lá'anaqueze̱' Lue'.
5Ba neza zrente̱ naca na chee̱ benne' ca', Lue' dxuzúa chuchu' le̱', benne' ca' dxelezá lazre̱' chjaque̱' xi'a lá'azxa chiu', xi'a Sión.
6Gate dxeledée̱' lache' bizre nazí le na Lache' Nisa Dxebézredxu, dxexaca na lataj naga dxalaj nisa, na' gusezrá nisa xiuj ca zaj naca beaj ca'.
7Dxelácadxe̱' benne' wal-la dxácate̱ ne zaj xu'e̱ neza lawe' da xelelé'ene̱' Dios lu xi'a lá'azxa chee̱', xi'a Sión.
8Bene, Xran, ca naca da dxenaba' Lue', Dios, napu' dute̱ xel-la' waca. Bene, Dios, nacu' Dios chee̱ Jacob.
9Be̱n da xrlátaje chee̱ benne' wenná bea chee̱ntu', Dios, benne' wenná bea na' guca'u Lue'.
10Cháwedxa naca sua' tu zraze lu xudau' chiu' quézcala sua' chi gaxúa iza naga xula. Dxaca lazredxa' sua' dxa xu'a xudau' chee̱ Dios chia' ca tu benne' nada'u, quézcala súaqueza' tu lizra' zaca naga quebe zua Dios.
11Xránadxu Dios naque̱' Benne' dxuxúe̱' dxi'u, ne Benne' Wenná Bea xabáa chee̱dxu. Dxune̱' dxi'u da chawe' dute̱ xel-la' zri'i lazre' chee̱', ne dxune̱' dxelapa bénneache dxi'u ba lá'ana. Quebe xezúene̱' zi' gune̱' da chawe' chee̱ benne' ca' zaj naque̱' du lazre'.
12¡Dios, napu' dute̱ xel-la' waca! ¡Ba neza zrente̱ naca na chee̱ benne' ca' dxuluxrén lazre̱' Lue'!
