1Baken koman say distolbo en sik-a mo nemnemem din mangam-amag si lawa. Adi ka maapalan en daida.
2Tan nabeas ya mola di kaiarigan da, sinkaattikan et matey ya mamaga da.
3Si Diyos et di talkem ya din siged di amagem, ta omandoy biyag mos nan daga ya magay mapasamak en sik-a.
4Malaydan ka koma ay mansilbi en Diyos ay wadad daya, et din amin ay laydem yan idawat na.
5Italek mon biyag mo en sisya et tolongan daka.
6Paneknekanan to ay siged ya nalinteg ka, et kaman pat-an di alas dosi di kinalawag na.
7Sin sangoanan Diyos, gominek ka koma ya anosam ay sed-en din amagena. Adi kan omapal en daida ay bomaknang gapo sin lawa ay am-amagen da ya matongpal din lawa ay panggep da.
8Din apal ya bonget et pandokogam, tan din pantongpalan da et panbasolam.
9Tan madosa dan to din mangam-amag si lawa, ngem din mantalek en Diyos et okaen da din daga.
10Baken bomayag et mamaga din mangam-amag si lawa, olay estem ay anapen daida et maga da.
11Ngem din napakombaba et okaen da din daga, ganasen da di siged ay biyag ya talna.
12Din mangam-amag si lawa et man-gayetget das bonget da mo ilaen dan ipogaw ay siged di ogali na, et panggepen day lawa ay maikontra en sisya.
13Ngem si Diyos pay et sis-iyekanas daida, tan ammo na ay dandani di kadosaan da.
14Din makedse et isagana da din kampilan ya pana da ta peslen da din nabibiteg ya kaseseg-ang ay iib-a da ya siya abe din nalinteg di kabibiyag na.
15Ngem din kampilan da di mamse sin mismo ay awak da ya magotlo din pana da.
16Din at-atik ay sanikwan di nalinteg et nabanbanol da mo din kinabaknang di amin ay mangam-amag si lawa.
17Tan kaanen Diyos din kabaelan di ipogaw ay lawa, ngem din nalinteg pay et salsalaknibanas daida.
18Ay-ayowanan Diyos din managtongpal en sisya sin am-in ay agew di biyag da, ya din daga ay tinawid da et oka das eng-enggana.
19Sin timpon di ligat, adi dan maligatan, olay mo betil, adi dan mankolang.
20Ngem din kalaban Diyos ay din mangam-amag si lawa, sabsabong ya asok di kaiarigan da, tan sinkaattikan et mamaga da.
21Man-otang di managbasol yan adi dan manbayad, ngem din nalinteg, man-idawat da ay silalayad.
22Din binindisyonan Diyos et okaen da din daga ngem din dosaena et maipakaan da.
23Si Diyos di mangitdo si kosto ay danan tako mo malaydan sin kabibiyag tako.
24Olay mo maisokba tako, kasin takon bomangon, tan wadas Diyos ay tomoltolong.
25Manipod sin kakitkittoy ko engganas nakayak, maga polos di nangilaak si nalinteg ay binaybay-an Diyos ono din an-ak na yan manpalpalimos.
26Kanayon ay nakasagana ay man-idawat ya man-ibolod sin iib-a na, manbalin abe ay bindisyon din an-ak na.
27Dokogan yo din lawa ta din siged di amagen yo ta say mantee kayos eng-enggana sin daga ay tinawid yo.
28Tan si Diyos et din kinalinteg di laydena ya adi na baybay-an din matalek ay ipogaw na. Kanayon ay salaknibanas daida, ngem din an-ak di mangam-amag si lawa et maipakaan da sin daga.
29Din nalinteg di mangoka sin daga et mantee das di si eng-enggana.
30Din nalinteg et kostokosto din kali na, ipaila da din sirib na.
31Nenemnemena din bilbilin di Diyos na et maga di kasangawana.
32Din managbasol et siimena din nalinteg ay ipogaw ta peslena.
33Ngem adi baybay-an Diyos sin panakabalin di kalabana, adi na ipalobos ay makeddengan mo idarum da.
34Mantalek kayon Diyos ya mantongpal kayon sisya, et mapadayawan kayo ay mangoka sin daga, ya ilaen yo din kadosaan di mangam-amag si lawa.
35Waday enak inila ay lawlawa di nemnem na yan ineg-egyatan di gagait na. Dakdake ay kaiw ed Lebanon di kaiarigana ay din sidro ay kanan da.
36Idi kasinak nalabas yan maga sisya, inan-anap ko ngem iwed ay maila.
37Ilaen yo din matalek ya siged di ogali da, tan din naolnos ay ipogaw et omad-ado din poli da.
38Ngem din managbasol et mamingpingsan ay madosa da et mamaga din poli da.
39Isalakan Diyos ya salaknibana din nalinteg sin timpon di ligat da.
40Badangana ya isalakanas daida sin ipogaw ay lawa di nemnem da, tan sisya di kamangen da.
