1Mankantaak maipanggep si kinalinteg ya kinapodno, kantaek paran sik-a, Apo.
2Magay maipabasol to en sak-en sin panagbiyag ko, nalinis abe di biyag ko sin beey ko. Pig-an pay di omaliam en sak-en, Apo?
3Pandokogak to di lawa ay plano ay magay silbi na, sigaak abe din lawa ay ogalin di manokog en sik-a, adiak polos maalinan si kaman nidi ay lawa.
4Addawiak di ipogaw ay nakillo di nemnem na, adiak ipalobos ay komadkadwa da.
5Paginkek to di nalimed ay mangipalawlawa si gait na, adiak aben anosan din mangipapangatos awak na.
6Din matalek ay ipogaw sin ili di piliek to ay makitee sin beey ko. Din nalinis di biyag na di ipalobos ko ay mansilbi en sak-en, Apo.
7Magay makitee sin beey ko ay maetek, adi da mabalin ay mantee sin sangoanak.
8Inagsapa ay kaanek din laway ogali na sin ili, Apo, ponasek amin ay mangam-amag si baken kosto sin pinilim ay siyodad mo.
