Text copied!
CopyCompare
Kankanaey Bible - Salmo

Salmo 59

Help us?
Click on verse(s) to share them!
1Omisalakan ka ya somalaknib ka, Apo, sin gomobat ay kalaban ko.
2Omisalakan ka sin mankakekedse, daida ay manpanggep ay pomse.
3Ilaem din kalaban ko ay magay seg-ang da, semsem-ed da ay pomse, olay magay basol kon daida.
4Dalasen da ay mansagana ta pomse da, ilaem kod ta somalaknib ka.
5Yahweh, Kangatoan ay Turay ay Diyos di Israelita, ilaem kod ta dosaem nan nanasyon ay nay da. Manglilipot da, adi ka kod seg-angan daida.
6Nilablabi ay mantaoli dan kalaban ko, manngangaed da ay manlikliked sin siyodad ay kaman dan aso.
7Pag insolto di bomala sin tepek da, kaman kampilan ay makasogat din kali da, tan kanan da en magay mannge en daida.
8Ngem sik-a ay Diyos, sis-iyekam ay laslasoyen daida.
9Sik-ay pantalkak ya poon di bikas ko, kaman kan makneg ay beey ay pankamangak, Apo.
10Omali ka ay bomadang begew sin adi manbalbaliw ay layad mo, ipailam en sak-en din kaabakan di kalaban ko.
11Adi ka kapese en daida, Diyos ay salaknib ko, ta adi linglingan din ipogaw ko. Dosaem daida babaen sin panakabalin mo ta owat dan lomikeliked, Apo.
12Basol ya pag lawlawa di kalien da. Kaman da koman titit ay matagdey sin kinatangsit da, tan maetek ya makabaos da.
13Gapo sin bonget mo, mamingpingsan ay dosaem daida ta maammoan sin amin ay solin di daga ay iturayam din Israelita.
14Nilablabi ay mantaoli dan kalaban ko. Manngangaed da ay lomikeliked sin siyodad ay kaman dan aso.
15Kaman dan aso ay manlikliked ay man-anap si kanen da, manngisngis da mo magay datngen da ay kabsogan da.
16Ngem sak-en pay, ikankantak din bikas mo, ipigsak ay mangikanta si inagsapa sin layad mo. Tan sik-a ay Diyos et kaman kan makneg ay beey ko ay kanayon ay pankamangak sin timpon di ligat ko.
17Mankantaak ay mangidayaw en sik-a ay poon di bikas ko, tan sik-a di pankamangak, Apo. Sik-a ay Diyos di mangipappaila en sak-en sin adi manbalbaliw ay layad mo.