1Dakayo ay ipogaw ko, dengngen yo din itdok en dakayo.
2Pangarig di osalek ay mankali en dakayo. Din napasamak ed idi, waday naoneg ay maitdo, et say ipalawag ko en dakayo.
3Da nan dinnge ya inammoan tako ay inbagan di ap-apo,
4adi tako isaot sin aan-ak tako, mo adi et dad-aten tako sin aap-o tako din panakabalin Diyos ya din inam-amag na ay kaeegyat ya kaeetnga.
5Inbaga na din linteg na sin polin Jacob ay makwani en Israelita. Binilina din aap-o tako ay itdo da din linteg na sin aan-ak da
6ta adalen din maisokat ay poli da ya itdo da abe sin aan-ak da.
7Say inbilina di en daida ta si Diyos di pantalkan da ya adi da linglingan din inam-amag na et tongpalen da din bilbilina
8ta baken dan kaman din ap-apo da ay nangonkontra en Diyos ya makenteg di nemnem da. Adi da nantalek en Diyos ya baken dan napodno en sisya.
9Din polin Efraim yan nan-armas da si pana, ngem sin timpon di gobat, nanagtag da.
10Nilabsing da din intolag Diyos en daida, sinigaan da ay tongpalen din linteg na.
11Nilinglingan da din inam-amag na, din nakaskasdaaw ay inpaila nan daida.
12Sin pangiilaan di ap-apo da yan nan-amag si milagro sin tanap ed Zoan ay sakop di Egipto.
13Din baybay yan nansianena et nandanenas daida, kaman dingding sin nan-inigid din danom ay inpaginek na.
14Inpango nas daida babaen si liboo sin kaagawan ya maninsinlabi babaen si apoy ay mabidang.
15Nan-ekangenay bato sin kadardaratan et inpawada nay danom ay kaman ginawang, mansobsobra ay en da nan-inoman.
16Inpawada nay obbog sin bato et nan-oyas di danom ay ad-ado.
17Ngem intoltoloy da ay nanbasol en Diyos ay Kangatoan, kinontra das sisya sin lugar ay kadardaratan.
18Ginagara da ay namadas en sisya sin nankedawan das makan ay aklongan da.
19Nankali das maikontra en Diyos sin en da nangwanian, “Ay tan maidawat Diyos di makan isnan lugar ay kadardaratan?
20Idi sinoplit na din bato, binmala kayman di danom ay ad-ado. Ngem kabaelana ngata ay mangipawada si karni ya makan para sin ipogaw na?”
21Isonga idi dinngen Diyos na, palalo din bonget na et dinosanas apoy din ipogaw na.
22Tan magay pammati dan sisya, et adi da nantalek ay isalakanas daida.
23Ngem olay mo siya di, binilina ed daya, din pantew ed langit yan binokatana.
24Kaman odan ay inig-as na di manna ay napod daya ta wada di kanen da.
25Owat dan ipogaw ngem nangan da si kanen di angel et nabsog da.
26Din dagem ay mapos belaan di agew yan binolosana, din mapos abagatan yan inpapigsa na babaen sin panakabalina.
27Ad-ado ay titit di indawat nan daida, kaman darat sin baybay di kaad-ado da.
28Nag-as da sin nan-gawaan ya nanniliked di kampo da.
29Isonga nangan ya nabsog da, tan indawat Diyos din ak-aklongan da.
30Ngem adi dan napnek et deda ay mangmangan da
31yan binmonget si Diyos en daida et pinse na din napili ay kapigsaan ay babbaro da.
32Ngem olay pay siya di, intoltoloy da ay nanbasol en sisya. Olay ad-adoy nakaskasdaaw ay inpaila nan daida, adi da pay dedan nantalek en sisya.
33Isonga kaman dagem din biyag da ay bigla ay pinap-eng na.
34Idi pinse nay odom en daida, sinagong din odom sisya. Nanbabawi da ya inpasnek da ay nankararag en sisya.
35Ninemnem da ay si Diyos ay Kangatoan di nanalaknib en daida ya nangisalakan.
36Ngem pag etek amin ay kali da, maga polos di tet-ewa.
37Baken dan napodno en sisya, nilabsing da din intolag nan daida.
38Ngem managseg-ang si Diyos sin ipogaw na et pinakawanas daida, adi na pinses daida. Namin ado ay intoled na din bonget na en daida.
39Tan ninemnem na ay owat dan ipogaw ay kaman dagem ay malabas yan malitaw.
40Sin lugar ay magay omili, kinontra das sisya, namin ado ay nanladingiten da.
41Pinadapadas das sisya et nansakiten dan nemnem na, sisya ay nasantoan ay Diyos di Israelita.
42Nilinglingan da din panakabalina sin agew ay nangisalakananan daida sin kalaban da.
43Nakaskasdaaw di inamag na ed Egipto sin tanap ed Zoan ay kanan da.
44Nanbalinena si dada din ginawang da et maga di inomen da.
45Ad-ado ay ngilaw di inpawada na ay begew si naligatan da. Inpawada na abey tokak ay nanadael sin daga da.
46Wada pay di dodon ay inbaa na ay nangan ya nanadael sin mola sin payew da.
47Babaen si dalalo ya andap, dinadael na din obas ya sikomoro da.
48Pinse nas dalalo ya kimat din baka ya karnero da.
49Inpalak-am na din palalo ay bonget na en daida, et palalo ay nadosa da sin nangibaaana sin aanghel na ay mamaligat ya mamse en daida.
50Adi nan intoled din bonget na ya adi nan inpalobos ay matago da, mo adi et babaen si pisti yan pinse nas daida.
51Din besag di amin ay pamilya ed Egipto yan pinse na.
52Pag nan ipango din ipogaw na sin lugar ay magay omili sin nanbalasatan da ay kaman dan karnero ay ipaspastol na.
53Magay lawa ay napasamak sin nangipangoana en daida et magay nandanagan da, ngem nilim-otan din baybay din kalaban da.
54In-ey na din ipogaw na sin nasantoan ay daga na, sin dontog ay inabak na babaen sin panakabalina.
55Inabo nan omili sin dinmatngan di ipogaw na, biningabingay na din daga da sin Israelita, indawat na abe din beey da.
56Ngem si Diyos ay Kangatoan yan kinontra da ya pinadapadas das sisya, adi dan tinongpal din bilbilina.
57Baken dan napodno ya kinonkontra das sisya ay kaman met laeng din aam-a da. Adi dan kaiturong ay kaman dan natiko ay pana.
58Tan si Diyos yan inpabonget da gapo sin pandaydayawan da ay sin dodontog di nangisaadan da. Nan-imonen da gapo sin didiyosen da.
59Palalo ay binmonget si Diyos sin nangilaana isna, et dadlonan dinokogan din Israelita.
60Din nanbeeyana ed Shilo yan binaybay-ana, din nakiteanas ipogaw ay tolda na.
61Inpalobos na ay posen ya isaan di kalaban da din Baol di Tolagan ay sinyal di panakabalin ya dayaw na.
62Binmonget sin ipogaw na et binaybay-ana ay peslen din kalaban da.
63Natey sin gobatan din babbaro da, et magay mangasawa sin babalasang da.
64Natey si kampilan di papadi da, ngem magay iyat din aas-awa da ay mangiladingit en daida.
65Kaman naseseyep si Diyos ngem binmangon sin odi na, kaman soldado ay tinmoled sin arak ay ininom na.
66Nansisianena din kalabana, naabak da et maibabain das eng-enggana.
67Sinigaana din polin Jose, din polin Efraim yan adi nan pinili.
68Ngem say pinili na et din tribun Juda, pinili na ed Zion ay laylaydena.
69Insaad nas di din Timplo na ay kaman din beey na ed daya, kaman din daga ay insaad na ta komakaman si eng-enggana.
70Pinili nas David ay mansilbi en sisya, inayagana sin panpaspastolanas karnero na
71ya pangay-ayowanana sin olbon da ta panbalinena ay ari ed Israel ya mangayowan sin ipogaw na.
72Napodno sisya ay mangay-ayowan en daida, nalaing ay mangipangpango en daida.
