Deuteronomy 9

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

¹“Mu telmed yu Israel! Daba’ e ngam th’abed e lul’ ni Jordan nga ba’nem ngam marod mu tafned fare but’ nib milfan nga bogi nam ni yad ba gel ngomed. Pi binaw rorad e ba ga’ ma bay e yoror riy nib liyeg nib tun ko manileng.

²Girdi’ ni bay riy e yad nun’uw ma yad ba gegel; yugub thil n’umngirad ngak e yug girdi’ ma kam rung’aged ni kanog ndariy be’ nrayag rok ni nge gel ngorad.

³Ma bay mu guyed nga owchemed ni SOMOL ni Got romed e bayi m’on romed ni bod ba daramram nib gel. Bay i gel ngorad i yan u nap’an ni gimed be yan nga m’on, ya ngam tulufedrad mi gimed thirifrad u but’ nib machreg, ni bod nike micheg.

⁴“Nap’an nra tulufrad SOMOL ni Got romed ngar chuwgad ni fan e ngam tafned e nam rorad, ma dab mu leam niged nike fekmed SOMOL i yan ngalan e re nam nem ni ngam tafned ni bochan e bay rogmed ni ngam tafned. Danga’, i SOMOL e bayi tuluf e pi girdi’ ney ngar chuwgad ni bochan e yad ba kireb.

⁵Gathi bochan e gimed bfel’ ma gimed be rin’ e tin nib mat’aw e aram fan ni nge pagmed SOMOL ngam marod nga taferad. Bayi tulufrad ni bochan e yad ba kireb, ma ke leamnag ni nge tay u gil’ e tin ni micheg ngak pi chitamangimed ni kakrom, ni aram Abraham nge Isak nge Jakob.

⁶Ngar mu nanged ni SOMOL e gathi nge pi’ ngomed e re nam nem nib yong’ol e but’ riy ni fan e bay rogon ni nge pi’ ni ngam tafned. Ri danga’, ya gimed bogi girdi’ ni gimed ba gelan’.

⁷“Dab mpaged talin rogon ni mu k’aringed e damumuw ngak SOMOL ni Got romed u lan e ted ni desert. Ka fa rofen ni mu chuwgad u Egypt nge yib i mada’ ko rofen ni mu tawgad ngaray, ni go’ togopluw e um ted ngak.

⁸Ni mus ko fa ngiyal’nem ni gimed bay ko burey ni Sinai ni mu k’aringed e damumuw ngak SOMOL, nge chugur ni nge thang owchemed.

⁹Gu wan nga daken e re burey nem ni nge pi’ SOMOL ngog fa gal yang i malang ni ka ni yoloy ngay fare m’ag nike ngongliy SOMOL u thilmed. Gu par u rom ni aningeg i ragag e rran nge nep’ ni da gu way ban’en ara gu garbod.

¹⁰Ma aram me pi’ SOMOL ngog fa gal yang i malang nu daken e gal yang i malang nem e ri pa’ e yoloy ngay e tin ni yog ngomed u fithik’ fare nifiy ko fa rofen nem ni mmu’ulunggad ngaram ko fare burey.

¹¹Aram rogon, tomuren e re aningeg i ragag e rran nge nep’ nem me pi’ SOMOL ngog fa gal yang i malang nike yoloy fare m’ag ngay.

¹²“Me ga’ar SOMOL ngog, ‘Mu sul nga p’ening ni ka chiney, ya fa pi girdi’ rom, ni gur e mu pow’iyrad nga wuru’ yu Egypt e kar ngongliyed e kireb. Rib machreg ni kar pi’ed keru’rad ko tin kugog ngorad ni ngu’ur rin’ed, ma kar ngongliyed ba liyos ngorad.’

¹³“Miki ga’ar SOMOL ngog, ‘Gu manang ferad gelan’.

¹⁴Dab mu guy rogon ni ngam talegeg, ya kug leamnag ni nggu thang owcherad nge dakriy be’ ni kuyad ra yib ngan’ bi’id. Ma bay gu tem ngam mang chitamngin ba nam nib ga’ ma dabi thilthil gelingrad.’

¹⁵“Mu gu cheal nggu log u daken e burey nga but’ ni bay fa gal yang i malang u pa’ag ni kan yoloy fare m’ag ngay. Ma be yib e nifiy ko fare burey.

¹⁶Mu gguy ni da ku mur folgad ko fare motochiyel ni SOMOL ni Got romed e pi’ ngomed, kam denengad nib togopluw ngak ya ka mu ngongliyed ba liyos ni wasey ngomed ni ya’an ba garbaw.

¹⁷Mu rom u p’eowchemed e gon’ e gal yang i malang nem riy nga but’ nge pilpil.

¹⁸Mu gu paraw nga but’ bayay u p’eowchen SOMOL ni aningeg i ragag e rran nge nep’ ni da gu way ban’en ara gu garbod. Gu rin’ e ren’ey ni bochan e ka mu denengad nib togopluw ngak SOMOL ka mu k’aringed e damumuw ngak.

¹⁹Ya gu rus ko damumuw rok SOMOL nib gel, ni bochane e kri damumuw ni be chugur ni nge thang owchamed, ma aram miki motoyil SOMOL ngog bayay ko tin gu wenignag ngak.

²⁰I SOMOL e ki gel e damumuw rok ngak Aron nge chugur ni nge thang e pogofan rok, mu ku gu wenignag Aron ngak e ngiyal’nem.

²¹Mu gu fek e ren’em ni kam ngongliyed ni ban’en nrib gel e denen riy ni aram fare liyos ni wasey ni ya’an ba garbaw ni ka mu ngongliyed, mu gon’ nga fithik’ e nifiy. Mu gu t’et’ar ni nochiyang mu gu pirdi’iy nge par ni bod e fiyath, mu gon’ ngalan e lul’ ni yan ko burey nga p’ening.

²²“Ma ku mu k’aringed e damumuw ngak SOMOL ni Got romed ko fa ngiyal’nem ni ummed u Taberah, ngu Massah, ngu Kibroth Hattaavah.

²³Ma faani l’ogmed u Kadesh Barnea ni ngam marod ngalan e re nam nem ni ir e nge pi’ ngomed mi gimed togopluw ngak; da i pagan’med ngak ma da um folgad rok.

²⁴N’umngin nap’an ni kug nangmed, e gimed be par ni gimed be togopluw ngak SOMOL.

²⁵“Gu paraw nga but’ u p’eowchen SOMOL ni aningeg i ragag e rran nge nep’, ni bochane keyog ngog ni nge thang owchemed.

²⁶Mu gu meybil ni lungug, ‘SOMOL nib Th’abi Tolang, dab mu thang owchen e girdi’ rom, ni fapi girdi’ ni gur e mu chuwegrad u Egypt nga gelngim nib gel nge feni sorom.

²⁷Mu leamnag e pi tapigpig rom ni er Abraham nge Isak nge Jakob, ngam fek owchem ko gelan’ nge kireb nge denen rok e pi girdi’ ney.

²⁸Ya ra dangay ma ra yog piyu Egypt nde yag rom ni ngam fek e girdi’ rom i yan ngalan fare nam ni mmicheg ni bay mu pi’ ngorad, miyad yog ni ka mu fek e girdi’ rom u Egypt nga daken e ted ni fan e ngam thang owcharad, ya dabumrad.

²⁹Ya pi girdi’ ney e irera’ fapi girdi’ ni gur e mturguyrad ni ngar manged girdi’em me gur e mu fekrad nga wuru’ yu Egypt u gelngim nib ga’ nge gelngim nib gel.