Proveps-Knare Nomaniza 4:2-20

²Nagra knare antahiza negamuanki, rempi hugamisua kea kamefi huonto.

³Nagrama nenfa nompima onensa mofavre mni'norera antanimofo magoke mofavre'a mani'nogeno kegva hunante'negeno,

⁴amanage huno nenfa'a rempi hunamine, mika kema kasamisua kea kagu tumote erintenka azeri hampo'na nehunka, kasegeni'a amagema antesunka, knare hunka manigahane.

⁵Knare antahintahia erio, antahi amahu antahi'zana erio, kasamisua nanekea kagera okaninka, kamagena huontetfa'za huo.

⁶Knare antahintahimofoma kamage'nama huonte'sankeno'a, kagu nevazina avesima ante'sankeno'a, kegva hugantegahie.

⁷Knare antahintahi'zana raza me'neanki erio. Hagi makazana erigahananagi agatere'neazana knare antahiza erio.

⁸Knare antahintahi zana azerisga nehugeno, kagrira kazeri sga hino, agri'ma azeri akonama hanankeno'a, kagrira kazeri sga hugahie.

⁹Ana antahizamo'a, rimpa fru'zanu konariri kasenire huneganteno, kinimofo asinentike fetori kasenire resi hugantegahie.

¹⁰Mofavre nimoke, nagrama huankema antahitenka, ana kema avaririnka amage'ma antesunka, rama'a kafuzge maninka vugahane.

¹¹Knare antahi zampi vuogu nagra kazeri fatgo nehuna, knare fatgo kante kavare'na nevue.

¹²Ana kantema kagama renake'renka vnanana mago zamo'a asevazi ogante'na, traginaku'ma hananana tanafara osugahane.

¹³Kagrama hananegu'ma amama kasamua kea otrenka azeri hanavenetinka atregeno ovino. Na'ankure e'i ana kema huoguma rempima hunegamua kemo'a mani'zanka'agna hugahie.

¹⁴Havi kefo avu'ava hania vahe'mofo kantera ovunka, haviza huno kefoza hu'nenia vahe'mo hania zana ovaririo.

¹⁵Ana kantera ovunka, atrenka rukagesenka vugahuema hantega vuo.

¹⁶Na'ankure zamagra kefo avu'ava zama osu'nesu'za zamavura ovase'za manine'za kefozana hute'za zamavura masegahaze. Vahera zamazeri haviza hutesuzage, zamavura vasegahaze.

¹⁷Kefo avu'avama hu'zana, breti neankna nehu'za, hazenkema huzana waini ti neza negi neankna nehaze.

¹⁸Hianagi fatgo vahe'mofo manizamo'a, zgemo zahufa nehnatino remsa hume ne-eno, eme remsa huno feru aseankna nehie.

¹⁹Hianagi havi avu'ava ene vahe'mofo mani'zamo'a, hani hiankna hu'neankiza, ana vahe'mo'za na'amo zamazeri tanafa nehie nonkaze.

²⁰Nagrama huankere mofavrenimoka kagesa antenenka, mika keni'a antahi ankero.