1Pezeapyaka katu nehe. Ma'e kwaw katu haw uhapukaz iko a'e. Ma'e kwaw paw penenoz iko wahy haw rupi no.
2Ma'e kwaw katu haw ywytyr apyr hekon. Pe iwyr no, pe za'akaw pe no.
3Wiko tawhu pe teixe haw pe no, ukenuhu huwake no. Uhapukaz iko.
4Aze'eg teko peme upaw rupi ihe. Aenoz ma'e teko ywy rehe har paw wanupe no.
5Kwàkwàmo romo ereiko aipo. Aipo nerekwaw katu kwaw ma'e tetea'u. Ezemu'e ikatu 'ymaw wi netyrykaw rehe nehe. Aipo iranaiw ma'e romo ereiko. Ezemu'e ma'e kwaw paw rehe nehe.
6Ezeapyaka nehe. Ta'e amume'u ikatu ma'e teko ihe xe. Heremimume'u paw ikatu a'e.
7Heremimume'u azeharomoete a'e. Ta'e naheakatuwawahy kwaw temu'emaw rehe ihe xe.
8Heremimume'u paw azeharomoete a'e. Ni pitài heremimume'u nahemu'em kwaw purupe. Namume'u kwaw temu'emaw.
9Ma'e kwaw katu har ukwaw katu ma'e paw a'e. Ma'emume'u awer tetea'u henu katu har ukwaw katu ma'e a'e. Nazawaiw kwaw ikwaw paw izupe.
10Aze amo umume'u hepurumu'e haw imono àwàm newe nehe, aze umume'u itaxig parat imono àwàm newe nehe no, epyhyk hepurumu'e haw nehe. Hekuzar wera'u parat wi. Hekuzar katu wera'u itazu or wi no.
11Aiko ma'e kwaw katu haw romo ihe. Herekuzar katu wera'u itapuràg hekuzar katu ma'e wi ihe. Neremimutar paw heawy a'e. Hekatu wera'u ihe.
12Aiko ma'e kwaw katu haw romo ihe. Na'iruz ma'e heta ihewe: uzeapo ma'e kwer kwaw paw, ma'e kwaw paw, weko haw hexak katu haw.
13Aze amo ukyze Tupàn Tuweharupi Wiko Ma'e wi, a'e mehe a'e teko na'iakatuwawahy kwaw ikatu 'ymaw rehe. Naheakatuwawahy kwaw teko waneko wera'u haw rehe ihe. — Hekàg wera'u newi. Hekatu wera'u newi, aze i'i amo, naheakatuwawahy kwaw hehe ihe. Pe ikatu 'ym ma'e iro ihewe. Temu'emaw iroahy ihewe no.
14Amume'u heremiapo ràm. A'e re azapo a'e ma'e. Akwaw katu ma'e ihe. Hekàg no.
15Apytywà tuwihawete wapureruze'eg mehe ihe wà. Apytywà tuwihaw waze'eg iapo katu mehe ihe wà no.
16Tuwihaw upureruze'eg katu wà, ta'e apytywà ihe wà xe. Apytywà tàmuz ihe wà. Apytywà teko upuner ma'e ywy rehe har ihe wà no.
17Azamutar katu heamutar katu har. Herekar har herexak putar nehe.
18Heremetarer katu ihe. Teko herereko katu wà. Aiko tuwihaw ài wanupe. Heta tetea'u ma'e ihewe. Areko katu teko ihe wà no.
19Teko wanupe heremimono kàràm hekuzar wera'u or ikatuahy ma'e wi a'e. Ikatu wera'u parat ikatuahy ma'e wi no.
20Ata pe munar 'ymaw rupi ihe. Ata purereko katu haw ipypor rupi no.
21Amono temetarer heamutar har wanupe. Amynehem wanàpuz temetarer pupe no.
22Tupàn Tuweharupi Wiko Ma'e heapo amogwer ma'e paw wapo 'ym mehe we a'e. Hemiapo kwer kwehe wera'u arer iapo 'ym mehe we heapo a'e.
23Kwehe heapo a'e, izypy mehe ywy iapo 'ym mehe we a'e.
24Azexak kar yryhu izexak kar 'ym mehe we. Naheta kwaw ytyzuzàmaw a'e 'ar mehe rihi.
25Azexak kar ywytyruhu izexak kar 'ym mehe we. Tupàn umuapyk ywytyr wanenaw rehe wà. A'e 'ym mehe we heapo a'e.
26Tupàn heapo ywy iapo 'ym mehe we, ka'a iapo 'ym mehe we no. Te ywy pixika'i ma'e izypy mehe arer iapo 'ym mehe we heapo a'e.
27Aiko a'e pe ywak henaw rehe imuapyk mehe, ywak iahykaw yryhu rehe imono mehe no.
28Aiko a'e pe ywàkun ywak rehe imono mehe, ytyzuzàmaw yryhu wy pe har ipe'a mehe no.
29— Ezeupir zo xe wi nehe, i'i 'y pe kwehe mehe. Aiko a'e pe ize'eg mehe. Omono ywy izypyrogaw ywy iwy pe no. Aiko a'e pe imono mehe no.
30Aiko huwake ma'e iapo àwàm imume'u har romo. Tuweharupi hemurywete kar a'e mehe. Herurywete henataromo a'e mehe no.
31Herurywete ywy rehe. Teko hemurywete kar a'e wà no.
32Pezeapyaka katu kury, kwàkwàmo wà. Pezapo ma'e heremimume'u kwer rupi nehe. Nezewe mehe penurywete putar nehe.
33Apumu'e amo ze'eg rehe. Pezemu'e a'e ze'eg rehe nehe. Peiko ma'e kwaw katu har romo nehe. Peityk zo ko purumu'e haw nehe.
34Henu har hurywete putar wà nehe. heràpuz ukenaw rehe upyta ma'e wà, heràpuz pupe wixe àwàm hàro har wà.
35Ta'e herexakar wexak putar weko haw a'e nehe xe. Tupàn Tuweharupi Wiko Ma'e hurywete putar hehe a'e nehe no.
36Herexak 'ymar umuaiw putar weko haw nehe. Herehe iakatuwawahy 'ym ma'e paw uzamutar umàno haw a'e wà.
