1Iwe, lupwen Palam a silei, pwe mochenin ewe Samol mi Lapalap pwe Israel epwe feiöch, esap feila pwe epwe föri och asisil usun me mwan, nge a newenewen ngeni ewe fanüapö.
2Iwe, a küna ekewe chon Israel lon ewe leni ia ra nonom ie en me lon an ainang. Iwe, Ngünün Kot a feito won,
3pwe a popuetä an kapasen osuni o üra, “Iei alon Palam nöün Peor we mwän. Iei alon ewe mwän mi fat mesan,
4alon ätewe mi rongorong än Kot kapas, ätewe mi wor künan seni Ewe mi Unusen Manaman. A chapetiu, nge mesan esap pwölüpwöl:
5A fokun mürina imwemi kewe imw mangaku me leniemi kewe ämi chon Israel.
6Ra usun chök tettelin ekewe irä palm mi langatam telin, pwal usun chök ekewe tanipi ünükün eu chanpupu. Iwe, ra usun chök irä mi pwokus itan aloes, ewe Samol mi Lapalap a fotuki, pwal usun chök ekewe irä setar ünükün ekewe chanpupu.
7Iwe, koluk epwe pupu seni ar lenien koluk, repwe fotuki fotar pwükil lon pwülüchöchön. Ar king epwe tekia seni ewe king Akak, nge mwür epwe fefeitä.
8Kot a emwenirewu seni Isip, ar pöchökül a usun chök pöchökülen eman ätemwänin kow mi mwacho. Iwe, repwe asomwala ekewe mwü mi ü ngeniir, repwe kupi chüür o atatakisiir, repwe pwal posu ngeniir wokur kewe esefich.
9Ewe mwün Israel a wewe ngeni eman laion mi pwora. Lupwen a konola, esap wor eman a tongeni apwätäi. Ra feiöch chon afeiöchü chon Israel, nge ra anümamau chon anümamaueer.
10Mürin, Palak a fokun song ngeni Palam, a öüwu pöün o üreni, “Üa körukoto pwe kopwe anümamaua chokewe üa oputeer. Nge iei ka fen afeiöchüür fän ülüngat.
11Iei mine kopwe süla lon fanüom. Üa pwon ngonuk pwe üpwe liwiniik, nge ewe Samol mi Lapalap a amwöchü senuk liwinum.”
12Nge Palam a üreni Palak, “Üa fen üreni noum kewe chon künö ka tinireto rei,
13pwe inamwo ika kopwe ngeniei om silifer me kolt meinisin mi nom lon imwom, üsap tongeni lükümach ngeni än ewe Samol mi Lapalap kapas, pwe üpwe föri letipei. Ikamwo a öch ika a ngau, üpwe chök apasa mine ewe Samol mi Lapalap a kapas ngeniei.
14Iei üpwe liwinla ren aramasei kewe. Nge üpwe asile ngonuk mine ekewe aramasen Israel repwe föri ngeni noum aramas lon ekan rän mwach.”
15Mürin, Palam a popuetä an kapasen osuni o üra, “Iei alon Palam nöün Peor we mwän. Iei alon ewe mwän mi fat mesan,
16alon ätewe mi rongorong än Kot kapas o angei ewe tipachem seni Ewe mi Unusen Tekia, ätewe mi wor künan seni Ewe mi Unusen Manaman. A chapetiu, nge mesan esap pwölüpwöl:
17Üa küna i, nge esap iei, üa nenengeni, nge esap kanoto. Eföü fü epwe tötä seni Israel, eman king epwe ütä seni lon Israel pwe epwe nemenem. Epwe amökü möküren ekewe chon Moap o niela ekewe mwirimwirin Set meinisin.
18Epwe akufu chokewe mi oput i me lon Etom o fanüeni fanüer. Nge Israel epwe chök win.
19Eman sounemenem epwe towu seni ekewe mwirimwirin Jakop, epwe arosala chokewe mi chüen manau meinisin.”
20Mürin Palam a nenela won Amalek o eäni an kapasen osuni usun, “Amalek, ewe mwü mi akom me lein ekewe mwü meinisin, nge sopolan epwe unusen tala.”
21Nge lupwen a nenela won chon Ken, a eäni an kapasen osuni usur, “Inamwo are lenien imwemi ra pöchökül o lerasen imwemi ra nom won ekewe achau,
22nge ämi chon Ken oupwe rosola, lupwen oupwe oola ren chon Asur.”
23Mürin a eäni an kapasen osuni o üra, “Iö epwe tongeni manau, lupwen Kot a föri ei?
24Iwe, sipen maun repwe feito seni Kittim o akufu chon Asur me chon Eper. Nge pwal ir repwe fokun mäla me mürin.”
25Mürin, Palam a ütä o liwinla ngeni lenian. Nge Palak a pwal liwinla ngeni lenian.
