1Iwe, ewe Samol mi Lapalap a üreni Moses me Aaron,
2“Oupwe angei iteiten nöün Kohat kewe mwän seni me lein chon ewe ainangen Lefi lon ar famili me än semer cho.
3Oupwe aleaniir seni ier ilik feitä tori ier lime, ir ätekewe mi fich ngeni ewe angang lon ewe imw mangaku ia aramas ra churiei ie.
4Iwe, wisen nöün Kohat kewe mwän me lon ewe imwenfel seni mangaku, repwe tümwünü ekewe mettoch mi unusen pin.
5Iwe, lupwen ekewe chon Israel repwe sai, Aaron me nöün kewe mwän repwe tolong lon ewe imwenfel seni mangaku o ettätiu ewe chechen lefil pwe repwe pwölü ngeni ewe pworofel.
6Mürin repwe pwölü ngeni echö pwölüpwöl seni silin man mi mürina, repwe pwal ameresala won echö mangaku mi arauarau o sökalong ämwärin kewe.
7Iwe, repwe ameresala echö mangaku mi arauarau won ewe chepel ia ewe pilawa mi pin a nom ie. Mürin repwe iseis won ekewe peleich, ekewe sepi fän iten ewe apach mi pwokus, sokun sepi me ekewe rume fän iten ewe asoren ün. Iwe, ewe pilawa epwe chök nonom won ewe chepel fansoun meinisin.
8Mürin repwe ameresala wor echö mangaku mi parachol, repwe pwölü ngeni echö pwölüpwöl seni silin man mi mürina o sökalong ämwärin kewe.
9Iwe, repwe angei echö mangaku mi arauarau o pwölü ngeni ewe lenien atittin fiti laman, fichin me sepian, pwal ekewe rume fän iten ewe noppuk ra aea le alölöü ngeni.
10Mürin repwe tukumalong ewe lenien atittin fiti pisekin meinisin lon echö pwölüpwöl seni silin man mi mürina o iseis won ewe lenien keki.
11Iwe, Aaron me nöün kewe mwän repwe ameresala won ewe rongen asor seni kolt echö mangaku mi arauarau. Repwe pwal pwölü ngeni echö pwölüpwöl seni silin man mi mürina o sökalong ämwärin kewe.
12Repwe angei ekewe pisek meinisin ra aea le angang lon ewe imw mi pin o isenirelong lon echö mangaku mi arauarau. Mürin repwe pwölürela fän echö pwölüpwöl seni silin man mi mürina o iseniir won eu lenien keki.
13Repwe pwal tukeila falangen ewe rongen asor o ameresala echö mangaku mi parachol won ewe rongen asor.
14Iwe, repwe iseis won ewe pwölüpwöl ekewe pisek meinisin ra aea le angang won ewe rongen asor: ekewe sepi fän iten moli, ekewe fook, ekewe sofel, ekewe sepi me pisekin meinisin. Mürin repwe ameresala won echö pwölüpwöl seni silin man mi mürina o sökalong ämwärin kewe.
15Nge are Aaron me nöün kewe mwän ra wes le pwölüela ekewe pisek mi pin me mettochun meinisin lupwen fansoun än chon Israel repwe sai, mürin nöün Kohat kewe mwän repwe feito o mwärei ekewe pisek. Nge resap tongeni atapa ekewe pisek mi pin pwe resap mäla. Ikkei pisekin ewe imwenfel seni mangaku nöün Kohat kewe mwän ra wisen mwärei.
16Iwe, Eleasar nöün ewe souasor Aaron we mwän epwe wisen tümwünü ewe noppuk fän iten ekewe lamp, ewe apach mi pwokus, ewe asoren mongö me ewe lön epit. Epwe pwal nemelapei unusen ewe imwenfel seni mangaku me masouen lon meinisin.”
17Iwe, ewe Samol mi Lapalap a üreni Moses me Aaron,
18“Oupwe tümwünü pwe ekewe familien än Kohat cho resap rosola me lein chon ewe ainangen Lefi.
19Iwe, iei usun mine oupwe föri ngeniir pwe repwe manau, nge resap mäla lupwen repwe kan ngeni ekewe mettoch mi unusen pin: Aaron me nöün kewe mwän repwe tolong o awisa eman me eman ngeni an angang mine epwe uwei.
20Nge ekewe mwän seni än Kohat cho resap fokun tolong lon pwe repwe katol ekewe mettoch mi pin, pwe resap mäla.”
21Iwe, ewe Samol mi Lapalap a üreni Moses,
22“Kopwe pwal angei iteiten nöün Kerson kewe mwän lon ar famili me än semer cho.
23Kopwe aleaniir seni ier ilik feitä tori ier lime, ir ätekewe mi fich ngeni ewe angang lon ewe imw mangaku ia aramas ra churiei ie.
24Iei än ekewe familien Kerson angang me mine repwe uwei:
25Ewe imwenfel seni mangaku, chechan me pwölüpwölün kewe, ewe pwölüpwöl seni silin man mi mürina mi nom asan me chechen asamalapan,
26ewe tit mangaku fän iten ewe leni lükün mi pweli ewe imwenfel seni mangaku me ewe rongen asor, chechen asamalapen tolong, pwal selir me pisekin ar angang meinisin. Iwe, repwe föri ekewe angang meinisin a weneitiir fän iten ekewe pisek.
27Iwe, Aaron me nöün kewe mwän repwe emweni än nöün Kerson kewe mwän angang ren meinisin mine repwe uwei, pwal ren meinisin mine repwe föri. Nge en kopwe awisa ngeniir meinisin mine repwe uwei.
28Iei ekewe angang än familien nöün Kerson kewe mwän me lon ewe imwenfel seni mangaku. Nge ar angang epwe nom fän nemelapen Itamar nöün ewe souasor Aaron we mwän.
29Iwe, kopwe angei iteiten nöün Merari kewe mwän lon ar famili me än semer cho.
30Kopwe aleaniir seni ier ilik feitä tori ier lime, ir ätekewe mi fich ngeni ewe angang lon ewe imw mangaku ia aramas ra churiei ie.
31Iei wiser lon ar angang, pwe repwe uwei pappen ewe imwenfel seni mangaku fiti amwöchür, ekewe ür me alongur,
32üren pwelin ewe leni lükün fiti alongur, ekewe chüföl me ekewe säl fiti pisekir meinisin me pisekinginir. Iwe, kopwe awisa ngeni eman me eman mine epwe uwei.
33Iei än familien nöün Merari kewe mwän angang. Unusen ar angang lon ewe imwenfel seni mangaku epwe nom fän nemelapen Itamar nöün ewe souasor Aaron we mwän.”
34Iwe, Moses me Aaron me ekewe souemwenin chon Israel ra aleani iteiten nöün Kohat kewe mwän lon ar famili me än semer cho
35seni ier ilik feitä tori ier lime, ir ätekewe mi fich ngeni ewe angang lon ewe imwenfel seni mangaku.
36Iteiter lon ar kewe famili ükükün ruungeröü füpükü lime mwän.
37Iei iteiten nöün Kohat kewe mwän lon ar kewe famili mi angang lon ewe imwenfel seni mangaku. Ir ätekewe Moses me Aaron ra aleaniir fän än ewe Samol mi Lapalap allük ngeni Moses.
38Iwe, iei iteiten nöün Kerson kewe mwän lon ar famili me än semer cho
39seni ier ilik feitä tori ier lime, ir ätekewe mi fich ngeni ewe angang lon ewe imwenfel seni mangaku.
40Iteiter lon ar kewe famili ükükün ruungeröü wonopükü ilik mwän.
41Iei iteiten nöün Kerson kewe mwän lon ar kewe famili mi angang lon ewe imwenfel seni mangaku. Ir ätekewe Moses me Aaron ra aleaniir fän än ewe Samol mi Lapalap allük.
42Iwe, iei iteiten nöün Merari kewe mwän lon ar kewe famili me än semer cho
43seni ier ilik feitä tori ier lime, ir ätekewe mi fich ngeni ewe angang lon ewe imwenfel seni mangaku.
44Iteiter lon ar kewe famili ükükün ülüngeröü ruopükü mwän.
45Iei iteiten nöün Merari kewe mwän lon ar kewe famili Moses me Aaron ra aleaniir fän än ewe Samol mi Lapalap allük ngeni Moses.
46Iei usun Moses, Aaron me ekewe souemwenin chon Israel ra aleani chon ewe ainangen Lefi lon ar kewe famili me än semer cho
47seni ier ilik feitä tori ier lime, ir ätekewe mi fich ngeni ewe angang lon ewe imwenfel seni mangaku me ewe angangen keki pisekin meinisin.
48Iteiten chokewe mi alea ükükün walungeröü limepükü walik mwän.
49Iwe, fän än ewe Samol mi Lapalap allük ngeni Moses eman me eman a angei wisan fän iten an angang ika wosan. Iei usun Moses a föri meinisin mine ewe Samol mi Lapalap a allük ngeni.
