2Tinamang Balaam din Israelita ay natopotopog din kampon di esa ya esa ay tribu. Siya et di, sin-gep din Ispiriton Diyos sisya
3yan kanana ay nan-ipadto, “Siya na di ipadton Balaam ay anak Beor ay nalawag di pangila na
4ya makadnge sin ibagbagan Diyos. Adiak naseyep yan inilak di kaman iitaw ay inpailan Diyos ay Manakabalin Am-in. Siya na di inilak:
5Mapmapteng din tolda ay panbebbeeyan di Israelita.
6Maiarig das annawa ay kakakkaiwan ay palma ya garden sin benget di ginawang. Kaman da aben manseng-ew ay kaiw ay makwani en aloe ay inmolan Diyos ya kaman dan nakayang ay sidro sin benget di danom.
7Mansobsobran to di danom da, isonga masibsibogan ay kosto din imola da. Nangatngaton to din ari da mo si Agag ya maidayaw din panturayana.”
15Idi makdeng di, inpadto na abe na, “Siya na di ipadton Balaam ay anak Beor ay nalawag di pangila na
16ya makadnge sin ibagbagan Diyos ay Kangatoan ya nakaawat sin inpaammo na. Waday inpailan Diyos ay Manakabalin Amin idi binmabaktadak, ngem adiak naseyep.
17Il-ilaek din mapasamak ed Israel sin tapin di agew. Wadan to di ari ay bomala ed Israel ay kaman talaw ono bolalakaw di koniniing na. Abakena din sosoldadon di Moab ya am-in ay an-ak Set.”
