1Ɓalaame pɛtɛni ga nɛɛʋɛ Ɠɔoɠɔ GALAGI ʋɛ ga tuyai loo Izelayɛle ʋɛ, é la mɔ ɠɛni liini kulakɛlɛma ɠili gaiziɛzu, eɠɛ pelegi é ɠɛni kɛɛzu la zɔɔma ziɛgiti su, kɛlɛ é ɠaazu latini teʋebai letema ʋelei.
2É ɠaazuwuzeɠeni, é Izelayɛle ɠa ʋuuni, eɠɛʋelei ná-bolodaiti ti la. Názu ɠa GALA Zɛnvui yeini la tɔun ma.
3Ɓalaame faalaalii nii laazeelini, é ɠɛ ma: «Ɓeyɔɔl ná-doun zunui Ɓalaame ná-keela wooi ɠaa, zunui nii gaazuzeɠeai ma, ná-keela wooi ɠaa,
4nui nii é GALA gooiti mɛnisu, naa ná-keela wooi ɠaa, é Zɛbɛi-Pɛ-Maliɠii ná-kulakɛlɛmai ɠaazu, siɛgi zu é loozu la suɠili, gaazuzeɠe ma:
5Ee Zakɔɓe, ɗa-zeɠe ɠotaiti wola ʋagɛ, ta è-ɲiizuʋɛti ɓalaa, Izelayɛle!
6Ti ɗa yei ga zuviega eɠɛ laasamagiti, eɠɛ kpeleiti, ti ziɛ ɠobaʋɛ, eɠɛ alɔwɛ gului, Maliɠii siingai, eɠɛ sɛdele gului, ti ziɛlaʋɛ.
7Ziɛi ɠa yeizu, é ɗa ɠula seizuʋɛ, ziɛ mɔinmɔingiti ta ná-ani zuwuiti fae. Ná-masagi ɠa zobogi zɔlɔɔ Agage ma, ná-masadai zɛbɛi ɠa wɔɔlɔ.
8GALA ge kulaʋɛ Ezipete yooi ʋa, teɠui zɛbɛi ɠɛɠalai ɠa é zea, toɠa zobo sɔlɔɔ ziiti ma, ti ga sili nuiti, é ti-ma ɠaeiti golowolo, é ti zɔ ga ná-mɛɛinti.
9Toɠa ɓili, é ʋɛɛ eɠɛ zala zinɛi, eɠɛʋelei zala zaai la, ɓɛ ɠa a kata ga é wuzeɠe? Nui nii a tuya loo è ʋɛ, tuya ɠa naa ʋɛ, nui nii a è voovo, foovooi ɠa naa zo.»
10Ɓalake yiiɠaawanani Ɓalaame ma, é yealoɠani, é ɠɛni Ɓalaame ma: «Gè è loligɛ ga è ʋa, è sìli nuiti foovo, wɛlɛ, ná zeizu ɠɛa saʋa, è ɗa tuya loo ti ʋɛ.
11Tɛi é ɠɛa ɠana, liina ɗa-yooi zu! Gè boni ga nà faanɛɛ mɔinmɔin kɛ è ʋɛ, kɛlɛ Ɠɔoɠɔ GALAGI è ʋalagɛ faanɛɛiti sɔlɔɔ fai ma.»
12Ɓalaame Ɓalake wooɠaaʋoteni, é ɠɛ ma: «Gè ɓɔɛni ɠani keelaiti pɔ, è ti leʋeni mà:
13‹Anɛɛ ni Ɓalake ɠa ʋaazu ga walii ta zanugi, nii é ná-masa pɛlɛi laavegai, é fe zèa, gè la zooga faa nɔpɛ kɛɛzu ga ma ʋagɔ, ɓaa ma ɲɔu, Ɠɔoɠɔ GALAGI ná-devei laalɔɠɔma. Nà naa nɔ wo, nii Ɠɔoɠɔ GALAGI a bo mà.›
14Niizu nà ga li nà-nuɓusɛiti pɔ. Ʋa, nà naa lɛɛzu ga ɗe, nii Izelayɛle nuɓusɛiti ti ʋaazu kɛɛzu ga ɗa-nuɓusɛiti, yeeɠɛɠalaiti su ti ʋaazu.»
15Ɓalaame faalaalii nii laazeelini, é ɠɛ ma: «Ɓeyɔɔl ná-doun zunui Ɓalaame ná-keela wooi ɠaa, zunui nii gaazuzeɠeai ma, ná-keela wooi ɠaa,
16nui nii é GALA gooiti mɛnisu, naa ná-keela wooi ɠaa, nii é Anii-Pɛ-Unda ná-faaɠwɛgiti feai zea, é Zɛbɛi-Pɛ-Maliɠii ná-kulakɛlɛmai ɠaazu, siɛgi zu é loozu la suɠili, gaazuzeɠe ma:
17Nà pɛtɛsu, kɛlɛ niizu laade dɛ, nà sumɔsu, kɛlɛ maa la dɛ ɓuɠani, ʋelela ʋelei, somideɠai ta ɠa ɠulazu Zakɔɓe mavofodai zu, masadai ma lukpɔi ɠa ɠɛ Izelayɛle zaama, nii a ɠɛ Moaɓe nuiti goizu loɠazu, toɠa Sɛte ná-doun zunuiti kpein doɠa tɔungi zu.
18Toɠa Edɔme yooi zo, é ɠɛ ga nɔnɔ, sili nuiti su, Seyiil yooi ɠa zo, Izelayɛle ɠa ná-zeeɠaaɓaai lɛ.
19Nui nii é ɠulazu Zakɔɓe mavofodai zu, naa ɠa masadai ɠɛ, toɠa naati undaaʋili, niiti ti ʋelazu, ti ɠula taaiti ba.»
20Ɓalaame Amalɛke ɠaani. É faalaalii nii laazeelini, é ɠɛ ma: «Amalɛke ɠa é ga ziiti pɛ ti-ma mɔungi. Kɛlɛ gaaɓelasu, toɠa ɠoloɠolosu.»
21É Ken nuiti kaani. É faalaalii nii laazeelini, é ɠɛ ma: «È-zeizuʋɛ logɛ kpe, è-laɠagi logɛ fasa ɠizei ma.
22Kɛlɛ Ken nuiti ta ɠɛ ga abui laamianigi. Gaaɓelasu, Asuul nuiti ta li ga woye, ti wo ɠɛ ga kasoɠa nuiti.»
23Gaaɓelasu, é faalaalii nii laazeelini, é ɠɛ ma: «Ee, maanɔɠɔi nii é ʋaazu! Ɓɛ ɠa a yɛ vulua GALA ná-kɛɛwotii luɠɔ?
24Kɛlɛ keingiti ti ziɛi ɠa, ti ʋaazu, ti zeɠe Kitime, ta Asuul nuiti maanɔɠɔ, ti Eɓɛɛl nuiti maanɔɠɔ. Tɔ ɓalaa toɠa liizu undaaʋiligi zu.»
25Ɓalaame liini, é ɠale ma ná-zooi zu. Ɓalake ɓalaagi liini ga ʋɔ pelei.
