1Nelía niquicnelía TOTECO pampa yaya nechtlacaquilía quema nimotlatlajtía huan nechnanquilía.
2Huan pampa mohuijtzoma huan nechnanquilía, nimotlatlajtis ica ya nochi tonali quema niyoltos.
3Nechyahualojtoya miquilistli. Nijmachiliyaya quen niitztosquía ipan ostotl, pampa nechajsic miyac cuesoli huan tequipacholi.
4Huajca nijtzajtzili TOTECO huan niquilhui: “TOTECO, techmanahui.”
5¡TOTECO nelía cuali iyolo! ¡Yaya senquistoc xitlahuac! ¡Toteco tlahuel tetlasojtla!
6TOTECO quinmocuitlahuía catli moechcapanohuaj huan itztoque quen coneme. Na ya nimictinemiyaya huan yaya nechmanahui.
7Ama huelis nimosiyajquetzas pampa TOTECO nechchihuilijtoc catli cuali.
8Nechmanahuijtoc imaco miquilistli, quihuatztoc noixayo huan nechpalehuijtoc para ma amo nihuetzi ipan tlajtlacoli.
9Ipan ni tlaltipactli campa itztoque masehualme, nimonejnemiltis xitlahuac iixpa TOTECO.
10Na nijneltocayaya Toteco huajca niquijto: “Nitlaijiyohuía miyac, Toteco.”
11Huan quema ayacmo nijmatiyaya tlaque nijchihuas, niquijto: “Nochi masehualme san istlacatij.”
12Huan ama ya niitztoc cuali. ¿Quenicatza huelis nijtlaxtlahuis TOTECO por nochi catli nechchihuilijtoc?
13Nijhualiquilis xocomecatl iayo quen se tlacajcahualistli, huan nijhueyimatis TOTECO pampa nechmaquixtijtoc.
14Tlamiyacapa nijhualiquilis TOTECO nopa tlacajcahualistli catli nijtlajtolcahuili nijmacas.
15TOTECO quiita para tlahuel ipati ininnemilis imasehualhua catli quinicnelía, huan amo quincahuilía miquise san quej hueli.
16TOTECO, na nimotequipanojca, quena, niicone se nonana catli nojquiya mitztequipano. Huan techmanahuijtoc tlen campa niilpitoya.
17Nimitzpaquilismacas huan nimitztlascamatis huan ta tiquitas quen elisquía se tlacajcahualistli.
18Tlamiyacapa nijhualiquilis TOTECO nopa tlacajcahualistli catli nijtlajtolcahuili nijmacas.
19Quena, nijmacas TOTECO nopona ipan icalixpa ichaj catli eltoc ipan altepetl Jerusalén. ¡Paquilistli!
