1I̱na Anduane Homogohondo bi larugo ibugua hale halu biaga kagonaga i̱na ibuhondo gubalini ho kogoni. I̱na ibuhondo bi larogo haleore haga ka.
2I̱na ibu olarongi ta nabi haleore halu biaga ka. Ibu ani biagagodago i̱ dére emabu kongi ibu olaho wiaabo holebero.
3I̱ homoleneore gi biyagome mo dombe wia hayagola dombeneha haru. Homaliha horo heago hondowa homali hondowabi gi ogonibi dege biyagola haru. Miniha gi dege dindiho mini tumutumu bu ho wiru.
4I̱ aniore howa nde i̱na Anduane Homogo olalu, Anduane Homogo-o homaore bidogo gi mia, lalu olaru.
5Anduane Homogo ibugua i̱na dara nahabehego dara howa biamogo biagabi bayaore bigi biagabi ka. Inanaga Ngode Datagaliwabe ibu wali agali dara hagaore kagoni.
6Wali agali ko hongo nahe paipai biadai bibe nahe karu Anduane Homogo ibugua ti biamogo biaga ka. I̱ homolene wiagoria hewaria ibugua i̱ gi miya.
7Ai i̱ de dege dindiho naholebero. Miniha dungulo dai buwa bu ibira ho holebero. Anduane Homogohanda i̱hondo bayaore biyago manda bialu ani holebero.
8Anduane Homogohanda i̱ homolene wiagoria hewaria gi mialu i̱naga de iba domaya. I̱ pilole hewaria ibugua i̱ gini yani ho haya.
9Ibugua ani binigome ai áyu i̱ Anduane Homogonaga deni howa wali agali maru dére karu kadagua mandagi kamagoni.
10I̱ homolene kawareore wiago hondowa aiore nde homaruda manda buwa dege i̱na Anduane Homogohondo mini mbiraore wiaaboore haru.
11Homolene giore halu wali agali bu harimaruni mbiraligomebi i̱ pele ngulenego mbira nahayuago, lalu hanguore i̱ homoleda manda buwa dege Anduane Homogohondo mini mbiraore wiaaboore haru.
12Anduane Homogohanda i̱hondo bayale dege bima ibiyagonaga i̱na ibuhondo agi muledabe.
13I̱ homoleore kaware hewaria gi miyagonaga ka̱i̱ lalu i̱na waini iba lomabu mule ibu karia hambu yalu ibulebero.
14Ibunaga wali agaliru mo mogobu biru ngagoria puwa i̱na ibuhondo mulebero lalu lowirugo miaore bulebero.
15Anduane Homogo ibugua ibunaga wali agali mbirago homaga biragola ibu miniha tandaga haore biaga ka.
16Anduane Homogo-o i̱ í̠naga biabe biahaga kogoni. I̱ ai̱yahanda í̠naga biabe biahalu bereneyadagua áyu i̱na í̠naga biabe biahalu ko. I̱ homoleore hewaria í̠na i̱ gini mialu bayale heledagoni.
17I̱na í̠hondo ka̱i̱ore lalu mbirale mbira lomabu ngialu í̠hondo bi lolebero.
18Yaruseleme í̠naga anda ngagoria anda puwa í̠naga wali agali bibahende íbu ngoai ho bedaria i̱na í̠hondo, Ngulebero, lalu lowirugo lomabu ngiaore bulebero. Anduane Homogonaga mini mo yaragaore holene nga.
