1Nži'ila' X̱anžo Dios dan' benle' chi'a, na' dan' wnnabla' Ḻe'.
2Dan' bze nage' chia', che ḻen wḻiža' Ḻe' x̱ak zoa' nbana'.
3Wžé' zedla' ni'a che yeḻa' got, na' wžeba' zoa' choa'a ḻo yi' gabíl. Wžé' zedla', na' wẕáka'ḻi'a.
4Naž bḻiža' X̱anžo Dios, na' wnnía': “X̱ana' Dios, beslá be' da' nakkza'.”
5X̱anžo Dios nake' chawe', na' ži'i ḻaže'. O', Dios chežo žeyache' ḻáže'le' žo'o.
6Žape chi'ikze X̱anžon' benne' gax̱jw ḻaže' ka'. Katen' wžé' zedla' beslé' neda'.
7Ḻe' ben choche' neda', na' na'a zoa' chawe', dan' X̱anžon' žon chawe'e neda'.
8Le', X̱ana' Dios, besló' neda' ḻo na' yeḻa' got, nich biž kweže we'a, na' nich bi chejchégoa'a.
9Gona' da' ye' X̱anžo Dios neda' gan zej nnita' benne' ka' zej zoe' nbángake'.
10Bejḻi'a chie', na' bchaḻja' chie' ḻa'kze wẕáka'ḻi'a,
11na' ḻo yeḻa' ẕžebe chia', wnnía': “Zej nak yógo'te benne' ka' benne' wen ḻaže' ka'.”
12¿Biẕkze gak yebi'ikza' che X̱anžo Dios ni'a che yógo'te da' chawe' da' bene' chia'?
13Si'a ḻo ne'e Ḻe' yeḻa' weslá, na' wḻiža' La la'y che X̱anžo Dios.
14Na'a gona' da' ka' wchebe ḻaža'a ḻaw X̱anžon'. Gonan' ḻawgak yógo'te benne' chie' ka'.
15X̱anžo Dios ži'e wnné yoe ni'a chegak benne' chie' ka' dan' žátgake'.
16X̱ana' Dios, da' li naka' wen žin chio'. Naka' wen žin chio', na' ẕi'n no'le wen žin chio'. Le' bzoẕjo' da' bžejen neda'.
17Da' wká'n ẕena' Le' gaken ka to biado' da' gota' ḻawo' Le', na' wká'n ẕena' La la'y chio' Le', X̱ana' Dios.
18Ḻaw X̱anžo Dios gona' da' ka' bchebe ḻaža'a chie'. Gonan' ḻawgak yógo'te benne' chie' ka'.
19Gonan' ḻa' ḻi'a liž X̱anžo Dios dan' žen' ḻo yež Jerusalén. ¡Ga'n ẕen X̱anžo Dios!
