1Eꞌe madaḡano, Iesuꞌe Bana Madaḡano vuidi mebaḡa zamaḡano onamiro. Ani tahiꞌatahiꞌaꞌe viniziroteꞌe uꞌano, vuidi maḡa ririꞌe madu aro.
2Farisea azaḡaniꞌa eꞌe horonirotene aꞌe gaueꞌohe radu Iesu niro, raenaꞌa, “Ḡianoꞌi, ḡa tahiꞌatahiꞌaꞌe Bana Madaḡa goroḡa varadeꞌenaꞌa, vuidi hiriveha.”
3Aniꞌa naenaeziro, raenaꞌa, “Zaꞌe Buka Zaḡoḡa zamaḡano Davidaꞌa nagini haḡairotaꞌaꞌe meꞌodiro ga? Davidaꞌa ane ḡatiniroteꞌe azaḡa teite ogomuze hauḡadu vinize ruziro.
4Eꞌanoꞌo aniꞌe Badiꞌa ne diuḡadu dibuꞌo azaḡaniꞌa daꞌo auꞌeteꞌe dibuꞌo berediḡa ane ḡatiniroteꞌe azaḡa teite aro. Zeḡeꞌa Mose goro ḡoeꞌa varadiro.
5Zu zaꞌe Mose goro ḡoeꞌa meꞌodirohe? Ani raenaꞌa, 'Bana Madaḡano dibuꞌo azaḡaniꞌa kuru neḡao gaueꞌetaꞌaꞌe mene veꞌoḡa.'
6E ziꞌohe, kuru neḡa vitine huneꞌeteꞌe vazeḡa ḡihiꞌaḡaꞌe ꞌahi eꞌe.
7Buka Zaḡoḡao Badiꞌaꞌa raenaꞌa, 'E dibuꞌone daꞌo mene urateꞌohe, rehano zaꞌe vaze vetuḡazoga urateꞌohe.' Za ḡoeꞌa eꞌe huga ederifone, duduḡa azaḡa mazao veꞌoḡa rae mene zifo.
8Eḡe, Vaze Ubugaꞌe, Bana Madaḡa Zuhiꞌaḡa.”
9Ebu Iesuꞌa eꞌe haba modadu zeḡe nuꞌonuꞌo neḡa diuḡiro.
10Eꞌea ꞌevoꞌa rudanoga veze ꞌahoganiꞌa radiunu. Farisea azaḡaꞌe, Iesuꞌa vaze eꞌe fainine zeḡe kotao ohonihi radu, ani ḡadiniro, raenaꞌa, “Bana Madaḡano ugi azaḡa faizine idaḡahe?”
11Aniꞌa ziro, raenaꞌa, “Zae boꞌaḡano iniuꞌa mamoe tibuhugaḡeta radu Bana Madaḡano mamoeḡaniꞌa iduo uite ovoine, iduonoꞌo mae vaḡiniꞌuma.
12Vazeꞌe mamoe ufeta vitizoga zu ḡihiꞌaḡa. Eꞌanoꞌo Bana Madaḡano manoḡa haḡaeꞌeteꞌe idaḡa.”
13Ebu aniꞌa vaze eꞌe niro, raenaꞌa, “ꞌEvoꞌo einoꞌi.” Aniꞌa ꞌevoꞌa einirotene naeḡa ꞌevoꞌa teige ꞌevoꞌaḡaniꞌa manoriro.
14Rehano Farisea azaḡaniꞌa buanadu Iesu manoga ibiḡa ḡoane vaḡiro.
15Iesuꞌe Farisea azaḡaniꞌa manoga rae ḡoꞌaninutaꞌaꞌe ederirotene, eꞌe habaꞌa mode vaḡiniro. Vaze ḡuḡuvaḡaniꞌa ani hegotiro ebu aniꞌa ugi azaḡa niduꞌa faiziro.
16Rehano ani riḡa ḡoeziro, raenaꞌa, “Eꞌe iniu rae vaze ago ihozoꞌi.”
17Aꞌe peroveta vazeḡa Isaiaꞌa Badiꞌa ḡoere reiroteꞌeꞌa hudaro, raenaꞌa,
18“ꞌAhiꞌe eꞌa ohotirotaꞌaꞌe, eḡe tuḡure vazeḡa. Aniꞌe eḡe zamarone, eḡe matuꞌoniꞌeteꞌe vazeḡa. Eḡeꞌa Vinehe ane rana ohoniꞌuma, ebu aniꞌa habaꞌahabaꞌano Badiꞌa kota moneo harame fureniꞌuma.
19Aniꞌe mene rotetiꞌuma ga mene hounaiꞌuma, ebu aniꞌa ne hunio mene hounae ḡoeriꞌuma.
20Roratihi raꞌeteꞌe veḡa mene mae vaḡineꞌeteꞌe ga vidatihi raꞌeteꞌe ihure mene hudi viniꞌeteꞌe teige, aniꞌa Badiꞌa mazao fieꞌetꞌaꞌaꞌe komeꞌa raꞌeteꞌe azaḡa mene mae vaḡiziꞌuma, onamo ḡau veꞌoḡa niduꞌa mae vaḡinadu ibitoziniꞌuma.
21Ebu Badiꞌa aḡuꞌa azaḡaꞌe ani niḡano ḡabone hidiꞌuma rae reꞌuma.”
22Ebu vazeꞌa vine sauꞌaniꞌa agatoharoteꞌe vaze ꞌahoga Iesu vaḡe tutune ariro. Aniꞌe ubumaḡa kuruḡa zu mumutafa. Iesuꞌa ani fainadu aniꞌe ḡoeriro zu ehamaro.
23Vaze ḡuḡuvaḡa niduꞌa zaguzaganadu raenaꞌa, “Ahiꞌe kini Davida mariga, Keriso gaogi!”
24Rehano Farisea azaḡaniꞌa ḡoereze igirotene, raenaꞌa, “Aniꞌe vine sauꞌa zuhiꞌaḡa Belezebulo inaraḡa hina vine sauꞌasauꞌa hegoze buzeꞌohe.”
25Iesuꞌa ze nouge rae zamareꞌeteꞌe ederadu ziro, raenaꞌa, “Haba tiba zamaḡano zeḡeꞌa rovotadu utitifone, eꞌe habaꞌaꞌe aneꞌa bare ruiniꞌuma. Ebu neḡa ga ne tiba zamaḡano zeḡeꞌa rovotadu utitifone, neḡa ga ne aꞌe mene edau gigaraꞌuma.
26Eꞌanoꞌo Sataniꞌa Satani nabuga hegozine, zeḡeꞌa bare rovozadu utitiꞌuma. ꞌOugadu zeḡe habaoꞌe nougenouge edau gigaraꞌuma?
27Eḡeꞌa Belezebulo inaraḡa hina vine sauꞌa hegoze buzifone, zae tahiꞌatahiꞌaꞌe iniu inara hina vine sauꞌa hegoze buzeꞌohe? Zae tahiꞌatahiꞌaꞌe zae mazao veꞌoḡa rae reꞌuma.
28Rehano eḡeꞌa vine sauꞌaꞌe Badiꞌa Vine hina hegoze buzine, za ederoꞌi, Badiꞌaꞌa amahi zae ibitozi radiuꞌohe.
29Vazeꞌa ibite gezo inara vazeḡa ogoru teadu ani ne diuḡiꞌuma, ebu ani tohe ḡonotaꞌuma.
30Iniuꞌe eḡe mene teite reine, aniꞌe eḡe agirehiꞌeteꞌe vazeḡa. Ebu iniuꞌe Badiꞌa mazao vaze nuꞌozeꞌohe radu eḡe mene danahine, aniꞌe Badiꞌa mazaoꞌonoꞌo vaze rovozeꞌeteꞌe vazeḡa.
31E ziꞌohe, vaze sauꞌa niduꞌa ebu Badiꞌa rae sausauneꞌeteꞌe ḡoeꞌaꞌe Badiꞌaꞌa rae modiꞌuma. Rehano Vine Zaḡoḡa rae sausaunine, eꞌe sauꞌaḡaꞌe mene aḡutu modiꞌuma.
32Iniuꞌa eḡe, Vaze Ubuga agire ḡerehine sauꞌaḡa rae modiꞌuma. Rehano iniuꞌa Vine Zaḡoḡa agire ḡorenine, raha adao zu zazore moneo sauꞌaḡaꞌe mene rae modiꞌuma.
33Ire manoḡaꞌe maḡa manoḡa iniꞌuma zu ire sauꞌaꞌe maḡa sauꞌa iniꞌuma. Nagi ireḡaꞌe maḡa horonadu edereꞌohe.
34Zaꞌe Zarama mariga heuḡa! Zaꞌe sauꞌa azaḡa uꞌano, ḡoere manoḡa ꞌahoga mene raꞌohe. Naginiꞌa zamao iriꞌave radiuꞌetaꞌaꞌe hebeonoꞌo buauꞌohe.
35Vaze manoḡaꞌe zamaḡano manoḡa nuꞌonadu manoḡa fureneꞌohe, ebu sauꞌa vazeḡaꞌe zamaḡano sauꞌa nuꞌonadu sauꞌa fureneꞌohe.
36E ziꞌohe, Badiꞌa kota madaḡano vaze niduꞌa aneaneꞌa huga oꞌoꞌa ḡoeꞌaḡoeꞌa reiroteꞌe bare rae fureniꞌuma.
37Mazaḡa zaꞌe reiroteꞌe ḡoeꞌa idunaḡano, Badiꞌaꞌa zaꞌe duduga ga veꞌoḡa rae ziꞌuma.”
38Ebu Mose goro ḡoeꞌa ihozeꞌeteꞌe azaḡa zu Farisea azaḡaniꞌa Iesu vaḡe aradu niro, raenaꞌa, “Ihore vazeḡa, eme ḡaꞌa haḡai nu badeḡa haḡaeꞌeteꞌe ḡianoga urateꞌohe.”
39Iesuꞌa naenaeziro, raenaꞌa, “Sauꞌa zu Badiꞌa mazao mene hune fieꞌeteꞌe azaḡaꞌe haḡai nu badeḡa daꞌo urateꞌohe, rehano eḡeꞌa mene haḡaiꞌuma. Eꞌa ihoziꞌumaꞌe peroveta vazeḡa Iona haḡai nu badeḡa daꞌo.
40Ionaꞌe mada uḡidu zu ohere uḡidu ḡozone boro isio radiro. Eꞌe teige, eḡe, Vaze Ubuganiꞌa mada uḡidu zu ohere uḡidu raha zamaḡano radiꞌuma.
41Ibite madaḡano Nineva azaḡaꞌe Iona haramo abitadu sauꞌaonoꞌo ḡihure ḡouriro. Izidi Iona vitinoga vazeḡaꞌe eḡe, rehano zaꞌe eḡe ḡoere abitoga mene urateꞌohe ebu mene ḡihureꞌohe. Eꞌanoꞌo Badiꞌa kota madaḡano Nineva azaḡaniꞌa izidi ega zamao edanadu 'Zaꞌe veꞌoḡa' rae ziꞌuma.
42Ibite madaḡano Siba habaꞌa kini roḡaeḡaniꞌa haba faḡanonoꞌo kini Solomona ḡoere abitoga veize onairo. Izidi Solomona vitinoga vazeḡaꞌe eḡe, rehano za eḡe ḡoere abitoga mene urateꞌohe ebu mene ḡihureꞌohe. Eꞌanoꞌo Badiꞌa kota madaḡano Siba kini roḡaeḡaniꞌa izidi ega zamao edanadu 'Zaꞌe veꞌoḡa' rae ziꞌuma.
43Vine sauꞌa ꞌahoganiꞌa vaze ꞌahoga mazaꞌonoꞌo buauꞌetene, ani haba bohaꞌano ragaveꞌohe ebu ahiꞌa ohonoga radu haba ꞌahoga vaḡeꞌohe. Rehano mene horoneꞌohe.
44Ebu ani ꞌahige raꞌohe, raenaꞌa, 'E eḡeꞌa vaḡinateꞌe vazeḡa vaḡe bare onamiꞌuma.' Ani baradu vaze eꞌe horoneꞌetene, vazeḡaꞌe, neḡa huga oꞌoꞌa, deheḡa hune zu idaidane touga heuḡa.
45Ebu vine sauꞌa eꞌeꞌa onamadu vine sauꞌa niduꞌa fuꞌo ꞌaheu fare, aꞌe ufeta hune sauꞌa, zamazeꞌohe, ebu vaze eꞌe mazao diuḡe radiuꞌohe. ꞌOugadu vaze eꞌe ufeta hune sautuꞌohe, ibite mene heuḡa. Deꞌeguḡaꞌe izidi ega sauꞌa mazao fureraꞌuma.”
46Iesuꞌa ꞌize vaze ḡuḡuvaḡa ḡoreziroteꞌe zamaḡano viꞌa zu negoḡa duḡuruꞌa feuradu ani teite ḡoeroga veize enona edaro.
47Vaze ꞌahoganiꞌa Iesu ninaꞌa, “Ḡa viꞌu zu negoḡo duḡuruꞌe ḡa teite ḡoerihi radu enona edauꞌohe.”
48Aniꞌa naenaeninaꞌa, “Iniuꞌe eḡe nanu? Iniuꞌe eḡe nego duḡuru?”
49Ebu aniꞌa ane tahiꞌatahiꞌa surizadu raenaꞌa, “Eḡe nanu zu eḡe negohe duḡuruꞌe ꞌahi eꞌe.
50Iniuꞌa Badiꞌa eḡe Mama adureo urateꞌetaꞌaꞌe haḡaine, eḡe nego, eze, ebu nanu rae raꞌohe.”
