1Sambata gii mendenya, Jisasapi baanya disaipolo dupa-pipa, wita ee kaina mendenya kaita pao pituu, baanya disaipolo dupame lopo kaeyapala, wita dii kii lanyetala tambao neami.
2Dopa piaminopa, Parasai dupame kandatala Jisasa lamaiyoo, “Embanya disaipolo dupame Sambata gii dokonya, daa latae singi mana doko minilyamino kanda” leami.
3Dokopa Jisasame dokaita lamaiyoo, “Dapitimi piamo doko nyakamame pepanya itaki napiamipi? Dapitipi, akali apata kateamino dupa lopo kaeyami. Lopo kaeyapala Dapitimi Gotenya lotuu andaka kolandatala, betesa Gote opa maitae, pitisa dupame iki napenge siamo dupa nyepala, akali dupa maiyoo nea.
5Dee Sambata gii dupanya, pitisa dupame lotuu anda andake dokonya, Gotenya enombanya koeyala naeyao, kalai pingimana lao pepa pyapae singi doko, itaki napiamipi?
6Akali asa kalyamo dokome, lotuu anda andake doko ita minao kalyamona lao, nambame nyakama langilyo.
7Gotenya pii mende dapa lao pepa pyapae singi: 'Endakalimi namba kundi iki dingima mana doko, nambame auu nakaenge. Endakali yango kondo kaenge mana doko, nambame auu kaenge.' Pii dakenya tenge dupa nyakamame siamili doko, endakali tenge nakatenge dupa-kisa, tenge setala naeyamili.
8Akalinya Ikiningi dokome, Sambata gii dokonya apata isoo kalyamoakana,” Jisasame lea.
9Dokopa Jisasame ee doko yakinatala, Judamanya lotuu anda dokonya andakote pea.
10Peamopa, akali kingi yangi talyanga mende peteamo doko, Jisasame tolasakamaitamopa, Parasai dupame Jisasa kote lamana lao masetala, baa tipa pyoo, “Sambata gii dupanya endakali yaina pyapae dupa, mee jakamaipengepe, daape?” leami.
11Dopa leaminopa, Jisasame dokaita lamaiyoo, “Sambata gii mendenya, nyakamanya sipisipi mende yulinya mangatamopa, tange pao kopyoo nanyetamipi?
12Sipisipi dupa endakalimi ita minao kalyamino. Dopana, Sambata gii dokonya naimame kalai epe pyoo, endakali dupa nisepengena” lea.
13Dopa latala baame akali kingi yangi talyanga doko lamaiyoo, “Embanya kingi doko tinoka” lea. Tinokateamopa, kingi epe yangi dopaleaka jia.
14Dopa piamopa, Parasai dupame lotuu anda doko yakinatala, Jisasa pyao kumasemana latala, kamaka pao kambuiyami.
15Kambuiyamino kandatala, Jisasame yuu doko yakinatala pea. Dokopa endakali longo dupame baa watao peamino dupanya, endakali yaina pyapae dupa pitaka mee jakamaiya.
16Jisasame yaina mee jakamaiyamo dokaita, kyeto joo lamaiyoo, “Nambame dopa pyakalamona lao, mende lamaiya naeyalapape” lea.
17Dopa piamo dokome, Goteme propeta Aisaiya-kisa pii lea mende, angi paneamo doko dake:
18“Dake nambanya kalai akali, nambame baa yapao nyio doko. Baa nambanya etete mona setenge doko. Namba tange baa etete auu kaenge. Nambanya Spirit doko baa maitupa, baame nambanya mana tolatae doko, akali tata dupa pitaka panao lamaita.
19Baame kaitinisa katao, pii yanda pyoo, pii puu lao latamopa nasetami.
20Kembo maitange tambapae mende, baame etete lakanyala naeyata. Ita langa konjalanya kii lao seta mende, baame etete konjesala naeyata. Dopaka pyoo, baame endakali dupa kondo kaeyao, baanya mana tolatae dokome, koo dupa pitaka ita minata.
21Akali tata dupa pitakame, baame tanga pyoo nyala ipatana lao, malisoo katatamina” lapae silyamo.
22Gii dokopa endakali mendapuame, akali lenge monda, muumaa imambu koo paleta mende laminao, Jisasa kateasa epeami. Jisasame akali doko auu pyoo niseteamopa, baa pii lao, lenge tao pia.
23Baame piamo dupa kandatala, endakali kambu piamino dupa pitakame walu latala, “Akali dake Dapiti Yumbange dokope?” leami.
24Parasai dupame pii doko sepala lao pituu, “Baa-kisa imambu koo dupanya isingi, Belesabulu doko ipao palipya dokome, imambu koo waka dupa watao pilyamona” leami.
25Dopa leaminopa, Jisasame masiamino dupa kandatala, dokaita lamaiyoo, “Kiŋi mendenya tata doko pyaloo petala, nyakama wakale pitamino doko, pitaka koeyatami. Dee taono mendenya tangepi, akali mendenya enda wanepi, dupa wakale pyoloo petala, nyakama yangolapo pyaloo pitamino doko, nyakama saa latami.
26Dopaka pyoo, Satane tata doko pyaloo petala, nyakama wakale pitamino doko, baame aipa petala ita minatape?
27Belesabulu dokome namba pupu lapae dilyamopa, imambu koo dupa watao pingina lelyamino. Dopa lelyamino doko, nyakamanya disaipolo dupa apimi pupu lapae mailyamopa, imambu koo dupa watao pingina lelyamipi? Nyakamanya disaipolo dupameaka, nyakamame kopeta lapimi-lamona latami.
28Goteme Oli Spirit dokonya pupu lapae doko, namba ditamopa, imambu koo dupa watao pyato doko, Gotenya isingi mate doko nyakama-kisa ipao setamosa pita.
29Akali mendeme akali pupu lapae mendenya, andaka kolandatala, baanya pinju dupa pake nyalanya-tamo doko, wambao kendeme baa yaki pinya setapala nyeta.
30Endakali mende namba tata joo nakalyamo, doko nambanya yandapipi. Dee endakali mendeme namba nisoo, endakali dupa Goteme nisina lao nyoo kambu pyala naelyamo, dokome endakali dupa Gotenya isingi mate dokonya, watao pingi.
31Tenge dokonya, nambame nyakama langilyo: Goteme endakali dupanya koo pingipi, lamba lengepi, dupa pitaka kunao nepakamaita. Dopaka doko, endakali mendeme Oli Spirit doko kandao, lamba latamo doko, Goteme baanya koo doko, kunao nepakamaiya naeyata.
32Endakali mendeme Akalinya Ikiningi doko kandao, lamba latamo doko, Goteme baanya koo doko kunao nepakamaita. Dopaka doko, endakali mendeme Oli Spirit doko kandao, lamba latamo doko, Goteme baanya koo doko kunao nepakamaiya naeyatamopa, baa-kisa tanga tangapi sulu setana,” Jisasame lea.
33Jisasame dee mende lao pituu, “Ita epe dupame dii epeaka mandenge. Ita koo dupame dii koaka mandenge. Ita mendenya dii mandelyamo dupa, wambao kandatala, ita angi doko dopale-lamo lao masingima.
34Nyakama koo kanopatonya mandipae dupame, aipa petala pii epe mende latamipi? Endakalinya monanya paliu tumbilyamo dokoaka, kambunya pyakalyingi.
35Endakali mendenya monanya epe palelyamo dokoaka, kambunya pyakalyingi. Dee endakali mendenya monanya koo palelyamo dokoaka, kambunya pyakalyingi.
36Nambame nyakama dapa langilyo: Tanga Goteme mokosetamo gii dokopa, embanya pii koo lateno dutupanyaka, Goteme emba aipuma leepe lao tipa petala mokoseta.
37Emba tangenya pii dokonyaka, Goteme emba-kisa tenge mende nasilyamona lata. Daa-tamo doko, emba tangenya pii dokonyaka, Goteme tenge emba-kisa silyamona, latana” lea.
38Gii dokopa Mosesanya loo mana nyepae akalipi, Parasaipi, mendapuame Jisasa lamaiyoo, “Embame kalai pilino doko, Gote-kisa katao pilini-lamo lao kandamana, mirakolo mende pii” leami.
39Dopa leaminopa, Jisasame dokaitanya pii yanu pyakamaiyoo, “Endakali Gote yakinao, koo pingi palelyamino dupame mirakolo mende nyakama kandamana lao tee lelyaminoaka doko, nambame mirakolo mende kanjepale napyakatoo. Goteme kongali mende, propeta Jonaa-kisa piamo mendai dokoaka, nyakama kandataminopa dita.
40Wamba Jonaa doko kotaka gii tepo, kuka gii tepoaka, pisa andake mendenya ingi koko paleamoliaka pyoo, Akalinya Ikiningi doko, kotaka gii tepo, kuka gii tepoaka, malunya palita.
41Wamba Jonaa dokome yuu Ninipe tange dupa, pii panao lamaiyamopa, dokaitame sepala, mona kapilyiami. Indupa akali mende kalyamo dokome, Jonaa nyoo ana pyandao katamupa, nyakamame baanya pii doko sepala, mona kapilyala naelyamino. Tenge dokonya, Goteme endakali mokosetamo gii dokopa, endakali Ninipe tange dupame sakatatala, nyakama Parasaipi, endakali epapu pii silyamino, dupa-kisa tenge setatami.
42Wamba kuini enda Seba tange dokome, yuu londati waka pituu, Kiŋi Solomonenya masepae epe dupanya pii yandaita dupa, nyotoo lao epea. Indupa akali mende kalyamo dokome, Kiŋi Solomone nyoo ana pyandao katamupa, nyakamame baanya masepae epe dupanya, pii yandaita dupa nanyilyamino. Tenge dokonya, Goteme endakali mokosetamo gii dokopa, kuini enda Seba tange dokome, sakatatala nyakama Parasaipi, endakali epapu pii silyamino dupa-kisa, tenge setatana” lea.
43Jisasame dee mende lao pituu, “Imambu koo mendeme endakali mende yakinatala, yuu sapu dupanya katapenge panda kutingi. Kutao kaeyapala
44lao pituu, 'Nambame anda wamba yakineo dokonya, dee pilyotoo' lenge. Dopa latala baa pilyetala kandelyamopa, anda dokonya mende napaliu, auu pyoo tolasetae kalyamo kandenge.
45Dopa petae kalyamo kandatala, baa pao imambu etete koo 7-pela apata lanyepala, anda dokonya dee pilyetala katengema. Wamba akali doko kopeta kateamoaka doko, imambu koo dupa baa-kisa ipao paleaminopa, baa etete kopeta katea. Dopa piana, gii dakepa nyakama endakali etete koeyapae palelyamino dupa, mona kapilyala naeyatamino kandao doko, koeyatami iki-lamona” lea.
46Jisasame endakali kambu dupa pii lamaiyoo kateamopa, baanya endangipi, kaiminingipi dupa ipao, baa pii lamaimana lao, kamaka kateami.
47Dopa piaminopa, akali mendeme Jisasa lamaiyoo, “Embanya endangipi kaiminingipi kamaka katapala, emba pii langimana lelyaminona” lea.
48Dopa leamopa, Jisasame akali dokonya pii yanu pyakamaiyoo, “Nambanya endangi doko apipi? Nambanya kaiminingi dupa apitupape?” lea.
49Dopa latala baanya kingi kondeme, endakali baa watao epeamino dutupa laitaka petae katao, “Pii soo pilyamino datupa, nambanya endangipi kaiminingipina kanjepa.
50Nambanya Takange kaitinya katenge dokonya masingili pingima, endakali dupa nambanya kaiminingipi, pimalengepi, endangipina” lea.
