1Farisea zu Sadukea azaḡaniꞌa Iesu tuhune nuroga radu ane vaḡe onairo ebu uminiro, raenaꞌa, “Badiꞌa mazaononoꞌo haḡai nu badeḡa ihofoꞌi.”
2Aniꞌa naenaeziro, raenaꞌa, “Zaꞌe, 'Ḡorava madaꞌa kanaru zuburine, ohoḡore madaꞌa manoriꞌuma,' rae raꞌohe.
3Ebu 'Oherebau adureꞌa ḡutanoga horonine iruguꞌa ruꞌaꞌuma,' rae raꞌohe. Zaꞌe adure iraḡa horonine naginiꞌa fureraꞌuma rae edereꞌohe. U izidi madaḡano naginiꞌa fureruꞌetaꞌaꞌe hugaꞌe mene edereꞌohe.
4Sauꞌa azaḡa zu Badiꞌa mazao mene hune fieꞌeteꞌe azaḡaꞌe haḡai nu badeḡa daꞌo urateꞌohe, rehano mene ziniꞌuma. Eꞌa ziniꞌumaꞌe peroveta vazeḡa Iona haḡai nu badeḡa daꞌo.” Ebu aniꞌa zeḡe mazaonoꞌo vaḡinadu onamiro.
5Iesu tahiꞌatahiꞌaꞌe duꞌura moneafa farirotene beredi odohoga aḡutaro.
6Iesuꞌa ziro, raenaꞌa, “Tohutohoꞌi, Farisea zu Sadukea azaḡa isiti faine ḡianoꞌi.”
7ꞌOugadu ze zeḡeꞌa bare ḡoꞌaniro, raenaꞌa, “Emeꞌa beredi mene odoheha ꞌahine, ani ꞌouge raꞌohe.”
8Iesuꞌa ze nagini ḡoꞌaniroteꞌe ederirotene, ziro, raenaꞌa, “Zae Badiꞌa mazao fieꞌetaꞌaꞌe komeꞌa! Nougadu beredi nu mene odohateꞌe ḡoꞌaneꞌohe?
9Za ize mene edeḡahe? Eḡeꞌa beredi fuꞌo hina vaze 5000 ḡubuzadu ḡahaꞌaḡahaꞌaꞌe tunahu nugu nuꞌonirotaꞌaꞌe mene zamareꞌehehe?
10Zuni beredi fuꞌo ꞌaheu fare hina vaze 4000 ḡubuzadu ḡahaꞌaḡahaꞌaꞌe tunahu nugu nuꞌonirotaꞌaꞌe mene zamareꞌehehe?
11Eꞌa beredi moneo mene raꞌetaꞌaꞌe nougadu zaꞌe mene edereꞌohe? E bare ziꞌohe, Farisea zu Sadukea azaḡa isiti faine ḡianoꞌi!”
12ꞌOugadu zeꞌe ederiro, aniꞌe beredi isitiḡa moneo mene reiro, rehano Farisea zu Sadukea azaḡaniꞌa ḡuriro ihoreḡa ḡianoga veize reiro.
13Iesuꞌa Kaisaria Filipi habaꞌa onairotene, ane tahiꞌatahiꞌa ḡadiziro, raenaꞌa, “Vazeꞌa eḡe, Vaze Ubuga, iniu rae raꞌohe?”
14Zeꞌa naenaeninaꞌa, “Nuꞌe Ioane bapatizo, nuꞌe Elia raꞌohe. Nuꞌe Ieremia ga amahi peroveta vazeḡa ꞌahoga raꞌohe.”
15Ebu aniꞌa ḡadizenaꞌa, “Zaꞌa raꞌetene eꞌe iniu?”
16Simona Peteroꞌa naenaeninaꞌa, “Ḡaꞌe Keriso, ḡabone Badiꞌaḡa Ubuga.”
17Iesuꞌa naenaeninaꞌa, “Iona ubuga Simona, matuꞌoꞌi, mazaḡa vazeꞌa ḡa mazao eꞌe meme ihoꞌeha, rehano adureo eḡe Mamaꞌa ḡa ihoꞌeha.
18Ebu e ḡaꞌohe. Ḡaꞌe Petero, hugaꞌe vatava. Eḡeꞌa vatava eꞌe rana ekalesia, eḡe mazao fieꞌeteꞌe azaḡa, ohoziꞌuma, ebu rune gigiꞌaꞌe mene ḡuiziꞌuma.
19Badiꞌaꞌa ibitoziniꞌeteꞌe ibihetaḡa vavaꞌoga veize kiḡa eḡeꞌa ḡaniꞌuma. Eꞌanoꞌo ḡaꞌe nagini rahao gararine, Badiꞌa adureo zuni garariꞌuma, ebu ḡaꞌa nagini rahao ahetine, Badiꞌa adureo zuni ahetiꞌuma.”
20Ebu Iesuꞌa ḡoere riḡa ziro, raenaꞌa, “Eꞌe Keriso rae vaze ago zoꞌi!”
21Eꞌe madaḡanonoꞌo, Iesuꞌa ane rune moneo ane tahiꞌatahiꞌa ḡadahe ihoziro, raenaꞌa, “Eḡeꞌa Ierusalema onamehuniꞌuma, ebu vaze boroboro, dibuꞌo vazeḡa ḡihiꞌaḡaḡihiꞌaḡa zu Mose goro ḡoeꞌa ihozeꞌeteꞌe azaḡa mazaonoꞌo aduga ḡehaḡa hidiꞌuma. Zeꞌa uḡuhiꞌuma, rehano eꞌa mada uḡiduḡa zamaḡano bare ḡabode iḡuniꞌuma.”
22Ebu Peteroꞌa Iesu ane genaḡano zamahu onamadu roniro, raenaꞌa, “Mene, Zuhiꞌa Boro, Badiꞌaꞌa ḡae mazao ꞌouge mene fureniꞌuma!”
23Rehano aniꞌa tehadu Petero niro, raenaꞌa, “Satani, eḡe mazaonoꞌo vaḡinoꞌi! Ḡaꞌa eḡeꞌa uitoga veize ḡoereꞌohe, mazaḡa ḡaꞌe Badiꞌa ibio mene zamareꞌohe, rehano vaze ibio zamareꞌohe.”
24Ebu Iesuꞌa ane tahiꞌatahiꞌa ziro, raenaꞌa, “Iniuꞌa eḡe ḡaruna hegotihi are roꞌidene, ane ura haḡaiḡa niduꞌa modadu ane satauro odoheꞌenaꞌa, eḡe hegotoꞌi!
25Iniuꞌa ane ḡabone obone giganine, ani ḡabone tuḡutuḡu mene hidiꞌuma. Rehano iniuꞌa ane ḡabone eḡe ꞌuano modine, ḡabone tuḡutuḡu hidiꞌuma.
26Vaze ꞌahoganiꞌa haba niduꞌa madu ḡaboneḡa mae vaḡinine, nagi manoḡa hidiꞌuma? Ḡau ꞌahoga hina zu ḡabone tuḡutuḡu mouga mene idaḡa.
27Eḡe, Vaze Ubugaꞌe eḡe Mama agaḡa zamaḡano tuḡure viga teite onaiꞌuma, ebu vazeꞌa nagini haḡairoteꞌe idunaḡano aneane naeḡa ziniꞌuma.
28E hube hune ziꞌohe, izidi zae boꞌaḡano vaze nunuꞌa izema rudanogano, eḡe, Vaze Ubuganiꞌa aradu vaze ibitoziniꞌeteꞌe horoniꞌuma.
