1Oherebau uzeuze dibuꞌo azaḡa ḡihiꞌaḡaḡihiꞌaḡa zu vaze boroboroꞌa nuꞌoranadu Iesu manoga veize ḡoaniro.
2Ebu ze ani autadu Roma vazeḡa gavana, Pilato vaḡe tutune onamiro.
3Iesu revoharoteꞌe vazeḡa, Iudaꞌa Iesu rudaꞌuma reiroteꞌe ḡoeꞌa igirotene, ani haḡairoteꞌe uꞌano zamaḡaniꞌa adudaro. Eꞌanoꞌo siliva moniḡa 30 madu dibuꞌo azaḡa ḡihiꞌaḡaḡhiꞌaḡa zu vaze boroboro bare ziniro.
4Ebu raenaꞌa, “E sauꞌa oꞌoꞌa vazeḡa revohaneha ꞌahine, sauꞌa haḡaeha.” Rehano zeḡeꞌa raenaꞌa, “Aꞌe ḡaꞌa bare haḡaeha, mene emeḡe. Ḡae edeḡano haḡaoꞌi.”
5ꞌOugirotene, Iudaꞌa kuru neḡa zamaḡano moniḡa feuniro ebu onamadu ane bare bodane runiro.
6Dibuꞌo azaḡa ḡihiꞌaḡaḡihiꞌaḡaniꞌa moniḡa madu raenaꞌa, “ꞌAdiꞌe vaze manoga moniḡa ꞌahine, kuru neḡa moniḡa teite tibune tougaꞌe mene idaḡa.”
7Ze ḡoꞌaniroteꞌe enogano, eꞌe moniḡa hina ḡoḡore haḡaeꞌeteꞌe vazeḡa haba ꞌahoga hoitiro, ebu raenaꞌa, “ꞌAhao avoꞌa azaḡa guriꞌuma.”
8Eꞌanoꞌo haba eꞌe, 'Ru Habaꞌa' rae hunadu izidi zuni deꞌuge rae huneꞌohe.
9Aꞌe peroveta vazeḡa, Ieremiaꞌa ibite reiroteꞌe ḡoeꞌaniꞌa hudaro, raenaꞌa, “Zeḡeꞌa siliva moniḡa 30 meiro. Aꞌe Isaraela azaḡaniꞌa vaze eꞌe naeḡa reiro.
10Ebu Zuhiꞌa Boroꞌa ihiroteꞌe teige, zeꞌa moniḡa eꞌe hina ḡoḡore haḡaeꞌeteꞌe vazeḡa haba hoitiro.”
11Ebu Iesuꞌe Roma vazeḡa gavana, Pilato zamao edau radiro. Pilatoꞌa Iesu ḡadiniro, raenaꞌa, “Ḡaꞌe Iuda azaḡa kinihehe?” Iesuꞌa naenaeninaꞌa, “Oꞌe, ḡa hube raꞌohe.”
12Rehano dibuꞌo azaḡa ḡihiꞌaḡaḡihiꞌaḡa zu vaze boroboroꞌa ani mazao veꞌoḡa rae riḡa ḡoerirotene ani mene naenaeziro.
13Pilatoꞌa hena ḡadiniro, raenaꞌa, “Zeꞌa ḡaꞌe veꞌoḡa raꞌeteꞌe ḡoeꞌa ḡehaḡa hina ḡa agiroḡaneꞌeteꞌe mene igiꞌehehe?”
14Rehano Iesuꞌa zeḡe ḡoere riḡa ꞌahoga zu mene naenaeziro. Eꞌanoꞌo Pilatoꞌa zaguzagaro.
15Iḡine Modeꞌeteꞌe Muiḡa madaḡanoꞌe Roma azaḡa gavanaꞌa Iuda azaḡaniꞌa umideꞌeteꞌe idunaḡano ḡuꞌa neḡa vazeḡa ꞌahoga tuḡune bunido.
16Eꞌe madaḡano ḡuꞌa neḡano vaze ꞌahoga, niḡa Barabasiꞌa radiunu. Aniꞌe niḡa boro.
17Vaze ḡuḡuvaḡaniꞌa nuꞌorarotene, Pilatoꞌa ḡadiziro, raenaꞌa, “Za uraꞌe iniu tuḡune buniꞌuma, Baraba ga Keriso raeꞌeteꞌe vazeḡa, Iesu?”
18Mazaḡa Pilatoꞌe, zeꞌa Iesu ahiꞌahiniroteꞌe uꞌano, ane evorao Iesu riꞌiniroteꞌe edeḡa.
19Ebu Pilatoꞌa kota habaꞌano ehorinuteꞌe zamaḡano, inuganiꞌa ani veize ḡoere tuḡuriro, raenaꞌa, “Vaze eꞌe mazao ḡau ꞌahoga ago haḡaoꞌi. Aniꞌe sauꞌaḡa oꞌoꞌa. Eꞌe ohoḡore ohere ani iḡunanadu zamaheꞌa adudaneha.”
20Rehano Barabasiꞌe tuḡune bunadu Iesuꞌe manoga veize, dibuꞌo azaḡa ḡihiꞌaḡaḡihiꞌaḡa zu vaze boroboroꞌa vaze ḡuḡuvaḡa tuḡutuḡuziro.
21Pilatoꞌa bare ḡadiziro, raenaꞌa, “Vaze ꞌaheu zamaḡano, za uraꞌe eꞌa iniu tuḡune buniꞌuma?” Ze ninaꞌa, “Barabasi!”
22Ebu Pilatoꞌa ḡadizenaꞌa, “Hena Keriso raeꞌeteꞌe vazeḡa, Iesuꞌe nougiꞌuma?” Zeḡe niduꞌa raenaꞌa, “Satauronoꞌi!”
23Pilatoꞌa ḡadizenaꞌa, “Nougaꞌahi? Ani nagini sauꞌa haḡaeha?” Rehano zeḡeꞌa bare bare hounaꞌe huauꞌenaꞌa, “Satauronoꞌi!”
24Pilatoꞌe zeḡeꞌa ani ḡoere mene igiꞌuma rae ederiro. Ebu vaze ḡuḡuvaḡaniꞌa ufeta maḡune haraeteꞌe horonirotene, vaze ḡuḡuvaḡa ubumao vu tahiḡa madu ꞌevoꞌa vuzuꞌiro. Ebu zinaꞌa, “E ꞌevorehe vuzuꞌeha, eꞌanoꞌo vaze ahaꞌa rudaune eḡe sauꞌaꞌe oꞌoꞌa reꞌuma. Zae daꞌo eꞌe naeḡa moꞌi.”
25ꞌOugadu vaze niduꞌa naenaeninaꞌa, “Ani rudaune, eꞌe naeḡaꞌe emeḡe zu mariḡafeꞌa meꞌuma!”
26Ebu ani zeḡe veize Barabasi ḡuꞌanonoꞌo mae buniro. Rehano Iesuꞌe uti azaḡa tuḡuzadu masine sausauniro ebu ani satauronoga veize zeḡe ꞌevora riꞌiniro.
27Gavana uti azaḡa nuꞌa Iesuꞌe gavana ne zamaḡa tutune onamiro ebu uti azaḡa niduꞌa huze nuꞌoziro.
28Ebu ze dabuaḡa fuhiꞌohanadu dabua kanaḡa duhuḡa hune vidanoharo.
29Ebu hena ire ezaga meigameiga ḡurunadu vadinigano redoharo zu Gubu somoriḡa edaꞌe evoꞌano obonoharo. Ebu obena hina ani mazao ḡuḡureꞌenaꞌa ḡirihoraro, raenaꞌa, “Nigunihi, Iuda azaḡa kini!”
30Ebu soꞌabidevaniro zu somori eꞌe bare madu vadigano mau radiro.
31Ḡirihohau hauḡirotene, vidanoharoteꞌe dabuaḡa fuiꞌadu ane dabua bare vidoharo. Ebu satauronoga radu tutune onamiro.
32Uti azaḡaniꞌa Iesu tutune onamiroteꞌe zamaḡano, Kurene vazeḡa ꞌahoga, niḡa Simona, aniꞌe ane habaonoꞌo onaeꞌenogano hidiro. Zeꞌa ani obone teadu Iesu satauro mae heratoharo.
33Ebu ze Gorogota rae huneꞌeteꞌe habaꞌa onamiro. Gorogota hugaꞌe 'Vadini Isiga'.
34Eꞌe habaꞌano feurirotene, ze vaini vuḡa ḡau ꞌahoga ḡiḡiꞌa bagaḡa teite mirunadu gagoharo. Rehano tuhune nuradu ani gagoga mene uratiro.
35Ze Iesu satauroniroteꞌe ḡarugano, kaḡusi arahoḡa arahadu zeḡe boꞌaḡano dabuaḡa ḡahugotitiro.
36Ebu eꞌea ze ehoradu Iesu taufe radiro
37Iesu satauro hitagano, aniꞌa nagi haḡai sauꞌa haḡairoteꞌe ihozifine, 'Adiꞌe Iesu, Iuda Azaḡa Kini' rae mirihiro.
38Ebu ḡonore azaḡa ꞌaheu zuni ani teite idaḡa satauroziro. ꞌAhogaꞌe ane edaꞌe moneo zu ꞌahogaꞌe ane kauri moneo ikokoziro.
39Ebu uhiḡano vitau onamiroteꞌe azaḡaniꞌa, vadinize miruneꞌenaꞌa, Iesu rae sausauniro, raenaꞌa,
40“Ḡaꞌe kuru neḡa fahadu mada uḡidu zamaḡano bare ohoniꞌuma reiro. Ḡa Badiꞌa Ubuga roꞌidene satauroꞌonoꞌo buanadu ḡae bare ḡaboꞌoꞌi!”
41Ebu dibuꞌo azaḡa ḡihiꞌaḡaḡihiꞌaḡa, Mose goro ḡoeꞌa ihozeꞌeteꞌe azaḡa zu vaze boroboroꞌa zuni ḡirihoharo.
42Ze raenaꞌa, “Aniꞌa vaze ḡabozinu, rehano aneꞌa ane bare mene ḡaboneꞌohe! Aniꞌe Iuda azaḡa kini raꞌohe. Eꞌanoꞌo izidi hune satauronoꞌo bua ovaine eme ani mazao fiꞌuma!
43Aniꞌe Badiꞌa mazao fieꞌohe. Eꞌanoꞌo Badiꞌaꞌe uratine, izidi ani ḡabonifo, mazaḡa ani raenaꞌa, 'E Badiꞌa Ubuga,' rae reiro.”
44Ebu ḡonore azaḡa ꞌaheu ani teite idaḡa satauroziroteꞌeꞌa zuni ani ḡirihoharo.
45Madai kirikiri meirotene, haba niduꞌa uzaboꞌa ꞌuiro onamo ḡorava mone mada uḡidu.
46Ḡorava madaḡa uḡidu meirotene, Iesuꞌa ḡihau huaro, raena, “Eli, Eli, lama sabatani?” Ḡoere eꞌe huganiꞌe, 'Eḡe Badiꞌa, eḡe Badiꞌa, ḡa nougadu ḡiahe modeha?'
47Deꞌea edau radiroteꞌe azaḡa nuꞌa ḡoere eꞌe egadu ze raenaꞌa, “Ani peroveta vazeḡa Elia huneꞌohe.”
48Ebu ze boꞌaḡano ꞌahoganiꞌa duradu vu romane zouneꞌeteꞌe ḡauḡa meiro. Ebu vaini vuḡa ḡiḡiꞌa iriꞌavonadu Iesuꞌa gagoga veize Gubu somoriḡa rana teadu ite haro.
49Rehano vaze nuꞌa raenaꞌa, “Ago, ḡezo! Eliaꞌa ovaadu ḡaboniꞌuma ga mene ḡianihi.”
50Ebu Iesuꞌa bare ḡihau huanadu iriga riꞌiro.
51Eꞌe madaḡano kuru neḡano zaḡoḡa hune habaꞌa ueꞌeteꞌe dabuaḡaniꞌa hitaganonoꞌo ꞌuꞌuḡa zigau ꞌaꞌadaro. Ebu rahaꞌa hagariro zu vatavaꞌa ꞌaꞌadu bohatu ḡouriro.
52Ebu rune iduḡa ꞌaꞌadaro zu Badiꞌa moneo azaḡa ḡehaḡa ahirizeꞌa ḡabode iḡune ḡouriro.
53Ebu ze rune iduḡa habaꞌanonoꞌo iḡuniro. Iesuꞌa ḡabode iḡuniroteꞌe enogano, ze Ierusalema onamadu deꞌea vaze ḡehaḡa mazao fureraro.
54Roma uti azaḡa ḡihiꞌaḡa zu ane uti azaḡa Iesu taufe radirotaꞌaꞌe rahaꞌa hagariroteꞌe zu naginiꞌa deꞌea fureraroteꞌe horonirotene, ze rihau rudaro, ebu raenaꞌa, “Hube hune vaze adiꞌe Badiꞌa Ubuga!”
55Deꞌea roḡae ḡehaḡa zuni faḡanonoꞌo ehamu radiro. Zeꞌe Iesu dananoga veize Galilea habaꞌanonoꞌo ani hegotiro.
56Zeḡe boꞌaḡano Magadala roḡaeḡa Maria ebu Iakobo zu Iosefa vize Maria ebu Zebedeo ubuga, Iakobo zu Ioane, zeḡe vizeꞌa radiro.
57Ḡorava mone madaꞌa zuburirotene, maꞌora vazeḡa niḡa Iosefaꞌa ariro. Aniꞌe Arimatea habaꞌa vazeḡa zu Iesu tahiꞌa ꞌahoga.
58Ani Iesu ahiri guroga veize Filato umini onamiro. Uminirotene, Filatoꞌa uti azaḡa zeadu Iesu ahiri ani evora riꞌiniro.
59Ebu Iosefaꞌa Iesu ahiri maadu dabua iziga uruḡa hina umiro,
60ebu Iosefa ane rune iduḡa iziga, vatava huꞌiroteꞌe zamaḡano Iesu ahiri tiro. Ebu hadi boro hina ibihetaḡa kiune ꞌuadu mode onamiro.
61U Magadala roḡaeḡa Maria zu Maria ꞌahogaꞌe idu moneḡano ehoradu murire radiro.
62Irarirotene, aꞌe Bana Madaḡa. Dibuꞌo azaḡa ḡihiꞌaḡaḡihiꞌaḡa zu Farisea azaḡaniꞌa Filato vaḡe onamiro.
63Ebu Filato niro, raenaꞌa, “Vaze boro, ḡuriro vazeḡa aꞌaꞌe ani ize ḡaboga zamaḡano reiroteꞌe ḡoeꞌa emeꞌa zamare radiuꞌohe. Ani raenaꞌa, 'E mada uḡiduḡano runeonoꞌo bare ḡabode iḡuniꞌuma.'
64Eꞌanoꞌo mada uḡidu zamaḡano uti azaḡaniꞌa ani idu faine taufoga veize eme umiꞌeꞌohe. Mene ꞌougine, ane tahiꞌatahiꞌaꞌa aradu ani ahiri ḡonotaꞌuma, ebu vazevaze zinaꞌa, 'Ani runeonoꞌo bare iḡuneha,' rae reꞌuma. ꞌOugine zeꞌa vaze ufeta soꞌoziꞌuma. Aꞌe ibite soꞌozirotaꞌaꞌe vitiniꞌuma.”
65Ebu Filatoꞌa naenaeziro, raenaꞌa, “Uti azaḡa nu madu idu faine taufe radoꞌi.”
66ꞌOugirotene ze uti azaḡa teite onamadu idu ibiheta hadiḡa faifaine hararo ebu vazeꞌa mene vavaꞌifine gudune ꞌahoga tiro. Ebu uti azaḡaniꞌa idu taufe radiro.
