1Ano, udu bolo len ari ta amunyau, Jises hawe oro lau tan adek bolo bilin ari ta wit. Oro lau tan amak son, ya oro abwe-eh buwa iri wit, ma oro aimon.
2Iri lau Parasi atou lakou nane doh, ma iri abolosen i ta Jises buku doh, “Hei, ou anuhun! Oro lau tam abwe-eh buwa wit na len ta amunyau. Kandriyen doh ndrabun handru ta amekes na len ta amunyau.”
3Jises asumon iri i buku doh, “Buku sah handru ya ado abolosen eme tek ma hawe oro lau tek? Sebwe ado babudon bamwenen ta kundruh ta lakou mene kabin Debit mesekei bwena bwe nadeh? Jo asehek ta lakou kala Debit hawe oro lau tan mene amak son.
4Ya, iy ili bolo asiu ta Kindrei, ya kuhi jabi ramen nane iri pris ndraleheyaniy ndrala ta mada Kindrei, in bolo bosoh ndrabun handru doh. Ehe, Debit hawe oro lau tan aniy, arile jabi ramen doh ndrabun handru ta oro aimon. Iri pris le winiyan ta aimon.
5Ya, sebwe aha banyolom sahou ereu bolo batanau malen bwe nadeh? Anya iri pris badeh kabo gok bolo asiu tinan ta Kindrei na len ta amunyau, idoh iri ba-en hamon ta sahou na len ta amunyau bwe, arile idoh kandriyen ndra-in bwe.
6Arile, jo tiye tado, ndramak ari in dah, iy sakalawi ja asiu tinan ta Kindrei, ma kandriyen ta len ta amunyau ale.
7Sahou ta Kindrei ereu bolo buk ndrabun anya, ‘Jo baso-ok salom laleyah aha amekes eme tek bwe, arile jo aso-ok handru aha kamekes kandriyen ta tikisiy ki ta ndramak ari ja.’ Buku none aha tana aha kati sahou ta Kindrei doh, sebwe aha winiyan babolosen, ma bamekes sahou ndra-in bala bada ari ndramak iy kandriyen ndra-in badan bwe. Arile bwe, aha tanan kati sahou dah handru bwe.
8Jo asehek tado, oro lau tek badeh, babwidi ari kandriyen ndra-in bwe, tasah jo Nadu Ndramak Awas, ya jo tama len ta amunyau.”
9Ano Jises ruwani kon nane, ma iy ili bolo asiu ari tiri ta atukum.
10Ya in bolo asiu ta atukum nane iy ndruni ndramak ari minen raka ndramak. Iri lau ra-on anya kadeu Jises kili ta mada sahou, eme ya oro ndremenyani iy i buku doh, “Taha winiyan amekes iri lau abo sik amwenen na len ta amunyau, deh bwe?”
11Jises ndremenya oro anya, “Ya ki buku none ari tado tan ari sipsip, ya sipsip nane kataku ki bolo lek na len ta amunyau. Ado tana ado, sebwe ndramak nane winiyan tawi sipsip, ma aluwi iy eme loken nadeh? Handru, iy ibo gok na len ta amunyau, tasah buku none iy bamekes bwe, sipsip doh kameh imek, neh?
12Ya ado kanuhun! Iri lau mwan ma badih badeh, sakalawi sipsip ja. Eme ya, mwasin ta aha kamekes kandriyen mwasin, ma kaseben iri lau abo sik na len ta amunyau.”
13Iy tiye toro ano, iy tubuni iy ma iy tiye i ta ndramak nane minen ndra-in, iy anya, “Minem kales!” Nawin bwe ndramak nane minen ales, ma minen amwenen buku le minen raka mwasin nane.
14Jises bwidi buku doh, ma iri Parasi ruwani asiu ta atukum, ma iri asehek ma atilik nyala iri ta takaleh san ta kadai Jises kimek.
15Kala doh Jises i tanan budon tiri Parasi ta oro anya kamekes saba lakou i tan, eme iy ruwani kon tinan nane doh, ma iy edek iu ili. Iri lau mwan ma badih solo-an an hamon tan, eme ma iy mesekei iri mari amwenen ta sik tiri.
16Eme Jises batanau iri ta iri sasehek nyaran sala ta ndramak ari ja, ma sasehek nyala gok iy ndramesekei ta aseben iri.
17Iy mesekei lakou doh in hamon ta sahou randra Kindrei mene tiye ta propet nyaran Aisaya. Iy mene torowenei i buku doh,
18“Iy ndramak dah, ta amekes gok tek handru. Jo aso-ok iy handru, ndrinek badeh, sekesek tan handru. Jo kameh atehei Malawik Mwasin i la-un, ya iy kameh asehek nyala gok tek mwasin ta jo kameh akohok iri lau mari badu kon munyak dah ame hamon.
19Iy winiyan babolosen ma barah laleyah bwe. Iri lau mwan ma badih winiyan banuhun iy asehek sahou laleyah ereu madasan, ma ereu mada baen bwe.
20Bale banap badeh, boto-on bwe, ma anya kibok, iy winiyan batubwaniy bwe, ma iy winiyan basemete-ei sun ale banya bamwenen bwe. Iy kameh ibo gok udu le winiya le iy mesekei iri lau mari atana iri gok jo amekes ta akohok iri ame hamon.
21Ya iri lau mwan ma badih badu boho kamen tiri Isra-el bwe, kameh atehei budon i tan, ma iri kameh abe-en iy akohok iri ame hamon.”
22Kala doh oro lau ra-on kuhi ndramak ari malawin ndra-in udu la-un. Oro kuhi iy eme hawe Jises. Ndramak doh nane iy madan bwe, ma bohon bwe ale. Eme Jises mesekei iy amwenen, ma iy anyolom na madan ma asehek sahou na bohon ja.
23Iri lau mari boho iri asak, ma iri anya, “Sebwe ndramak kede-eh nadu tubu kabin Debit ale taha abe-en iy ta eme kede-eh nadeh?”
24Arile, oro Parasi anuhun iri lau nane asehek sahou i buku doh, ma oro anya, “Bwe, iy ndramak nane Krais bwe, iy ndramak nane atikah malawin ndra-in ereu la-u ndramak nane iu badeh, na boto-on ta Belsabul, tinan tiri balik.”
25Arile Jises ndrandrei budon toro, ndra-in i tan, eme iy asehek i toro i buku doh, “Buku none iri lau badu kon munyak tinan kapou iri ranah i len, ma ranah i len, ma iri amekes bahun, iri lau badu kon doh kameh andra-i. Ya buku none iri lau badu kon rakon, deh badu boho kamen ra-em aseker, ma amekes bahun, iri lau doh winiyan bales boto-on bwe.
26Ya ki buku oro lau ta Satan katikah Satan, ma oro lau tan kapou oro ki lumuk, ya ki buku sah handru iy tan boto-on ta atondrok iri lakou?
27Ya, ki buku none Belsabul aseben jo handru, ma jo katikah iri malawin ndra-in, ya are lau handru aseben iri lau taha ta atikah malawin ndra-in? Sebwe balik aseben oro nadeh? Iri gok oro lau tado amekes, leheya buku none sahou tado badeh, bamwenen bwe.
28Arile ado kanuhun, i buku none Malawin Ndrabun ta Kindrei aseben jo ta atikah iri malawin ndra-in, ado ndratana ado kabwe, Kindrei ndrame ta atondrok aha lau mwan ma badih badu Isra-el.
29“Ya buku none ari ndramak anya ki bolo asiu ta ari ndramak boto-on, ma kabahana iri lakou tan, iy kameh amekes sah handru? Ma bwena handru iy kameh sawei iy ndramak boto-on nane na malou boto-on. Ano, iy winiyan akohok iri lakou ereu asiu ta ndramak nane.
30“Ya eme are lau iy kawas tek bwe, iy ndramak ta amekes bahun eme tek. Ya are lau baseben jo ta atukum iri lau kame ka-en hamon ta Kindrei bwe, iy kameh atikah iri lau ka-en ndra len ta Kindrei.
31Eme ma ado kanuhun, ya jo kasehek tado, Kindrei kameh mani kandriyen ndra-in, ma sahou ndra-in mari lau mwan ma badih amekes. Arile are lau aluhe i bada nyara Malawin Ndrabun, Kindrei winiyan bamani kandriyen ndra-in tan doh bwe.
32Ma are lau asehek sahou ndra-in i bada Nadu Ndramak Awas, Kindrei le kameh winiyan mani kandriyen ndra-in tan. Arile, are lau amekes sahou ndra-in i bada Malawin Ndrabun, Kindrei winiyan bamani kandriyen ndra-in tan doh na len dah, deh na len eme hamon, bwe-en.”
33Jises asehek sahou ra-on ja i buku doh, “Buku none kei mwasin, buwa kei doh kameh mwasin ale. Arile, buku none kei doh ndra-in, buwa kei doh ndra-in ale. Lau kanyolom buwa kei mwena, hamon iri barala tana iri buku kei doh mwasin deh bwe.
34Idoh buku le aha Parasi. Aha lau buku le mwak ndra-in, ya aha winiyan bamekes sahou mwasin na boho aha bwe. Tasah, boho ndramak badeh, asehek iri budon solo-an ale idih ereu bolo ndrinen amwenen.
35Buku none ndramak mwasin ma budon mwasin solo-an idih ereu ndrinen, idon adeh, iy ale amekes kandriyen mwasin ale. Iri lau ndra-in, tiri budon ndra-in solo-an ereu ndrine iri, ma iri ale amekes kandriyen ndra ndra-in le.
36Arile jo tiye tado, na len hamon Kindrei le tanan ta edeu lau ala ta mada sahou ma anuhun sahou ta lau mari, iy kameh bwetenei iri sahou ndra-in iri mene ndrasehek, iy kameh anuhun sahou mari iri asehek laleyah.
37Ehe, sahou doh handru! Tasah, Kindrei kameh aleben aha ta sahou mene aha ndrasihidiy. Ma, na idoh Kindrei kameh aloh aha lau mwasin deh lau ndra-in, kandriyen tan ndra-in udu badan.”
38Jises asehek sahou ano, eme oro lau ra-on ta leheya kandriyen tiri Juwis hawe oro Parasi ra-on asehek sahou i ta Jises i buku doh, “Ndramak ta leheya, aso aso-ok ou amekes ari kalem ta leheya eme taso, buku ou amekes gok ta Kindrei handru.”
39Arile Jises asumon i buku doh, “Iri lau mwan ma badih ta len dah badeh, iri ndra-in handru, ma iri batehei ndrine iri handru bala ta Kindrei bwe. Iri ndremenya ta anya katou kalem, arile winiyan bwai. Kalem ari le kameh iri atou, kalem ta propet Jona.
40Ehe, Jona badeh, in bolo ndrine ni tinan in gwek na taloh len ma taloh ben. Idoh ya jo Nadu Ndramak Awas ale kameh, jo kameh ereu bolo lek na taloh len ma taloh ben.
41Na len Kindrei le tanan ta edeu iri lau ala ta mada sahou, iri lau mwan ma badih badu Ninibe ale kameh ales ala ta mada sahou, ma iri kameh asehek sahou boto-on labai i taha lau ta len hamon dah. Tasah, iri lau badu Ninibe anuhun sahou Jona asehek, ma iri tubuni ndrine iri. Na idah, ndramak ari ereu ndrokowa ado dah, sakalawi ja Jona, arile ado banuhun sahou tan, ma batubuni ndrine ado bwe!
42Na len hamon ta Kindrei kameh atehei iri lau mari badu kon munyak dah ala ta mada sahou, badih tinan kabin badu kon tinan Seba, kon tan in le loboho kum, kameh ales ereu mada sahou, iy kameh asehek ma nyowonya iri kandriyen ndra-in taha lau ta len hamon dah amekes. Tasah, iy badih kabin doh ereu len labai ta Isra-el, arile iy eme ta anuhun le kabin Solomon leheya iri tanan mwasin tan. Na dah, ndramak ari ereu ndrokowa ado, iy sakalawi ja Solomon, arile ado banuhun sahou bwe, ma ado batubuniy ndrine ado bwe.”
43Jises asehek sahou ja anya, “Buku none ari ndramak tikahei malawi balik ereu la-u ari ndramak iu, malawi balik doh iu laleyah i bolo kon lomale an ta iy katakaleh ari kon ja, iy kili aliy. Arile, iy winiyan batou ari kon mwasin ta iy ili aliy bwe.
44Iy kameh asehek, ‘Jo ndrawoyah ai, sebwe jo kili hamon kili asiu tek bwena mene jo ereu aliy.’ Eme iy ili hamon anyolom asiu nane ereu laleyah, ndrasahan ha-un, ma ndranyosowani kabwe.
45Ehe, iy atou buku doh, eme iy ili hamon ja andrei oro malawi ndra-in ndro taloh ja sakalawi iy ta amekes kandriyen ndra-in. Ya oro kameh ala bolo asiu nane. Ya eme ndramak dah, bala buku bwena mene, ja bwai, iy ndrandra-i labai ai. Jo asehek tado, kandriyen buku doh kameh asahan taha lau mwan ma badih ndra-in ereu kon munyak na len dah.”
46Jises asehek sahou hawe iri lau mari nane kahis le, tinen hawe oro nadu tinen ame ales areu manan. Oro anya kasehek sahou hawen.
47Ndramak ari asehek tan anya, “Jises ei, tinem ma hawe nadu tinem oro ales ado manan, oro anya kasehek sahou hawem.”
48Jises asehek ta ndramak nane, “Ado anya tine handru, are lau bah? Ya nadu tine oro handru, lau heh bah?”
49Eme Jises nyowonya ili toro lau tan ma iy anya, “Jo asehek tado, tine ma nadu tine oro handru asah idah!
50Tasah, are lau ale in hamon ta so-ok ta tama in kon tan udu kandrah, iri badeh, nadu tine mwan ma badih handru, ma tine handru.”
