Mataio 18

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Eꞌe madaḡano Iesu tahiꞌatahiꞌaꞌa Iesu vaḡe onaadu ḡadiniro, raenaꞌa, “Badiꞌaꞌa ibitoziniꞌeteꞌe zamaḡano iniuꞌe ḡihiꞌa hune?”

²Iesuꞌa tahiꞌa komeꞌa ꞌahoga hune onaadu zeḡe boꞌaḡano mae ohoniro,

³ebu raenaꞌa, “E hube hune ziꞌohe, zaꞌa ḡihuradu tahiꞌa komeꞌa ꞌahi mene teigine, Badiꞌaꞌa za mene ibitoziniꞌuma.

⁴Iniuꞌa, tahiꞌa komeꞌa teige, aneꞌa bare mae ovoine, Badiꞌaꞌa ibitoziniꞌeteꞌe zamaḡano aniꞌe ḡihiꞌa hune rae raꞌohe.

⁵Ebu eḡe mazao fieꞌeteꞌe uꞌano tahiꞌa komeꞌa ꞌahiguḡa mae ḡihinine, aniꞌe eḡe mae ḡihiheꞌohe.

⁶Iniuꞌa, tahiꞌa komeꞌa ꞌahiguḡa eḡe mazao fieꞌetaꞌaꞌe boꞌaḡano, tahiꞌa ꞌahogaꞌe haḡai sauꞌano tutune veꞌonine, aniꞌe hadi boro bagaḡa ꞌunuḡano autadu davara guniḡano mae feunineꞌe ufeta manoḡa.

⁷Raha ꞌadi azaḡa, fase vetuḡaḡa, aduga hidiuma, mazaḡa vaze ibi veꞌoḡano tutuzeꞌeteꞌeꞌe ḡauḡa uꞌano, sauꞌa haḡaeꞌohe. Deꞌeguḡaꞌe fureruꞌohe rehano, vaze haḡai sauꞌano tutuzeꞌeteꞌe azaḡaꞌe, fase vetuḡaḡa, aduga hidiꞌuma.

⁸ꞌEvoreḡo ga odaḡoꞌa tutuꞌe veꞌoꞌoꞌidene, variꞌe modoꞌi. ꞌEvore tibaḡota ga odaḡo tibaḡota daꞌo ḡabone tuḡutuḡu hidogaꞌe ufeta manoḡa. U ꞌevoreḡo ꞌaheu ga odaḡo ꞌaheuḡota ire roga mene hauḡeꞌeteꞌe zamaḡano mae feuꞌine ufeta aduga.

⁹Ubumaḡoꞌa tutuꞌe veꞌoꞌoꞌidene, gude modoꞌi. Ubumaḡo naeḡaḡota daꞌo ḡabone tuḡutuḡu hidogaꞌe ufeta manoḡa. U ubumaḡo ꞌaheuḡota ire roga mene hauḡeꞌeteꞌe zamaḡano mae feuꞌine ufeta aduga.

¹⁰Tahiꞌa komeꞌa ꞌahiguḡa tiba zuni gubanoꞌi. Mazaḡa, e ziꞌohe, zeḡe taufeꞌeteꞌe tuḡure vigaꞌe eḡe Mama adureo teite iḡaiḡa radiuꞌohe.

¹²Zaꞌe nouge zamareꞌohe? Vaze ꞌahoga mazao mamoeḡa 100, rehano tibaniꞌa dauḡine, ani nougiꞌuma? Aniꞌe mamoeḡa 99 maḡa habaꞌano modadu dauḡoga mamoeḡa vaḡe ragaviꞌuma.

¹³E hube hune ziꞌohe, aniꞌa mamoe tiba eꞌe vaḡe meine, mamoe 99 mene dauḡoḡa ḡauḡaꞌe vitize matuꞌe rudaꞌuma.

¹⁴Eꞌe teige, zae Moze adureo tahiꞌa komeꞌa ꞌahiguḡa tiba zu dauḡogaꞌe mene urateꞌohe.

¹⁵Ekalesia nabuḡoꞌa ḡae mazao sauꞌa haḡaoꞌidene ane vaḡe onamadu ḡanine daꞌo boꞌaḡano sauꞌaḡa ihonoꞌi. Aniꞌa egoḡanadu sauꞌaonoꞌo ḡihurine, ḡa ꞌai nabudiḡota bare tiburaneha.

¹⁶U aniꞌa mene egoḡanoꞌidene, vaze tiba ga ꞌaheu zamazadu bare onamoꞌi, mazaḡa ḡanine nagini raꞌeteꞌe vaze ꞌaheu ga uḡidu zu ederiꞌuma.

¹⁷Aniꞌa ze zu mene egozinine, ekalesia zamaḡano rae furenoꞌi. Aniꞌa ekalesia zuni mene egozenoꞌidene, aniꞌe Badiꞌa aḡuꞌa vazeḡa ga takesi vazeḡa sauꞌa teigeꞌohe rae zamaroꞌi.

¹⁸E hube hune ziꞌohe, zaꞌa nagini rahao gararine, Badiꞌa adureo zuni garariꞌuma, ebu zaꞌa nagini rahao ahetine, Badiꞌa adureo zuni ahetiꞌuma.

¹⁹E bare hube hune ziꞌohe, rahao ꞌada ḡanine zamaze tiba hina nagini umidine, eḡe Mama adureo zae veize haḡaoziniꞌuma.

²⁰Mazaḡa eḡe niḡano ꞌaheu ga uḡiduꞌa nuꞌoraune, eꞌe zeḡe boꞌaḡano radiuꞌohe.

²¹Ebu Peteroꞌa Iesu vaḡe aradu ḡadiniro, raenaꞌa, “Zuhia Boro, eḡe nabudiꞌa eḡe mazao sauꞌa haḡaine, ḡae nuḡu e ani sauꞌa rae modiꞌuma? Ḡae fuꞌo ꞌaheu fare ga?”

²²Iesuꞌa naenaeniro, raenaꞌa, “E ḡaꞌohe, mene ḡae fuꞌo ꞌaheu fare, rehano barebare rae modoꞌi!

²³Eꞌanoꞌo Badiꞌaꞌa ibitoziniꞌetaꞌaꞌe hari idaidaḡa ꞌahi heuḡa. Kini ꞌahoganiꞌa ane mazaonoꞌo moni meiroteꞌe tuḡure azaḡa huzadu ani moni bare meihi rae reiro.

²⁴Aniꞌa ꞌouge haḡairotene, moni borofe meiroteꞌe vazeḡa ꞌahoga ani vaḡe tutune ariro.

²⁵Aniꞌe moni baronoga mene idaḡa ꞌahine, kiniꞌa riḡa ḡoreniro, raenaꞌa, 'Ḡae inuḡo, ubuḡo zu ḡae mazao ḡau niduꞌa seronadu eḡe moni baronoꞌi!'

²⁶ꞌOugadu tuḡure vazeḡaniꞌa ani zamao obena hina tuḡiro, ebu raenaꞌa, 'Geno mada enoꞌi, ebu e moni niduꞌa baroniꞌuma.'

²⁷ꞌOuge reirotene, zuhiꞌaḡaniꞌa vetuḡaniro ebu moniḡa ahiḡa radu ani tuḡuniro.

²⁸Eꞌe ḡarugano tuḡure vazeḡaniꞌa ani mazaonoꞌo moni nu meiroteꞌe tuḡure vazeḡa ꞌahoga, ani teite tiburu gauꞌeteꞌe, vaḡe onamiro. Aniꞌa ani matanadu oḡorabiḡa harinoharo. Ebu raenaꞌa, 'Eḡe moni baronoꞌi!'

²⁹ꞌOugadu ane vaze tuḡure vazeḡaꞌe obena hina tuḡaro, ebu umininaꞌa, 'Geno mada enoꞌi, ebu ḡae moni baroniꞌuma!'

³⁰Rehano ani hezahiro ebu onamadu ane vazeḡa ꞌai ḡuꞌa neḡano mae ohoniro, onamo ani moni eꞌe baroniꞌuma.

³¹Tuḡure azaḡa nunuꞌa naginiꞌa fureraroteꞌe horonirotene, ze maḡune rudanadu zeḡe zuhiꞌa vaḡe onamiro. Ebu hariḡa niduꞌa ani mazao ihoniro.

³²ꞌOugadu zuhiꞌaḡaniꞌa tuḡure vazeḡa ibiꞌa ibite hunadu niro, raenaꞌa, 'Ḡaꞌe tuḡure vazeḡa sauꞌa! Ḡaꞌa umihadu ḡa eḡe mazaonoꞌo meiroteꞌe moniḡa niduꞌa ahiḡa reiro.

³³Eḡeꞌa ḡae vetuḡaḡadateꞌe teige, ḡaeꞌa zuni ḡae vaze tuḡure vazeḡa vetuꞌaḡanifo!'

³⁴Zama ḡugiꞌano zuhiꞌaḡaniꞌa ani aduga hanoga veize ḡuꞌano ohoniro, onamo ane moni niduꞌa barone hauḡiꞌuma.

³⁵Eꞌe teige, zaꞌa zae nego nabudi zamaze niduꞌa hina zeḡe sauꞌa mene rae modine, eḡe Mama adureo zuni zae mazao ꞌouge haḡaiꞌuma.”