Mataio 6

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Ḡianoꞌi, zaꞌe vazeꞌa ḡianoga veize vaze zamao haḡai manoḡa ago haḡaoꞌi, mazaḡa zae Moze adureo naeḡa mene ziniꞌuma.

²Eꞌanoꞌo ḡau ꞌahoga zahara vazeḡa haune, zama guhi azaḡa teige ago hirihiroꞌi. Zama guhi azaḡaꞌe vazeꞌa niguzoga veize nuꞌonuꞌo neḡano zu ibio haḡae fureneꞌohe. E hube hune ziꞌohe, zeꞌe naeze niduꞌa mae hauḡeha.

³Ḡau ꞌahoga zahara vazeḡa haune, zae nabudi uhiḡa vazeḡa zu ago ihonoꞌi.

⁴Vaze ꞌahoganiꞌa mene ederoga veize sifu kaḡuso hanoꞌi. ꞌOugine, Mozeꞌa zaꞌa sifu haḡateꞌe haḡaiḡa horonadu naeḡa ziniꞌuma.

⁵Zaꞌe kuranoꞌidene, zama guhi azaḡa teige ago kuranoꞌi. Mazaḡa zeꞌe vazeꞌa horozoga veize nuꞌonuꞌo neḡano zu ibi boro ḡenaḡano edauꞌenaꞌa, kuranoga urateꞌohe. E hube hune ziꞌohe, ze naeḡa niduꞌa mae hauḡiro.

⁶Zaꞌe kuranoꞌidene, bazuni habaꞌa diuḡadu ibiheta haranadu Moze, zaꞌa horonoga mene idaḡa raꞌetaꞌaꞌe, mazao kuranoꞌi. ꞌOugine, zaꞌa sifu haḡateꞌe haḡaiḡa Mozeꞌa horonadu naeḡa ziniꞌuma.

⁷Ebu za kuranoꞌidene, Badiꞌa aḡuꞌa azaḡa teige, huga oꞌoꞌa ḡoeꞌa hina ago barebare kuranoꞌi. Mazaḡa zeꞌe ḡoere ḡehaḡa hina kuraune, Badiꞌaꞌa igiꞌuma rae zamareꞌohe.

⁸Ze ago hegotoꞌi, mazaḡa Mozeꞌe zaeꞌa izima umidogano nagini urateꞌetaꞌaꞌe edeḡa.

⁹Eꞌanoꞌo ꞌahige kuranoꞌi: Emeḡe Mama adureo, eme umiꞌeꞌohe, vazeꞌa ḡae gubaꞌeꞌenaꞌa ḡa niḡoꞌe zaḡoḡa reꞌuma,

¹⁰ebu ḡaꞌa vaze niduꞌa ibitoziꞌuma, ebu adureo ḡae uraꞌa hudauꞌeteꞌe teige, raha adao zuni hudaꞌuma.

¹¹Izidi ogomuḡa rifeꞌenoꞌi,

¹²ebu emeḡeꞌa eme sausaufeꞌeteꞌe azaḡa zeḡe sauꞌa rae modeꞌeteꞌe teige, emeḡe sauꞌa zu rae modofoꞌi.

¹³Emeḡeꞌa haḡai sauꞌa haḡaihi rae reine, sauꞌano ago tutufoꞌi, ebu Sataniꞌonoꞌo mae vaḡifoꞌi.

¹⁴Zaeꞌa vaze sauꞌa rae modine, zae Moze, adureo radiuꞌeteꞌeꞌa, zae sauꞌa zuni rae modiꞌuma.

¹⁵Rehano zaeꞌa vaze sauꞌa mene rae modine, zae Mozeꞌa zuni zae sauꞌa mene rae modiꞌuma.

¹⁶Zaeꞌa zaḡozaḡoꞌidene, zama guhi azaḡa teige, ago vetuḡarau radoꞌi. Zeꞌe, vazeꞌa horozadu zeḡeꞌa zaḡozaḡeꞌeteꞌe ederoga veize, mene vireꞌohe zu iguze mene siꞌeꞌohe. E hube hune ziꞌohe, zeꞌe naeḡa niduꞌa mae hauḡiro.

¹⁷Rehano zaeꞌa zaḡozaḡoꞌidene, viradu iguze siꞌoꞌi.

¹⁸ꞌOugine, vazeꞌa zaꞌe zaḡozaḡeꞌeteꞌe mene ederiꞌuma. U zaꞌa horonoga mene idaḡa raꞌetaꞌaꞌe, Moze daꞌo ederiꞌuma. Ebu Mozeꞌa zaꞌa sifu haḡaateꞌe haḡaiḡa horonadu naeḡa ziniꞌuma.

¹⁹Zae veize raha ꞌadao ḡau manomano ago nuꞌone toꞌi. Deꞌeaꞌe zuhiꞌa sausauneꞌohe zu atenarauꞌohe ebu ḡonoreꞌa varade diuḡadu ḡonotuꞌohe.

²⁰Rehano zae veize ḡauze manomanoꞌe adureo nuꞌone toꞌi. Deꞌeaꞌ zuhiꞌa mene sausauneꞌohe zu mene atenarauꞌohe ebu ḡonoreꞌa varade diuḡadu mene ḡonotuꞌohe.

²¹Mazaḡa zaꞌa ḡauze manomano nouma tine, zamaroneze zu deꞌea tiꞌuma.

²²Zae ubumaꞌe ahirize ihureḡa heuḡa. Ubumaze manoḡa reine, zae ahiri niduꞌaꞌe agaḡaniꞌa irivaꞌiꞌuma.

²³Rehano zae ubumaꞌe sautaune, zae ahiri niduꞌaꞌe uzaboꞌa irivaꞌiꞌuma. Eꞌanoꞌo zae ahiri zamaḡano agaḡaꞌe uzaboraune, ahirize niduꞌaꞌe uzabo gigiꞌa reꞌuma!

²⁴Vazeꞌe zuhiꞌa ꞌaheu veize gauoga mene idaḡa. ꞌOugine ani ꞌahogaꞌe zamariꞌuma, u ꞌahogaꞌe heꞌeheꞌeniꞌuma. Ebu ꞌahoga veize faine gauiꞌuma, u ꞌahogaꞌe turuniꞌuma. Eꞌe teige, zaꞌe Badiꞌa ebu moni, ꞌaheu veize gauoga mene idaḡa.

²⁵Eꞌanoꞌo e ziꞌohe. Zae ḡabone veize nagi ogomu aꞌuma ga nagini gagiꞌuma ebu ahirize veize nagi dabua vidiꞌuma rae ago zamare adudanoꞌi. Mazaḡa ḡabone zu ahiriꞌe ogomu zu dabua vitinoga.

²⁶Hitanao rafiuꞌeteꞌe niniḡa ḡianoꞌi. Ze ezone mene ḡorauꞌohe, mene hiriveꞌohe, zu ogomuze godogo neḡano mene nuꞌone tiꞌohe. Rehano zae Moze, adureo radiuꞌeteꞌeꞌa, ḡubuzeꞌohe. Zaꞌe nini vitize huneꞌohe.

²⁷Zae boꞌaḡano iniuꞌe zamare adudaune, ḡaboneꞌa tahiḡa nu faraꞌumahe? Mene.

²⁸Za nougaꞌahi dabua uꞌano zamare aduduꞌohe? Butu kakaḡaꞌe nougenouge ḡuhureꞌeteꞌe ḡianoꞌi. Ze mene gaueꞌohe zu dabuaze mene turineꞌohe.

²⁹Rehano e ziꞌohe, butu kakaḡa ꞌahogaꞌe maꞌora vazeḡa kini Solomonaꞌa haḡairoteꞌe dabuaḡa manomano vitinoga.

³⁰Butu veḡaꞌe izidi ḡaboga, hena ohoḡoreꞌe vazeꞌa masinadu ireo hufi hauniꞌuma, rehano Badiꞌaꞌa faifaine manohuniꞌohe. Zaꞌe ve vitinoga ꞌahine, Badiꞌaꞌa hube hune dabua vidauziniꞌuma. Rehano zaꞌe Badiꞌa mazao fieꞌetaꞌaꞌe komeꞌa.

³¹Eꞌanoꞌo ago zamare adudanoꞌi, raenaꞌa, 'Nagini aꞌuma?', 'Nagini gagiꞌuma?' ga 'Nagi dabua vidaꞌuma?'

³²Badiꞌa aḡuꞌa azaḡaniꞌa ꞌahiguḡa niduꞌa vaḡeꞌohe. Zae Moze, adureo radiuꞌetaꞌaꞌe, zaꞌa eꞌe ḡauḡa urateꞌetaꞌaꞌe edeḡa.

³³Badiꞌaꞌa ibitoziniꞌeteꞌe zu urateꞌeteꞌe daꞌo gezo vaḡoꞌi. ꞌOugine eꞌe ḡauga niduꞌa zuni ziniꞌuma.

³⁴Eꞌanoꞌo za ohoḡore veize ago zamare adudanoꞌi. Mazaḡa ohoḡore gauḡaꞌe ohoḡoruꞌu zamariꞌuma. Izidiꞌe izidi aduga daꞌo zamariꞌuma.