1काबु नाइक्तीक नाक्त येसु नु आ शेंसीबपुकी चेरब रू ङा लां लना लन बाक्मानु, शेंसीबपुकी शोव़लु बेक्शा, चेरब बाला शोइश्शा नोक्शा जाम्तेक्म। ब्यवस्था २३:२६
2फरिसीपुकीमी मेको आन मो पशो तशा, येसु कली “कोव़ङीने, इन शेंसीबपुकीमी नाइक्तीक नाक्तीम पचा मदुम्शो गेय पाम्तेक्म” देंतेक्म। प्रस्थान २०:१०
3मिनु येसुमी मो देंब आन कली “दाऊद नु आ वारचपुकी शोव़लु बेक्मानु, मार पामे, दे परमप्रभु यावेमी ब्रेक्पाइश्शो लोव़ मपढेनी? १सामुएल २१:७
4दोपा दाऊदमी परमप्रभु यावे आ खिंमी ओव़शा, परमप्रभु यावे कली चढ़ेशो शोब्ले शोल्शा योक्शा जामे? मेको चढ़ेशो शोब्ले चढ़ेबपुकीमी ला जचा दुम्बाक्माक्त। अरु मुरपुकीमी जचा मदुम्ब बाक्माक्त। लेवी २४:९
5नाइक्तीक नाक्त चढ़ेबपुकीमी परमप्रभु यावे आ खिंमी चढ़ेनीम। मेकोपुकीमी गेय पाइनीम। मेकोपुकी चहिं दोस गेचा मपुंइसीनीम। परमप्रभु यावेमी ब्रेक्पाइश्शो एको लोव़ यो मपढेनी?
6एकेर परमप्रभु यावे आ खिं क्येङा ठेयब मुर का बाक्ब, दे इन कली देंनुङ। ।
7‘चढ़ेतीक ममाइ, शिशी पशो तचा दाक्नुङ’ देंशो परमप्रभु यावे आ लोव़ आ अर्थ रुप्तीनी हना, दोस गेचा मपुंइसीब आन कली दोस मगेनी वा। होसे ६:६; मत्ती ९:१३
8रागीमी जरमेशो चहिं नाइक्तीक नाक्त मार पचा, मार मपचा अधिकार पाइब बाक्ब” दे माइक्तीमी।
9मिनु येसु मेकेर रे लशा, मेको आन ग्रुम्तीक खिंमी जाक्दीश्शा ओव़त।
10मिनु मेकेर गुइ सोव़शो मुर का बाक्त। मेकोपुकीमी येसु कली दोस गेचा माल्शो बाक्मा बाक्त। मोपतीके “नाइक्तीक नाक्त सापाइक्तीक गेय पचा दुम्बा?” दे हिल्लो पखु पा योव़की पाम्तेक्म।
11मिनु येसुमी “सुइ इन के कांइचीक भेडा नाइक्तीक नाक्त खाल्टाम बिक्त हना, मेको कली कीशा मग्रुंइनीनी ङा? लूका १४:३-५
12भेडा का क्येङा मुर ठेयब ममाइ ङा? मोपतीके नाइक्तीक नाक्त मुर आन कली शिशी पा रिम्शो पचा इं कानुन ङा लोव़ नु गारब” दे माइक्तीमी।
13मिनु गुइ सोव़शो मुर कली “इ गुइ दिंदो” दे माइक्तु। मिनु मेकोमी गुइ दिंसेनु, ब्रा साशा, अर्को गुइ खोदेंशो दुम्त।
14मिनु फरिसीपुकीमी मेकेर रे ग्रूशा खुम्सीशा “मेको कली दोपा साइक्चा ताइनया?” दे लोव़सी पाम्तेक्म। यूहन्ना ५:१६
15मिनु येसुमी मेको आन लोव़ पशो तुइश्शा, मेकेर रे गाक्त। मिनु शुश मुरुमी आ नोले खोइक्तेक्म। मेकोपुकी रोइ पाइबपुकी यो बाक्तेक्म। मेको नेल्ल आन कली सापाइक्तीमी।
16सापाइश्शा “सुइ कली मतुइक्पाइय्यीनी” दे माइश्शा सोइक्ताक्मी। मत्ती ८:४
17मोदेंशो पा साइ नेसी परमप्रभु यावे आ लोव़ पाइब यसैयामी देंशो लोव़ थमा दुम्पाइक्तु।
18यसैयामी मार देंशो बाक्त देंशा हना “आं गेय पाइब कली कोव़ङीन। एको कली योव़ता। मिनु एको कली दाक्नुङ। एको कली तशा शुश ग्येरसीनुङ। आं सोक्तीम प्रिंशा, अर्को रागी ङा मुर आन कली दोपा ठीक दुम्चा, दे तुइक्पपाइक्ब। प्रेरित ३:१३,२६; मत्ती ३:१७
19मेकोमी जिचा मपोक्ब। शुश रेयके मपाइब। लां पित्थ आ सेंदा मनेंसीब।
20जिक्चशो किन्दा मजिक्ब, काप्चशो मी मकाप्ब। ठीक पतीकेमी मग्राम सम्म मोदेंशो पना पन बाक्त।
21अर्को रागी ङा मुरपुकीमी मेको आ नेंमी आस पा बाक्नीम” दे ब्रेक्शो बाक्ब। यसैया ४२:१-४
22मिनु मिक्च मताइब, नोफा मनेंब, मब्वाक्ब वोलम तशो मुर का चाक्तेक्म। मिनु येसुमी मेको कली सापाइक्तु। मिनु मिक्च ताप्तु, लोव़ यो पाप्तु।
23मेकेर देल्शोपुकीमी “ओहो, एकोन दाऊद आ तौ बाक्म कोर में?” देंमुम्तेक्म। मत्ती २१:९; यूहन्ना ७:४२
24फरिसीपुकीमी चहिं मेको आन देंशो नेंशा “वोल आन पिप बेल्जीबुल आ सक्तिम कका वोल आन कली ग्रुंइशा खेरबाक्माक्त” दे मिम्शा लोव़ पामे बाक्त।
25मिनु येसुमी मेको आन मिम्शा लोव़ पशो तुइश्शा, मेको आन कली “राज्य का ङा मुरपुकी जिशा ब्राशा गाक्तेक्म हना, राज्य जाम्शा लाइब। सहर का ङा मुरपुकी जिशा ब्राशा गाक्तेक्म हना, सहर नुप्ब। खिं का ङा मुरपुकी यो जिम्तेक्म हना, मेको खिं मलीब। मत्ती ९:३४
26सैतानमी सैतान कली खेरतु हना, मेकोपुकी ब्रानीम। मिनु आ राज्य दोपा लीबा ङा?
27गो बेल्जीबुल आ सक्तिम वोल आन कली खेरतामी हना, इन तौपुकीमी सु आ सक्तिम खेरमे? मेकोपुकीमी गे इन कली निसाफ पाइनीम।
28गोमी परमप्रभु आ सोक्तीमी वोल आन कली खेरनुङ हना, परमप्रभु यावे आ राज्य जाक्शो बाक्माक्त, दे तुइक्तीन। १यूहन्ना ३:८
29नेनीने, बोल्यो मुर आ खिं खुइ पाइबमी ङोंइती मेको खिं ङा मुर कली ग्याइश्शा फ्रेंशा मवोइक्तु हना, आ खिं ङा मारेइ मारेइ दोपा लाइक्ने चाप्बा ङा? पाइश्शा नोले ला मेको आ खिं ङा मारेइ मारेइ लाइक्ने चाप्ब। मत्ती ४:१-११; यसैया ४९:२४
30गो नु मगारब आं जोरी सत्रु दुम्नीम। गो नु गारशा मखुप्बमी आं खुप्शो यो फ्रशा ताइक्ब। मर्कूस ९:४०
31मोपतीके गो इन कली मार देंनुङ देंशा हना, मुरपुकीमी पाप पा, परमप्रभु यावे कली शुक्शी लोव़ पाम्तेक्म हना, माफ गेचा पुंइसीनीम। परमप्रभु यावे आ सोक्त आ पर्बम शुक्शी लोव़ पशो पाप चहिं मक्याम्सीब, दे इन कली देंनुङ। मर्कूस ३:२८-३०; लूका १२:१०; १यूहन्ना ५:१६; हिब्रू ६:४-६; हिब्रू १०:२६
32रागीम जरमेशो आ पर्बम शुक्शी लोव़ पाम्तेक्म हना, माफ ताइनीम। तन्न सुमी परमप्रभु यावे आ सोक्त आ पर्बम शुक्शी लोव़ पाइबा, मेको आ पाप मुल मक्याम्सीब, बेक्शा लशा नोले यो मक्याम्सीब, गेना हना यो लीब। १तिमोथी १:१३
33ब्रोव़शो फल सिप्ब रवा ख्रुम्तीनी हना, ब्रोव़शो फल सिप्ब। मब्रोव़शो फल सिप्ब रवा ख्रुम्तीनी हना, मब्रोव़शो फल सिप्ब। फल थाम्शा रिम्शो रवा बाक्म, दे मरिम्शो रवा बाक्म मेको तुंइसीब। मत्ती ७:१६-१८
34ए बुस्स आ खलकपुकी, गे मरिम्शो थुं पाइश्शो ननी। मिनु इन शोव़ रे दोपा रिम्शो लोव़ ग्रूबा ङा? थुं मारम ब्रीशो बाक्मे, मेकोन लोव़ पा ग्रूब। मत्ती ३:७
35रिम्शो थुं पाइश्शो मुरुमी रिम्शो लोव़ पाइब। मरिम्शो थुं पाइश्शो मुरुमी मरिम्शो लोव़ पाइब।
36निसाफ पची नाक्त मुर नेल्लेमी आन हेंथे पशो लोव़ का का पा शोव़चा माल्नीम, दे इन कली देंनुङ। याकूब ३:६; यहूदा १५
37मोपतीके होस पा बाक्कीन। मारदे हना इन पशो लोव़मीन दोस गेचा नु ठीक सुइक्चा पुंइसीनीनी” दे माइक्तीमी।
38मिनु सास्त्री नु फरिसी का निक्शीमी “शेंब हजुर, चिन्ड का कोंइदीकी” देंतेक्म।
39मिनु येसुमी “मरिम्शो थुं पाइश्शो नु थमा मसुइक्बपुकीमी चिन्ड कोव़कोव़ दाक्नीम। मेको आन कली परमप्रभु यावे आ लोव़ पाइब योना आ चिन्ड ङा लाक्शा मारेइ चिन्ड मकोंइनुङमी।
40योना नाक्त सां सम्म ङांइ आ कोव़जम बाक्शो खोदेंशो पा, रागीम जरमेशो यो नाक्त सां सम्म रागी आ कोव़जम बाक्ब। योना २:१; एफिसी ४:९; १पत्रुस ३:१९
41निसाफ पची नाक्तीम निनवे सहर ङा मुरपुकी बोक्शा, एको पाला ङा आन कली दोसी सुइक्नीम। मारदे हना मेकोपुकीमी योना आ लोव़ नेंशा, आन थुं परमप्रभु यावे गे लेत्ताक्म। नेनीने, एकेर का योना क्येङा ठेयब बाक्ब। जोना ३:५
42निसाफ पची नाक्त लुक्च रागी ङा पिपीम बोक्शा, एको पाला ङा मुर आन कली दोसी सुइक्ब। मारदे हना मेकोमी ङोन रे कुशा, पिप सोलोमनमी दोदेंशो निप्स पा हुकुम पवा, दे कोव़थ जाक्माक्त। नेनीने, एकेर सोलोमन क्येङा ठेयब का बाक्ब। १राजा १०:१-१०
43मुर रे वोल कली ग्रुंइशा खेरमेनु, ग्रांग्रा दिचा ङा वोल ग्रूशा लशा, ब्वाक्कु मबाक्तीकेमी नाइक्तीके माल्थ गाक्ब। माल्शा यो नाइक्तीके मथीब।
44मिनु ‘ङोंइती आ बाक्तीकेमीन लेत्नुङ’ दे लेश्शा जाक्ब। मिनु लेश्शा जाक्मेनु, बाक्तीके फिक्शा, सिल्शा श्येत्थ वोइश्शो थिप्ब।
45मिनु आ क्येङा ग्रांग्रा दिचा ङा ७ ओटा वोल आन कली माल्थ लशा चाक्ब। मिनु ओव़शा बाक्नीम। मिनु ङोंइती क्येङा मेको मुर शुश मरिम्शो दुम्ब। एको मरिम्शो पाला कली मोदेंशो दुम्ब” दे माइक्तीमी। २पत्रुस २:२०
46येसुमी मेको लोव़ पना पन बाक्मेनु, आ ममा नु आ लोक्बपुकी ग्रुम्थ जाक्मा बाक्त। मत्ती १३:५६
47मिनु मुर कामी “इन ममा नु लोक्बपुकी ग्रुम्थ जाक्तेक्म” देंत।
48मिनु येसुमी मो देंब कली “आं ममा नु आं लोक्बपुकी सु नमी?” मत्ती १०:३७; लूका २:४९
49देंशा, आ गुइ आ शेंसीबपुकी गे शुक्शा “कोव़ङीने, एकोपुकी आं ममा नु आं लोक्बपुकी नम। हिब्रू २:११
50मारदे हना स्वर्गम बाक्ब आं आफ आ दाक्शो पाइबपुकीन आं ममा नु लोक्बपुकी नम” देंत। रोमी ८:२९
