1Dameŋ ira Jesuzi micne bajareme sabata hombaŋko gie ŋondeŋko rambiŋ. Rahuc motecfâcne jaŋe nânâre hâmorâ padi unuckerâ hândâŋne nâmbiŋ.
2Iŋuc epie farisaio ŋic jaŋe i hone manac erâ Jesu âzâcne mumbiŋ, “Manakic, motecfâcge wiac eŋgopieŋ i sabata hombaŋko mi eene.”
3Mupie ʒiŋuc jazawec: “Dawidi â ŋicfâc‐ticne nânâre hâmohuc wiac embiŋ i ŋoŋe wose manac mi eeŋgopieŋ me?
4Jaŋe Anuture ufuŋko ferâ poroŋ furu mukicne nâmbiŋ, poroŋ i e â ŋicfâcne jaŋe mi nânâne, taha bapa jaŋe micbuc‐jeŋic nâniŋte mana‐jarekicne.
5Me taha bapa jaŋere sâcmutâc dâŋqâhâc fokac i wose manac mi eeŋgopieŋ? Jaŋe sabata hombaŋko taha ufuŋko gie bahuc hombaŋ sipirickepie bahac mi eekac i.
6Noni ine ŋazape mananiŋ, mai‐ŋeŋicko domakac e ufuŋ sirickekac.
7Dâŋqâreŋ moc ʒiŋuc fokac: ‘No tiwâ bâzi rike‐nareniŋte mâcne, jauŋhec juniŋte enarekac.’ Ŋoŋe dâŋ i manarâ muzac, bahac tâmiric ʒi maŋgâŋ dâŋ mi mujarenʒapiŋ.
8Ŋic Fâri Wâtuŋne e ine sabata hombaŋ irec rune jukac wâc.”
9Iŋuc murâ irecnec rarâ mitific‐jeŋicko fewec.
10Eme ira ŋic moc ŋewec e mene ɋaŋakicne. Eme ŋic jaŋe Jesu wiocnerâ mumbiŋ, “Ŋic sabata hombaŋko bâpiaŋ‐jopazo me aricne?” Jaŋe kâuc bahuc mâcne, bahac‐ticne moc bâfuarâ dâŋko râeniŋte manasuhuc mumbiŋ.
11Eme Jesuzi micjeŋicko rorâ muwec, “Ŋoŋeraonec moczi lama mocjaha macticne sabata hombaŋko nombâŋko hume hombaŋte erâ beheme foocmu me?
12Lama e wiac omane, ŋic ŋoŋe ine fârine. Irec sabata hombaŋko eehâmo gie i sâcne bapane.”
13Iŋuc murâ ŋic âzâcnewec, “Mege fâretiŋnec.” Mume meticne sicneme biaŋkerâ ŋifecte sâc ewec.
14Eme farisaio jaŋe i honerâ rafârerâ Jesu qaniŋte dâŋ mumockembiŋ.
15Eme Jesuzi i manarâ hae mâreŋ i beherâ mocko rawec. Eme ŋic bocjahazi bâjâpepie bâpiaŋ‐jopa‐fârewec.
16Eme jaŋe ŋic gâcne fuŋne‐ticne mi jazaniŋte mic muac sanaŋne ejarewec.
17Iŋuc eme porofete Jesajazi findaŋdâŋ qâreŋkewec i fârinehec ewec, dâŋ kecʒiŋuc:
18“Kecʒi kiŋaŋ motec‐nane, no e hâcne rowosâepo. E joroc biaŋ‐nane, ere maŋnane aŋackeekac. No Mâro‐nane ere faio râepe bafickeme qâpuc ŋicne ŋicne fâfâretiŋ dâŋ muromackejareocmu.
19E mu hanec me mu owa mi eocmu, marac fânâŋ‐ticne tomao mi fuame mananiŋmu.
20Bo paruczi qakicne i mi qâtâcne behec eocmu, â ʒoc kine mi beheme hâpoocmu. Iŋuc ehuc gie tâpiri jaha bakume fâretiŋ dâŋ bâtâcne bâtimuŋ eme maniŋ biaŋ fuaocmu.
21Eme qâpuc ŋicne ŋicne jaŋe maŋjeŋic ere ʒâŋe biŋeo ɋetickeniŋmu.”
22Eme dameŋ ira ŋic moc demoŋzi ecneme tiŋtuŋ â nâŋguŋ ewec e Jesurao barambiŋ. Eme Jesuzi bâpiaŋkeme ŋic e dâŋ dâŋ ewec â ʒâŋe fiwec.
23Eme ŋic hâmbâŋ sâko domambiŋ jaŋe i honerâ warecke sâqorerâ mumbiŋ, “Dawidire ɋâric wareocte mukicne ʒine hâcne wiac moc?”
24Mupie farisaio jaŋe dâŋ i manarâ ʒiŋuc mumbiŋ: “Burec, demoŋ jaŋere ŋicbomboŋ ʒâŋene Beezebulu, eki neŋgoc ŋesiŋ ŋecnehame demoŋ jâpec‐jopaekac.”
25Eme Jesuzi maŋjeŋicko manarâ jaza muwec, “Mâreŋ moc irec ŋic jaŋe rârâsi kosa epie tuhu fuaocmu. Â hae moc me fic moc irec ŋic jaŋe kikisâ kosa epie hae‐jeŋic tâtieocmu.
26Sataŋzia fâuckerâ Sataŋ jâpeme, gie‐ticne weniŋuc sanaŋkerâ foocmu?
27Eme no Beezebulu ere neŋgoc ŋesiŋko demoŋ jâpec‐jopaekopacko, ŋaŋacne motecfâc jaŋe more ŋesiŋko demoŋ jâpec‐jopaeŋgopieŋ? Jaŋe hâcne qoqoric‐ŋeŋicte fuŋne bataniŋkeniŋmu.
28No ine Anuture Mârozi neŋgoc ŋesiŋ ŋenarehame demoŋ jâpe‐jareekopacko Anuture Wofuŋ qâreŋzi maic‐ŋopakac hâcne.
29Me mozi ŋic momori moc ŋeha ficticnao ferâ mafa jâoc roocmu? I aricne. Ŋic momori qanaŋ hâporâ me kikene qarâ ie mafa‐ticne jâoc rozo.
30Moc e âgo mi enareocmuzi râsi enareocmu, â moc e gie‐nane hone maiŋ mi eocmuzi hetâtieocmu.
31“Irec ŋazape mananiŋ: Sâqocne fuŋne fuŋne â dâŋ gâgâpâcne fuŋne fuŋne irec kiŋ i bebehene fokac, Mâro wiac gâgâpâcne eecne irec kiŋ i bebehene ine mi fokac.
32Moc e Ŋic Fâri Wâtuŋne musoriŋkeocmu, e sâqocne i bâtâmirecnezo, moc e Tiro Mâro musoriŋkeocmu, e ine sâqocne i mâreŋko me sambâŋko mi bâtâmirecnezo.
33Ŋoŋe jâc mocte biaŋne muhuc fâri‐ticnere iŋuc jaha biaŋne munʒepieŋ. Me jâc mocte sâqocne muhuc fâri‐ticnere iŋuc jaha sâqocne munʒepieŋ. Jâcte fuŋne fârinezi bataniŋkeekac.
34Homare ɋâric, ŋoŋe sâqocnezi wemo dâŋ biaŋne mo muniŋmu? Maŋko wiac foekac ijaha micko wefuekac.
35Ŋic biaŋnezi maŋrowaŋ‐ticne biaŋnaonec wiac biaŋne utuocmu, ŋic sâqocnezi maŋrowaŋ‐ticne sâqocnaonec wiac sâqocne utuocmu.
36No ŋazape mananiŋ: Dâŋ racne fuŋne fuŋne irec dâŋgie okac dameŋko banʒoŋgopieŋ.
37Dâŋ muekic izi fuŋnege bataniŋkeme rocguzo, me dâŋ muekic izi fuŋnege bataniŋkeme behecguzo.”
38Iŋuc muhuc jazame miti qaqazu â farisaio tucne jaŋe dâŋ kecʒiŋuc bâtikiecnembiŋ: “Qaqazu, go fuŋne qaqa mâsi moc batec fuame honenaŋ.”
39Mupie jazawec, “Ŋic hehesicne â miti qiqikiŋ iŋucnezi fuŋne qaqa mâsire muŋgopieŋ me? Ŋoŋe mâsi furune moc aricne, porofete Jonarao fuawec ijaha fuame honeniŋmu.
40Jona e ŋafe ʒoaŋ jahec â moc qowi sâkore bumaŋko fowec, iŋuc jaha Ŋic Fâri Wâtuŋnezi ŋafe ʒoaŋ jahec â moc mâreŋmaŋko foocmu.
41Okac dameŋko ine Niniwe haeonec ŋic jaŋe fuarâ ŋicguru ʒi fuŋne‐ŋeŋic ritupie katucne roniŋmu. I mâc mâcne, Niniwe haeonec jaŋe Jonazi uŋ jazame manarâ maŋjeŋic bârisiembiŋ; â ʒi domakac e Jona sirickekac.
42Â juwic mâreŋkonec ŋokac wofuŋ e iŋuc jaha okac dameŋko ŋicguru ʒi fuŋne‐ŋeŋic ritume katucne roniŋmu. Erâ i mâc mâcne, ŋokac e Salomoraonec mamana fârine roocte mâreŋ qaŋeŋnaonec warewec; â ʒi domakac e Salomore sâc sirickekac.
43“Demoŋzi ŋickonec wefurâ ra tuhuo miti qatarac juhuc ŋeŋe hae‐ticne basaocmu.
44Basaku muocmu, ‘Ficnane beherâ warepo ijaha mocwâc risiezepac.’ Murâ risierâ honeocmu: Ru tâmiric, ʒure emasaŋ ekicne.
45Iŋuc honerâ ra demoŋ âgofâc‐ticne 7, e jahacne sâc mâcne, repipicne jâmbâŋ iŋucne rocjopame ware fic ijaha ŋeŋe juju eniŋmu. Eme ŋic e mârâc jaha sâsâqocne juweczi ʒâhec sâqoc qaqore sanaŋkeocmu. Ŋicguru repicne ʒi ŋoŋerao iŋuc hâcne fuaocmu.”
46Jesu e dâŋ i jazahuc juhame râpefuŋ‐jeŋicko neŋgoc ɋafâcne dâŋ âzâcneniŋte woŋec domambiŋ.
47Ehame moczi âzâcnerâ muwec, “Manakic, neŋgoc ɋafâcge dâŋ gazaniŋte râpefuŋ‐nâŋecko woŋec domaŋgopieŋ.”
48Mume Jesuzi ʒiŋuc âzâcnewec: “Neŋgoc ɋafâc‐nane weni jaŋe?”
49Iŋuc murâ motecfâcne domambiŋkopec mene sicnerâ muwec, “Honec‐jopaniŋ, neŋgoc ɋafâc‐nane ʒi.
50Sambâŋ Mamac‐nanere mic reŋkeeŋgopieŋ jaŋe hâcne neŋgoc qo ɋafâc‐nane.”
