1Iesuꞌa eꞌe ḡoeꞌa hauḡirotene Galilea habaꞌa modadu Ioridana vuḡa moneafa Iudea habaꞌa onamiro.
2Vaze ḡuḡuvaḡaniꞌa ani hegotiro ebu aniꞌa ugi azaḡa faiziro.
3Ebu Farisea azaḡa nuꞌa Iesu tuhune nurifine ani vaḡe aradu ḡadiniro, raenaꞌa, “Goro zamaḡano, ohoze ꞌahoganiꞌa haḡai nunu uꞌano inuga modeꞌeteꞌe idaḡahehe?”
4Aniꞌa naenaeziro, raenaꞌa, “Za Buka Zaḡoḡa mene meꞌodirohehe? Ḡadaheḡano Badiꞌaꞌa ḡau niduꞌa haḡairotene ohoze zu roḡae haḡairo.
5Ebu ani raenaꞌa, ꞌEꞌanoꞌo ohozeꞌe viꞌa moga modadu roḡae teite tiburaꞌuma ebu anianine ahiri tiba reꞌuma.'
6Eꞌanoꞌo zeꞌe mene ꞌaheu rehano tiba, ebu Badiꞌaꞌa tibuzirotaꞌaꞌe vazeꞌa mene rovoniꞌuma.”
7Zeꞌa ḡadinenaꞌa, “ꞌOugine nougadu Mose goro ḡoeꞌaꞌe raenaꞌa, 'Ohozeꞌe inuga modine fefa mirihadu roḡaeḡa hanoꞌi ebu modoꞌi,' rae raꞌohe?”
8Iesuꞌa naenaezinaꞌa, “Za teḡaze riḡa ꞌahine, Moseꞌa roḡae modineꞌe idaḡa reiro. Rehano ḡadaheḡanonoꞌo aꞌe mene Badiꞌa urateꞌeteꞌe haḡaeḡa raꞌohe.
9E ziꞌohe, inugaꞌe ubuma ḡezo haḡaiḡa mene haḡaeꞌeteꞌe rehano, iꞌaniꞌa ani modadu roḡae ꞌahoga teite hahurine, aniꞌe ubuma ḡezo haḡaiḡa haḡaeꞌohe.”
10Iesu tahiꞌatahiꞌaꞌa Iesu niro, raenaꞌa, “ꞌAhiguḡaniꞌa iꞌa inuga mazao fureraune, guruvorau radiuꞌetaꞌaꞌe ufeta manoḡa gaogi!”
11Iesuꞌa naenaezinaꞌa, “Vaze niduꞌa ḡoere ꞌahi mae ḡihinogaꞌe mene idaḡa. Rehano Badiꞌaꞌa danazeꞌeteꞌe azaḡa daꞌo idaḡa.
12Vaze nuꞌe fureraroteꞌe madaḡanonoꞌo ahiri ugiḡeta radu mene hahureꞌohe. Nuꞌe vazeꞌa ahiri ariro. Nuꞌe Badiꞌaꞌa ibitoziniꞌeteꞌe veize gauihi radu zeꞌe mene hahuriro. Iniuꞌa ꞌahi ḡoeꞌa mae ḡihinoga idaḡa reine, aniꞌa mae ḡihiniꞌuma.”
13Vazevazeꞌa tahiꞌa komeꞌakomeꞌa tutuze Iesu vaḡe onairo, mazaḡa aniꞌa ze rana ꞌevore teadu kuranoga uratiro. Rehano ane tahiꞌatahiꞌaꞌa tutuze ariroteꞌe azaḡa roziro.
14Iesuꞌa ziro, raenaꞌa, “Tahiꞌa komeꞌakomeꞌa eḡe vaḡe onaetaꞌaꞌe ago gararoꞌi. Mazaḡa Badiꞌaꞌa tahiꞌa komeꞌakomeꞌa teigeꞌeteꞌe azaḡa ibitoziniꞌohe.”
15Ebu aniꞌa ze rana ꞌevore teadu kuraroteꞌe ḡaruḡano, eꞌea iḡune onamiro.
16Vaze ꞌahoganiꞌa Iesu vaḡe aradu ḡadiniro, raenaꞌa, “Ihore vazeḡa, e nagini manoḡa haḡaine ḡabone tuḡutuḡu hidiꞌuma?”
17Iesuꞌa naenaeniro, raenaꞌa, “Ḡaꞌe nougadu eḡe mazao naginiꞌe manoḡa rae ḡadimuꞌohe? Manoḡaꞌe Badiꞌa, tibuhuga daꞌo. Ḡaꞌa ḡabone tuḡutuḡu hidihi roꞌidene, Badiꞌa goro ḡoeꞌa hegotoꞌi.”
18Vaze eꞌeꞌa ḡadinenaꞌa, “Noꞌe goro ḡoeꞌa hegotiꞌuma?” Iesuꞌa naenaeninaꞌa, “'Vaze ago manoꞌi, ubuma ago ḡezanoꞌi, ago ḡonotanoꞌi, kota zamaḡano ḡoere veꞌoḡa ago ḡoeroꞌi,
19viꞌu mogo gubazoꞌi ebu ḡaꞌa ḡae bare zamareꞌeteꞌe teige nabuḡo zamaroꞌi.'”
20Ene iziganiꞌa niro, raenaꞌa, “E goro ḡoeꞌa ꞌahi niduꞌa haḡae onaeꞌohe. Hena nagini haḡaiꞌuma?”
21Iesuꞌa ninaꞌa, “Ḡaꞌe Badiꞌa ubumao manoḡa hune reꞌuma rae uratine, onamadu ḡauḡo niduꞌa seronoꞌi ebu eꞌe moniḡa zahara azaḡa zenoꞌi. ꞌOugine ḡa adureo ḡau manomano meꞌuma. Ebu aradu eḡe hegotoꞌi.”
22Rehano ene iziganiꞌe maꞌora ufeta boro vazeḡa ꞌahine, Iesu ḡoeꞌa igirotene, zamaḡaniꞌa adudu bororeꞌenaꞌa, iḡuniro.
23Iesuꞌa ane tahiꞌatahiꞌa ziro, raenaꞌa, “E hube hune ziꞌohe, maꞌora vazeḡaꞌe Badiꞌaꞌa ibitohauꞌeteꞌe vazeḡa rougaꞌe riḡa bagaḡa.
24Bare ziꞌohe, kameroꞌe niduru hoꞌoga diuḡogaꞌe riḡa. Rehano maꞌora vazeḡaꞌe Badiꞌaꞌa ibitohauꞌeteꞌe vazeḡa rougaꞌe ufeta riḡa.”
25Ane tahiꞌaḡaniꞌaꞌa eꞌe igirotene, zaguzagau rudaro ebu ḡadininaꞌa, “ꞌOugine iniuꞌa ḡabone hidiꞌuma?”
26Iesuꞌa ḡiazadu zinaꞌa, “'Vazevaze zeḡeꞌa bare ḡabone hidogaꞌe mene idaḡa, rehano Badiꞌaꞌa vaze ḡaboziꞌuma. Mazaḡa aniꞌe ḡau niduꞌa haḡaoga idaḡa.”
27Ebu Peteroꞌa niro, raenaꞌa, “Eme ḡa hegotoga veize ḡau niduꞌa modiro. ꞌOugadu emeꞌe naeḡa nagini hidiꞌuma?”
28Iesuꞌa ziro, raenaꞌa, “E hube hune ziꞌohe. Raha ꞌahi niduꞌaꞌe bare izidaꞌuma madaḡano, eḡe, Vaze Ubuganiꞌa kini ehore habaꞌano ehoradu raha niduꞌa ibitohaꞌuma. Ebu zae, eḡe hogoteꞌeteꞌe azaḡa zuni kini ehoro habaꞌa 12 rana ehoradu Isaraela azaḡa, 12 urabo, kotaziꞌuma.
29Ebu iniuꞌa eḡe ꞌuano neḡa, negoḡa, ezeḡa, viꞌa, moga, eneḡa ga habaꞌa modirotaꞌaꞌe naeḡa ḡae 100 meꞌuma zu ḡabone tuḡutuḡu hidiꞌuma.
30Rehano ibiteꞌeteꞌe azaḡa ḡehaḡaꞌe ḡonagano reꞌuma, u ḡonaga azaḡa ḡehaḡaꞌe ibitiꞌuma.”
