1Palulanguru Yiitjunya, palumpa kutunguḻu tjuṯaṯarra, kaanawana yanangi, tjiṉṯu Tjarritiyi ngaranytjala. Kaana panyapawana mangarri wiita ngarala waṉingi. Palumpa kutunguḻu tjuṯangkuya kaanawana yankula paḻtjatjirratjarringkula wiita yantara ngalkurinangi.
2Nyakula tjananya Paratji tjuṯangku Yiitjunyaṯarra kuru watjaṉu yalatji, “Nyawa tjananya!, nyuntupa kutunguḻu tjuṯangkuya wiita yantara ngalkuṉingka. Luwulampa ngaranyi, wiya Tjarritiyingka wiita yantara ngalkunytjaku. Nganampa luwu yalatji ngaranyi yaṉangungku wiita yantara ngalkula yalatji waarrka palyaṉi. Yalatji waarrkarringkula nganampa luwu kilytjuntananyi.” Muutjaku luwu kulira Tjarritiyingka Tjuwu tjuṯaya waarrkawiya kunpu nyinapayi. Wiita tjukutjuku yantaṉingkaya watjalpayi, “Wanti!, waarrkawiya nyinanytjaku!, Tjarritiyi ngaranyingka.”
3Yiitjulu tjananya watjaṉu, “Riitarrimaranyurra, mayutju Tapitalungarriya yirriṯi paḻtjatjirratjarringkula ngalkuṉingi.
4Tapita paluru tjaatji tiṉangka tjarrparra mangarri puriiti tjunkula wantingutja ngalkuṉu. Ngalkura palumpa walytja tjuṯaku tjanampa yungu. Mangarri palunya Katutjaku yungutja, tjawirrilyi, tuḻkuku mayutju tjuṯangku kutju ngalkupayi, luwu tjanampa yalatji ngarangu.
5Muutjaku luwu kutjupa nyurrangarri riitarringkula kulinmara yalatji. Tuḻkuku mayutju tjuṯangkuya kutu Tjarritiyingka waarrkarringkupayi tjawirrilyi pungkula, nganampa tjaatji tiṉangka. Mayutju tjuṯangku, Katutjaluṯarra wiya tjananya kuru watjalpayi Tjarritiyingka tjana waarrkarrinytjala.
6Yalatji nyurrangarri kuliṉi, ‘Nganaṉa tjaatji tiṉa palumpa yunyparringanyi Katutjalu nganaṉanya yungutja.’ Wiyanyurra tjaatji palumpa kutju yunyparrinytjaku, mayutju kutjupakunyurra yunyparrinytjaku. Wangka ngaatjanyaṯarra Katutjakuṉuṯarra nyurrangarri kulintjaku. ‘Ngayulu nyurrangarrinya watjaṉu tjaatji tiṉakutu kuka tjawirrilyi katirra ngayuku tjunkunytjaku. Kuka yalatji katirra tjunkulanyurra yankula yaṉangu tjuṯaku tuunlayiki nyinanyi. Wiya tjanampa nyurrangarri tuunlayiki nyinanytjaku, aḻṯururringkula tjanampa nyurrangarri palya nyinanytjaku.’ Yalatjinyurra Katutjaku wangka kulira wantinyi. Wiya tjanampa nyurrangarri ngayuku kutunguḻu tjuṯaku aḻṯurunytju nyinanyi, wiya. Nyurrangarri tjananya wantimara, palyaya yantara ngalkuntjaku anymangku.
8Ngayuluṉa yaṉanguku katja, yaṉangu tjuṯaku mayutju tiṉa ngayulu nyinanyi. Ngayulu watjaṉi palyaya ngayuku kutunguḻu tjuṯangku Tjarritiyingka mangarri yantara ngalkuntjaku.”
9Palulanguru Yiitjunyangarriya maḻaku yankula Tjuwuku tjaatji kutjupangka tjarrpangu.
10Tjaatji palula wati mara parralayitji nyinangi. Paratji tjuṯangku, kuliṉingi Yiitjunya panypurangkukitjangku, “Tjinguru wati ngaatjanya mara palyalku kuwarri Tjarritiyingka. Yalatji palyara luwulampa kilytjuntanku.” Yalatji kulira tjana Yiitjunya tjapiṉu, “Yaalytji nyuntu kuliṉi? Tjarritiyingka tjinguru ngangkaritjarrangku miiṉṯa palyantjaku, tjinguru wiya? Yalatji palyara tjinguru ngangkaritjarrangku nganampa luwu kilytjuntanku, tjinguru wiya?”
11Yiitjulu tjananya watjaṉu, “Tjinguru nyuntu tjiipi kutju kanyilku. Tjarritiyingka tjinguru tjiipi paluru ngaṯingka tjarrpanytjala, nyurrangarri aḻṯururringkula walatjunkula wantirriyalku. Yalatji tjiipiku aḻṯururringkula wiyala luwu kilytjuntananyi. Palunya nguwanpa palya parralayitji palumpa ngayulu aḻṯururringkula Tjarritiyingka palunya kuwarri palyalku. Katutjalu kuliṉi tjiipi tjuṯa mungutja nguwanpa nyinanyi. Paluru kuliṉi yaṉangu palumpa walytja tjuṯaya nyinanyi maṯupurra. Nyurrangarri parralayitji palumpa Katutjaku walytja maṯupurraku aḻṯururringkula nyinamara.”
13Wati mara parralayitji palunyalpi nyakula paluru watjaṉu, “Mara ngalya katurriwa!” Katurringkula mara palumpa palyarringu.
14Tjarritiyingka palyaṉutjangka paluru tjana Paratji tjuṯa pikarringkula yankula tjungurringu, mayutju kutjupa tjuṯangka. Tjungurrirra Yiitjunya mirri pungkukitjaya wangkangu.
15Yalatji tjana tjungurringkula mirri pungkukitjangku watjaṉutjangka Yiitjulu kulira ngurra kutjupakutu tjananya waṉma katingu, palumpa kutunguḻu tjuṯa. Yaṉangu tjuṯalingkungku palunya wanara tjungurringkupayi. Yiitjulu tjananya miiṉṯa tjuṯa palyarinkupayi.
16Palyara tjananya paluru watjalpayi, “Wiya nyurrangarri yaṉangu kutjupa tjuṯangka tjakultjunkunytjaku, ngayulu nyurrangarrinya palyaṉutjangka. Ngayulu Katutjaku waarrkana, tjana wiya ngayunya waḻkuntjaku.”
17Paluru yalatji wiya walytjangku waḻkulpayi. Yalatji wati Yaatjayalu yirriṯi Katutjaku wangka watjaṉu. Yiitjulu panyapa watjantjala wangka palunya iltarringu. Yalatji Yaatjayalu Katutjaku wangka watjalpayingku watjaṉu,
18“Ngayulu watjaṉu ngaatja ngayuku waarrkana nyinanytjaku. Ngayulu yunytjurringanyi ngaaku. Ngaakuṉara yilta yunypa nyinanyi. Ngayulu palula ngayuku kurrunpa tjarrpatjunku, paluru yaṉangu Tjuwuwiya tjuṯangkaṯarra tjananya ngayuku wangka tjakultjunkunytjaku, kuliraya kana nyinanytjaku.
19Paluru wiya yunytjurriku yaṉangu tjuṯangku palunya waḻkuntjaku, purinypangku tjananya nintinmalpa.
20Paluru aṉangu maralpa tjuṯaku aḻṯururringkula palyara tjananya nintilku, nyakula wantinytjawiyangku. Paluru tjananya rapalku tjana tjukarurrulpi nyinanytjaku.
21Tjuwuwiya tjuṯangkuṯarraya palumpa wangka kulira yunypa paṯalku Katutjaku ngurrangka nyinakitja.”
22Kutjupa tjuṯangku wati paanga wangkawiya Yiitjulakutu katirra ngaratjunu. Wati paluru mamutjarra nyinangi. Yiitjulu mamu palunya payira wantirriyantjala wati paluru palyalpi wangkangi, paluru nyangangiṯarra.
23Yaṉangu tjuṯangkuya wati paluru wangkanytjala kulira yunyparringkula watjara waṉingu, “Kuwarri kutju nganaṉa nyangu ngangkari tiṉatjarrangku yalatji palyantjala. Tjinguru palatja Kurayitjanya, Tapitaku walytja ngaṉṯitja.”
24Kanya Paratji tjuṯangkuya yalatji wiyawana watjaṉu, “Paluru mamu wantirriyalpayi mamuku mayutjukuṉu ngangkari tiṉatjarrangku.”
25Paluru tjanaya yalatji kuliṉingitjangka Yiitjunya tjanampa ninti nyinangi. Ninti nyinarra tjananya yara yalatji watjaṉu, “Yaṉangu walytja tjuṯangkuyanku rawangku pungkula mirrintara yuwankarraya wiyarriku. Tjinguru kalypaya nyinarra kana kutu nyinaku. Yara palunya nguwanpa, kaakararrangkuyanku rawangku pungkula mirrintara yuwankarraya wiyarriku. Kalypaya nyinarra kana kutuya nyinaku. Yara palunya kutjarra nguwanpa walytja tjuṯangkuyanku pungkula mirrintankunytja nguwanpa, tjinguru mamu tjuṯangkuyanku pungkula mirrintanku, mamuku mayutju, mamu tjuṯaṯarra yuwankarra wiyarriku. Nyaaku nyurrangarri ngayunya wiyawanangku watjaṉu?, ngayulu mamu payira wantirriyaṉi, mamukuṉu ngangkaritjarrangku. Yalatji wiya. Mamukuṉu ngangkaritjarrangku wiya mamu walytjanya payira wanara wantirriyaṉi. Ngayulu wiya mamukuṉu ngangkaritjarra nyinanyi, wiya, Katutjakuṉu ngangkaritjarra ngayulu nyinanyi.
27Nyurrangarrimpa walytja tjuṯangkuya mamu payira wantirriyalpayi. Paluru tjana kuliṉi, ‘Nganaṉa Katutjakuṉu ngangkaritjarrangku mamu payira iyaṉi.’ Palunya tjananya nguwanpa ngayulu mamu payira iyaṉi Katutjakuṉu ngangkaritjarrangku. Paluru tjana tjukarurru kuliṉi Katutjakuṉu ngangkaritjarrangku nganaṉatju mamu payira iyaṉi. Wiyawanangku nyurrangarri kuliṉi.”
28Yiitjulu tjananya piyuku watjaṉu, “Ngayulu Katutjakuṉu ngangkaritjarrangku mamu payira wantirriyaṉingka nyurrangarri nyakula yalatji kulinmara, ‘Yilta, kuwarrilpi Katutjalu yaṉangu tjuṯa ngulytjura yaṉṯayaṉṯaṉi.’”
29Yara kutjupa Yiitjulu tjananya watjaṉu, “Wati tjalata tjilirratjarrangkunku palumpa yulytja tjuṯa kanyilku, wiya kutjupangku palumpa waaḻangka tjarrparra yulytja mantjilku, pungkutjipingka. Wati kutjupangku ngangkaritjarrangku, wati tjalata palunya kuyara tayimapira kutju, palumpa yulytja mulyaṯangku katiku.” Yara palunya Yiitjulu kampa kutjupa watjaṉu nintilkitjangku. Wati tjalata palunya nguwanpa, mamuku mayutju nyinanyi. Wati palunya ngangkaritjarra nguwanpa Yiitjunya ngangkaritjarra nyinanyi. Paluru mamu tjuṯa payira wantirriyaṉi, Katutjakuṉu ngangkari tiṉatjarrangku.
30Yiitjulu tjananya piyuku watjaṉu, “Tjinguru yaṉangungku yalatji ngayunya panypurangkuku, ‘Yiitjunya mamuku walytja nyinanyi.’ Panypurangkupayi palunya wiya paluru ngayuku walytja nyinanyi, wiya. Tjinguru yaṉangu kutjupa wiya yunytjurringanyi ngayuku waarrka palyalkitja, yaṉangu tjuṯa Katutjaku walytja nyinanytjaku wiya paluru yunytjurringanyi. Yaṉangu paluru yaṉangu tjuṯa kulilwiyangku wantinyi, tjana mamuku walytja tjuṯa kutu nyinanytjaku.
31Wangka ngaatjanyaya kulila! Yaṉangungku kuya palyaṉutjangka, tjinguru Katutjanya panypurangutjangka, tjinguru ngayunya yaṉanguku katja panypurangutjangka, Katutjalu kuya palumpara waṉinyi. Katutjaku kurrunpa yaṉangungku panypurangutjangka Katutjalu wiyara kuya waṉinyi, kutu kuya palunyatjarra nyinarra wiyarriku. Kuya yalatji Katutjaku kurrunpa yaṉangungku panypurangutjangka Katutjalu kutu yitjipungamalpa, ngula kuutawutjungka wangkarra.”
33Yiitjulu tjananya yara kutjupa watjaṉu, “Watiya palya, mangarri palyatjarra ngaranyi. Watiya piḻṯi mangarri kuyatjarra ngaranyi. Watiya piḻṯingka wiya nganaṉa mangarri palya mantjiṉi. Tjinguru watingku yukiri wiima pakaṉutja nyakula puṯu kulilku, ‘Watiya nyaa ngaatjanya?’ Yukiri palunya tiṉarringkula mangarritjarra ngaranytjala paluru nyakula nintingkulpi kulilku, ‘Yuwa, ngaatjanya watiya palya mangarri palyatjarra.’
34Yilta, kuya tjuṯanyurra nyinanyi, watiya piḻṯi mangarri kuyatjarra nguwanpa. Ngunytjinytju tjuṯanyurra nyinanyi.
35Yara palunya watiya palya nguwanpa, wati palyangku tjukarurru kulira yaṉangu kutjupakura tjukarurru palyalpayi. Watiya piḻṯi nguwanpa wati kutjupangku tjaalpangku kulira yaṉangu kutjupa wantirra wiya tjukarurrura palyalpayi. Yuwa, nyurrangarri ngunytjinytjungku kulira wangkanyi. Yaṉangu kutjupa tjuṯangku nyurrangarrimpa wangka kulira watjaṉi, ‘Yuwa, wati pala tjuṯangku ngunytjinytjungku kulira wangkapayi.’
36“Ngayulu nyurrangarrinya watjaṉi yalatji. Ngula kuutawutjungka Katutjalu yaṉangu tjuṯa tjapilku, ‘Mantangka nyuntu nyaaku ngunytji wangkapayi? Tjuṯangara ngunytji watjara tjakultjurraṉi!’
37Nyurrangarrimpa wangka watjaṉutja kulira paluru watjalku palya tjuṯa kanyilkitjangku. Kuya tjuṯa paluru payira wantirriyalku warukutu.”
38Paratji tjuṯangku, Muutjaku wangka nintilpayi tjuṯangkuṯarra Yiitjunyaya yalatji watjaṉu, “Nintilpayi. Ngangkaritjarrangku nyuntu kutjupa kutjupa palyala!, nganaṉatju nyakunytjaku. Nyakulalatju tjinguru kulilku nyuntu Katutjakuṉu, tjinguru wiya.”
39Yiitjulu tjananya watjaṉu yalatji, “Kutuṉinyurra tjapilpayi ngangkaritjarrangku kutjupa kutjupa palyantjaku, nyakulaṉinyurra Katutjakuṉu kulilkitjangku. Yaṉangu tjuṯanyurra kuya nyinanyi Katutjanya kulintjawiya. Ngayulu wiya nyurrangarrimpa ngangkaritjarrangku kutjupa kutjupa palyalku. Yalatji kutju ngayulu nyurrangarrinya watjalku yara Tjawunanyatjarra. Tjawuna paluru irriṯi Katutjaku wangka watjalpayi nyinapayi.
40Yirriṯi palunya piitji tiṉangku kuuḻtjunkula kanyiṉingi munga kutjarra. Tjiṉṯu kutjupangka piitji paluru yulkapatjunulpi kana kutu. Panyapa kulira tawunu Ninapanya ngurrara tjuṯangkuya kuliṉu, ‘Yilta, Katutjalu Tjawunanya kanaṉu.’ Palunya nguwanpa ngayulu, yaṉanguku katja, munga kutjarra mirri ngarrirra kanarrinytja nyakula nyurrangarri kulilku, ‘Yilta, Katutjalu palunya kanaṉu.’
41Tjawuna paluru tjananya Katutjaku wangka Ninapanya ngurrara tjuṯangka nintiṉingi, palulanguru tjana kuya palyantjawiyalpiya tjukarurru nyinangi. Kanya ngayulu Tjawunala wirriḻi nyinanyi. Ngayulu Katutjakuṉu wangka nyurrangarrinya nintintjala, kuliranyurra wantipayi. Palulanguru Katutjalu yaṉangu yuwankarra ngula kuutamilalku. Ngurra palula Ninapanya ngurrara tjuṯangku nyurrangarrinya kuru watjalku, ngayuku wangka kulira wantingutjangka.
42Kulilaya!, yara Tjiipanya ngurraratjarraṯarra. Minyma mayutju tiṉa, manta Tjiipalanguru waṉma yanu mayutju Tjalamunalakutu Katutjaku wangka kulilkitja. Mayutju Tjalamunanya ninti puntu nyinangi, kanya ngayulu mayutju Tjalamunangka wirriḻi nyinanyi, ngayulu Katutjakuṉu wangka tjakultjunkupayi. Wangka palunyanyurra kulira wantipayi. Katutjalu ngula yaṉangu yuwankarra kuutamilalku. Ngurra palula minyma paluru Tjiipanya ngurrarangku kuru watjalku nyurrangarrinya, Katutjaku wangka kulira wantipayi tjuṯa.”
43Yiitjulu tjananya yara piyuku watjaṉu, nintilkitjangku, “Mamu yalatji nyinanyi. Mamu paluru yaṉangungka tjungu nyinarra wantikatirra ngurra kutjupawana yulytjayinamalpa, wati kurrunpa kutjupangka nyinakitja.
44Yaṉangu kutjupaku puṯu ngurririnkula kulilku, ‘Yaṉangu walytjakutuṉa maḻaku yankuku, palumpaṉu kurrunpa walytjangka nyinakitja.’ Yankula mamu paluru yaṉangu palunya nyakuku kurrunpa walytjatjarra palya nyinanyingka, Katutjaku kurrunpatjarra wiya.
45Mamu paluru, mamu kuya tjapanpala yaḻṯirra tjananya katiku yaṉangu palulakutu, kuyaraya tjarrparra nyinanytjaku. Yaṉangu paluru yurrunpa mamu kutjutjarra nyinangu, palunyatjanu mamu tjuṯatjarralpi nyinaku, kuyalingkulpi, miiṉṯa. Palunya nguwanpa kuwarri yaṉangu tjuṯa kuya nyinapayi tjuṯa, mamu tjuṯatjarralpi nyinaku.” Yara palunya wangkarra yalatji Yiitjulu tjananya kampa kutjupa watjaṉu. Mamu payira wantirriyaṉutjangka yaṉangungku Yiitjuku wangka kulira palumpa walytjarrinytjaku. Walytjarrinytjawiyangka tjinguru mamuku walytja paluru kutulpi nyinamalpa.
46Yaṉangu tjuṯangka panyapa wangkanyingka, Yiitjuku maama, maḻanypa tjuṯaṯarra yankula waaḻangka yuriltaya ngarangi. Wati kutjuya iyaṉu, Yiitjunya yankula yaḻṯinytjaku. Wati paluru maa yankula yila ngarangi yaṉangu tjuṯangku ngarala yangatjunanyingka. Kutjupa tjuṯangku kulira maa watjaṉu Yiitjunya yalatji, “Nyuntupa maama maḻanypa tjuṯaṯarra, ngaranyi yurilpangka. Yankula tjananya nyawa! Yaḻṯinyintaya.”
48Wangka palunya kulira Yiitjulu tjananya watjaṉu, “Ngayuku walytja tjuṯa yurilpangka ngaranyi, yilta ngayulu tjanampa walytja nyinanyi. Kutjupakuṯarra ngayulu walytja nyinanyi, Katutjaku.”
49Yiitjulu tjananya palumpa kutunguḻu tjuṯakutu marangku nintira, yaṉangu tjuṯangkaṯarra tjananya watjaṉu, “Nyurrangarri wiya ngayuku walytja tjuṯa nyinanyi, tjana ngaranyi yurilpangka. Tjinguru nyurrangarri Katutjaku walytja tjuṯa nyinarra ngayuku walytja tjuṯaṯarranyurra nyinanyi. Kutjupa tjuṯanyurra ngayuku maama tjuṯa nguwanpa nyinanyi. Kutjupa tjuṯanyurra ngayuku maḻanypa tjuṯa nguwanpa nyinanyi. Alatjinyurra Katutjaku wangka kulira tjukarurru nyinarra ngayuku walytja tjuṯanyurra nyinaku. Katutjaku wangka kulira kutjupa tjuṯanyurra ngayuku kangkuru tjuṯa nguwanpa nyinaku. Katutjaku wangka kulira kutjupa tjuṯanyurra ngayuku kaaka tjuṯa nguwanpa nyinaku. Katutjaku wangka kulira kutjupa tjuṯanyurra ngayuku maama tjuṯa nguwanpa nyinaku.”
