MAREKO 9:7-38

⁷Ori ta ia koua idia dekenai, bona gado ta ori lalona dekena amo ia mai, ia gwau, “Inai be lauegu Natuna. Lau lalokau henia, umui kamonai henia.”

⁸Karaharaga unai gabu ibounai idia itaia namonamo, to tau ta idia itaia lasi, Iesu sibona mo idia danu.

⁹Ororo dekena amo idia diho mai neganai, Iesu ese idia ia hamaoroa, inai idia itaia gaudia idia gwauraia lasi, ela bona Taunimanima ena Natuna be mase dekena amo ia toreisi lou.

¹⁰Inai hereva idia sibona idia laloa, idia sibona idia herevahereva, “Inai mase dekena amo toreisi lou herevana be dahaka?”

¹¹Idia nanadaia Iesu dekenai, idia gwau, “Badina dahaka taravatu hadibaia taudia idia gwau, Elia do ia mai guna?”

¹²Iesu ia haere henia, ia gwau, “Momokani Elia ia mai guna, gau ibounai do ia hamaoromaoroa guna totona, bona Buka Helaga edena bamona Taunimanima ena Natuna herevana ia torea, ‘Hisihisi momo do ia abia, bona do idia hahemaraia?’

¹³To lau hamaoroa umui, Elia ia mai vadaeni, bona dahaka idia ura gaudia idia karaia vadaeni ia dekenai, Buka Helaga ia torea bamona.”

¹⁴Iesu bona idia toiosi be diba tahua taudia haida dekenai idia ginidae neganai, idia itaia, idia be taunimanima momo edia huanai. Taravatu hadibaia taudia danu idia hepapahuahu noho.

¹⁵Taunimanima ibounai ese Iesu idia itaia, vadaeni idia hoa bada, idia heau lao ia dekenai, idia hanamoa.

¹⁶Ia nanadaia, “Umui dahaka dekenai umui herevahereva noho idia danu?”

¹⁷Taunimanima edia huanai tau ta ia haere henia, ia gwau, “Hadibaia tauna e, oi dekenai lauegu natuna lau mailaia, ia be hereva diba lasi lauma ese ia abia.

¹⁸Ia dogoatao gabuna dekenai ia negea diho, uduna ranu kurokuro ia diho mai, isena sibona ia koria dikadika, bona iena kopina ia maragi vadaeni. Oiemu diba tahua taudia lau noia lauma dika idia lulua, to idia hegeregere lasi.”

¹⁹Iesu ia haere henia, ia gwau, “O, abidadama lasi taudia, dina hida umui dekenai dohore lau noho? Dina hida lau gaukara umui danu? Mailaia lau dekenai.”

²⁰Idia ese mero idia abia lao ia dekenai. Lauma dika ese Iesu ia itaia neganai, nega tamona ia dagedage herea, bona mero ia hamorua diho tano dekenai, tano ia botaia, uduna ranu kurokuro ia diho lao.

²¹Iesu ese mero ena tamana dekenai ia nanadaia, ia gwau, “Edena negai inai gorere ia davaria?” Ia gwau, “Ia maragina neganai.

²²Nega momo ia negea lahi lalonai, ranu lalonai danu, hadikaia totona, to bema oi karaia diba, mani oi bogahisihisi ai dekenai, bona oi durua ai.”

²³Iesu ia gwau, “Dahaka dainai oi gwau, ‘Bema oi karaia diba?’ Abidadama tauna ese gau ibounai ia karaia diba.”

²⁴Bona karaharaga momokani mero ena tamana be ia boiboi, ia noia, “Lau abidadama henia, lauegu abidadama maragimaragi mani oi durua.”

²⁵Iesu ese taunimanima momo ia itaia, idia heau mai ia dekenai, vadaeni unai lauma dikana dekenai ia gwau henia, ia gwau, “Oi hereva diba lasi bona taia koua lauma, oi lao murimuri, mero lalonai oi vareai lou lasi.”

²⁶Vadaeni, lauma ia boiboi goada, bona ia ese mero ia hamarerea dikadika, bona ia lao murimuri dekenai. Mero be mase tauna bamona, taunimanima idia gwau ia mase momokani.

²⁷To Iesu ese iena imana ia dogoatao, ia abia isi, ia toreisi vadaeni.

²⁸Ruma lalonai Iesu ia raka vareai neganai, iena diba tahua taudia ese idia nanadaia, idia gwau, “Badina dahaka aiemai lulua siahu be hegeregere lasi?”

²⁹Idia dekenai Iesu ia gwau, “Inai bamona gauna lulua dala ta be lasi, guriguri sibona mo be hegeregere.”

³⁰Unai gabu Iesu ia rakatania, Galilea tano ia raka hanaia, ia ura taunimanima idia diba lasi ia lao,

³¹badina be iena diba tahua taudia dekenai ia hadibaia, ia gwau, “Taunimanima ena Natuna be taunimanima ese dohore idia dogoatao, idia alaia mase, bona dina toi murinai do ia toreisi lou.”

³²Unai hereva ena anina idia diba lasi, to idia gari dekenai, idia nanadaia lasi.

³³Idia ginidae Kaperanauma hanua dekenai, ruma lalonai idia dekenai Iesu ia nanadaia, ia gwau, “Dala dekenai dahaka umui herevahereva?”

³⁴Idia hereva lasi, badina dala dekenai idia sibona idia herevahereva, daika be dohore ia tau bada herea.

³⁵Ia helai diho, iena taudia 12 ia boiria, ia gwau, “Bema tau ta ena ura be ia gini, gunalaia tauna o biaguna, unai tau dohore ia lao gabeai, bona ia be dohore taunimanima ibounai edia hesiai tauna.”

³⁶Ia ese mero maragi ta ia abia, edia huanai ia haginia, bona ia rosia. Ia hereva,

³⁷“Daika ese natuna maragi inai bamona ia abia dae lauegu ladana dainai, be lau danu ia abia dae. Bema tau ta ese lau ia abia dae, lau sibona ia abia dae lasi, to lau ia siaia Dirava danu ia abia dae.”

³⁸Ioane ese ia hamaoroa, “Hadibaia tauna e, tau ta ai itaia, oiemu ladana dekenai lauma dikadia ia lulua, to ia be iseda kahana tauna lasi. Unai dainai iena gaukara ai hadokoa, badina be ia be iseda kahana tauna lasi.”