Markungundru 9:7-38

⁷Ja talarapalku pantjina wonti ja tanana walpadakana wonti; ja ngaiala talara palkundru dunkana wonti ja jatana wonti: “Naupini Ngatamura ngantjalu ngakani nganai, ninaia ngaraiatinimai!”.

⁸Ja tanali najina karitjina wonti, ja nurujeli tanali kana pani najina wonti, windri Jesus kulnulu tanangunto.

⁹Ja tana mardawonpandru ngarina tikana, Nulu tanangu jirijiribana wonti, jenia wata kulnuni kaukaubananto, mina tanali matja najina, windri ngadani, Kanaia Ngatamura narindru jiritjina warai.

¹⁰Ja jenia jaura tanali patana wonti, ja tana jakalkijiribamalina wonti: “Mina jenia wondrai: Narindru jiritjina?”

¹¹Ja tanali nina jakalkana wonti ja jatana wonti: “Jaura jinkinietja jatai: Elias ngopera wokarananto.”

¹²Nulu kalabana wonti ja tanangu jatana wonti: “Elias wokarai, ja nulu ngopera pratjana talku kurai; ja worderu dakanala parai Kanaia Ngatamurandru; Nauja pirna ketjaketjananto ja tanali ninaia panila ngundrananto.”

¹³Ngani jurangu jatai: “Elias morlalu wokarana warai, ja tanali nunkangu ngankana warai, mina tanali jertapaterina warai, worderu nunkangundru dakanala parai.”

¹⁴Ja Nau milini nunkanani wokarana wonti; ja Nulu kana wolara tanangunto najina wonti, ja jaura jinkinietjali tanana jakajakalkana wonti.

¹⁵Ja nurujeli, kana wolarali nina matja najina, tana pirna ngaruparana wonti, ja tana karakararina wonti ja nunkangu jaura murlali jinkina wonti.

¹⁶Ja Nulu jaura jinkinietja jakalkana wonti: “Mina jura tanangu jela jakalkijiribamaliai?”

¹⁷Ja kana wolarandru nunkangu kuinujeli kalabana wonti: “Ngujangujara jinkinietjajai, ngato ngatamura ngakani jinkangu wapalkana warai, nulla kutji ngapu ngamalkai;

¹⁸Ja woderi nulia ninaia patai, jerra nulia ninaia diadialkai; ja nulia ngaltja ngankai ja manatandra matateriai ja winjariai; ja ngani inilini jinkanani jatana warai, tanalia ninaia dunkalkananto, ja tanaia ngandandarina warai.”

¹⁹Nulu tanangu kalabana wonti ja jatana wonti: “Jura nguja gilbarinietja, wintaranaia ngani jurangu jela nganananto, wintaranaaia ngato jurana ngamalkananto? Ninaia ngakangu padakanimai!”

²⁰Ja tanali nina nunkangu wapalkana wonti; ja Nulu nina najina, nurujeli kutjieli nina matarla ngankana wonti, ja nau mitani purina wonti ja ngaltja witjiwitji walkina wonti.

²¹Ja Nulu ngaperi nunkani jakalkana wonti: “Winta jenia nunkangu pantjinala?” Nau jatana wonti: “Kupandru,”

²²Ja nulu nina pota marapu bakana turuni ja ngapani worai, nina nari ngankala. Windri jidni ngurunguru ngananani, kalumiltjamiltjarina ngalina marangokau,

²³Jesus nunkangu jatana wonti: “Jundru ngurunguru ngananani morlalu ngundrala; warle morlalu ngundrai nunkangu panila ngandandariai.”

²⁴Ja nurujeli kankuja ngaperi maritjina wonti, ja milkigildieli jatana wonti: “Ngato morlalu ngundrai, Kaparajai, marangokau ngakangu wuldrungundranietjani.

²⁵Jesujeli najina, kana wolara jurborinani, Nulu katji murumuru dikidikibana wonti ja nunkangu jatana wonti; “Jidni kutji tali pani ja ngapu, ngato jinkangu jirijiribai, nunkangundru dunkau, ja wata niorla nunkangu wiriau!”

²⁶Ja nau maritjina wonti, ja nulu nina pirna diadialkana wonti, ja nau dunkana wonti; ja nau nari jeribaka nganana wonti, jeruja marapu jatana wonti: “Nauja matja nari.”

²⁷Jesujeli nina mara patana wonti, ja nina terkibana tarana wonti, ja nau jiritjina wonti.

²⁸Ja Nau pungani matja wirina, milieli nunkanali nina pilki jekibana wonti: “Miandru ngaiani ngandandarina warai ninaia dunkalkala?”

²⁹Ja Nau tanangu jatana Wonti: “Naupara nguja ngandandariai pilki dunkala, windri ngatjinali ja milja ngamanali.

³⁰Ja tana nakandru wapana wonti ja Galilaiani palkingana wonti; ja Nulu wata ngantjana wonti kulnujeli jenia ngujamananto.

³¹Ngangau Nulu milini nunkanani ngujangujara jinkina wonti ja tanangu jatana wonti: “Tanali Kanaia Ngatamura kana marani ngulkujeli jinkila nganai, ja tanali ninaia nari ngankala nganai, ja matja nari, Nauja jiritjila nganai.”

³²Tanali jenia jaura wata ngujamana wonti ja japali nganana wonti nina jakalkala.

³³Ja Nau Kapernaum ngurani wokarana wonti. Ja Nau matja pungani, Nulu tanana jakalkana wonti: “Mina jura paltuni ngankamalina warai?”

³⁴Tana ngapu nganana wonti; ngangau tana paltuni ngankamalina warai, worana morla pirna nganai.

³⁵Ja Nau matja ngamana ngarina, Nulu tanana marapratjana ja mandru karkana wonti ja tanangu jatana wonti; kulnujeli ngantjanani ngoperala nganala, nau pratianani ngadaia nganala nganai, ja pratjanaia mili.”

³⁶Ja Nulu kupa waka patana wonti ja tanangu terti terkibana wonti; ja Nulu nina matja munamana, Nau tanangu jatana wonti:

³⁷“Warle jenipara kupa waka kulno patai ngakani talani, nulu ngana patai; ja warle ngana patai, wata nganai patai, a-ai, ninaia Nulia ngana jinpanala.”

³⁸Joliannili nunkangu kalabana wonti ja jatana wonti:. “Ngujangujara jinkinietjajai, ngaiani kulno najina paraia jinkani talani kutji dunkalkanani, nau ngaianingu wata karipateriai; ja ngaiani nina daudauana paraia, ngangau nau ngaianingu wata karipateriai.”