Maka 9:7-38

⁷Motong la eng tene atu isi le si rur ki iloko la podi, inbe tool atu kalngana pombe eng tene tani lono in iwete nen. Iyei ne, “Tool in au Natuk yo lok panga mai san i. Le kalongo betanga ki yo be iwete pang nga!”

⁸Ngan tool tani kalangana iwete nen a imot, le palbe leu inbe Yesu di galiunu tina be matadi sarai, ngan tikamata touo tool siap. Bong Yesu ya taleu la iye di tiyepe i.

⁹Motong la ye kene yo iye di galiunu tipa ke kawal a be timulu a tidu ye in nga, ngan iwete betanga medana pang di be kin tigasagasa pang tool sa ye so yo tikamata, ngan be. Bong be iken ye di leu le ilo ye lal yo be Tool Moolmool ke Maro iyege ni ke matenge a imadit mulu ye i.

¹⁰Le nga di galiunu tina ngan tilongo koonoo a titoo betanga ki le so tina ngan iken ye di leu. Inbe nga di tapdi tiwetewete a tiyei ne, “Oo, betanga yo iwete be ole iyege ni ke matenge a imadit mulu ye i, in punu belei?”

¹¹Motong la titoru nen, “Nga yelei a di pannoongoo ke ger ke Maro tiwete be Ilia ole imuku a isi, lo ngan be Mesaia itoo nga?”

¹²Ngan Yesu iraua betanga kidi nen, “Betanga in moolmool. Ilia ole imuku a isi be si ikarata so le imot yo iken dook tiap nga, le iken dook mata. Bong ole yelei ye betanga yo tiwodo mukot lo ye Rau ke Maro nga? Ngan betanga tina ngan nen, be Tool Moolmool ke Maro ole isolo masngana mai san, inbe di tooltool ole tiwala muridi panga.

¹³Bong be awete pang nen, Ilia tani in isi oo. Inbe dada dook tiap le imot yo di tooltool lodi be tiyei panga nga, ngan tiyei panga moolmool, dawa ben betanga tina yo tiwodo ye a iken ye Rau ke Maro nga.”

¹⁴Ye kene yo Yesu iye di galiunu tol tina ngan tipa le du pombe pang ye di galiunu kapala nga, ngan tikamata di tooltool malala mai yo tigaua a tigaliu di nga. Inbe di pannoongoo ke ger ke Maro pattu ngan tiye di tiparsu ye betanga.

¹⁵Ngan yeisa be di tooltool malala mai tina ngan tikamata Yesu, ngan le titakrai welewele inbe palbe leu be tidada a tila le la tiwete lo ponana kidi panga.

¹⁶Motong la Yesu itor di galiunu tina nen, “Ai, soo so kaye di tooltool ngan kaparsu ye i?”

¹⁷Ngan tool atu yo iyepe kataunu ye di tooltool malala mai tina i, in imadit a iraua betanga ki nen, “Atoo, Pannoongoo, au i akaua natuk la aman pang yong nga, yesoo so sadi idiwidiwoo a iyeii le koon kis le ke be iwetewete tiap.

¹⁸Kanakana ngan kumata be so sadi tani in imadit ye nga, ngan ole ikatte du tana a isodangadanga a ngoon sian du, inbe ikanen dongana a iparrasa. Ngan la aman be man ator di galium nga be tinganga so sadi ye, bong ngan ke be tiloni tiap.”

¹⁹Motong la Yesu iyei ne, “Ona tiap! Ang di tooltool yo nookoot kayepe nga, ngan katara lomim le imede ye Maro tiap. Nga ole ke pi mulu be nen ngan ayang tayepe, inbe awete a kayei dada yo nen ngan mulu ye nga? Oo, kakaua kase in a iman yau.”

²⁰Motong la tikaua kase tani a ila pang ye nga. Bong yeisa be so sadi tani in ikamata Yesu, ngan le pattu leu be idiwidiwi kase tani a ikatte du tana du itangarur a itapulpul, inbe ngoon sian du ye koonoo.

²¹Motong la Yesu itoro kase tani in tamana nen, “Ngan iyei nen ye taudu pi koot?” Le nga tamana iraua betanga ki nen, “So i pombe panga ye kene yo ya kene kase go nga.

²²Inbe ye kene kapala be so sadi tani in imadit ye nga, ngan ole ikatte lo ei lono, too ran lono, inbe ikapye be iraumate a imata. Bong kumata le kukanamai ong ke be kuyei so nen nga, ngan lom pam a kulonam.”

²³Motong la Yesu iyei ne, “Nga yelei a kuwete pau, be kumata le akanamai au ke be ayei so nen, ngan ayei nga? Awete pong nen, kumata tool be itara lono medana nga, ngan so sa yo be imoo pang Maro be iloni ye, ngan tiap.”

²⁴Le nga pattu leu be kase tani in tamana koonoo le mai. Iyei ne, “Au i atara lok medana, bong lo medana kiau i mai mata tiap. Le lok be kulonau a atara lok le imede moolmool.”

²⁵Ye kene tani in Yesu ikamata di tooltool malala mai tina ngan timadit be tidada a tila pang ye di nga, le nga ipasak pang so sadi tani. Iyei ne, “Ong so sadi yo kuyeie kase i a koonoo le talngana kisis i, in awete le kook mede ye betanga pong be kupas a kuyege le kumulukala mulu be.”

²⁶Motong la so sadi tani in isulu paue a ikatte kase tani le idu tana a itangarur welewele, inbe ipas a ila. Ngan ipas a ila inbe kase tani in sila iken le tau pulesingi ye dawa ben tool imata nga. Le nga di tooltool malala mai tina ngan tikamata le tiyei ne, “Ona, o imata oo.”

²⁷Bong ngan Yesu itoko baene inbe ipamaditi le lo ikodo.

²⁸Motong la imulu a ila le ilo rumu lono, le lo iye di galiunu leu tiyepe. Motong la titoru nen, “Ai, nga yelei a le be amnganga so sadi ni, ngan le ikoo ye tiap nga?”

²⁹Ngan Yesu iyei ne, “So sadi yo nen nga, ngan ole tanganga di ye dada ke pataraungu leu.”

³⁰Motong la Yesu iye di galiunu tiyege malala tani, inbe tipa so le tila Galili. Ngan lono be di tooltool sa lodi galanga ye ni yo be la tiyepe ye in tiap,

³¹yesoo lono be di leu tiyepe inbe ipatomonai di. Nen le iwete pang di nen, “Ole titara Tool Moolmool ke Maro la di tooltool baedi, a be nen ngan tiraumate a imata. Ngan ole iken ye ke ru, lo ngan be ye ke tol ki, ngan ole imadit mulu ye ni ke matenge.”

³²Ngan di galiunu tina ngan tilongo patomonaingi ki, ngan lodi galanga ye betanga ki yo iwete ngan punu tiap. Bong titattadai be titoru, a be nen ngan iwete nin pang di nga.

³³Yesu iye di galiunu tipa a la pombe malala mai Kapenam, le nga tilo rumu lono. Motong la itor di galiunu tina nen, “Ai, soo so tapa dada a taman ngan kaweteweta a kaparsu ye i?”

³⁴Bong di galiunu tina ngan tiwetewete tiap, sila tikodo be tipalongo leu, yesoo timan dada ngan tiwetewete a tiparsu ye sei tool be iyei kuto mai a imuku pang di i.

³⁵Motong la Yesu du iwur, inbe ikiu di galiunu tina yo sangaul be ru nga, ngan a timan pang ye man iwete pang di. Iyei ne, “Sei tool yo lono be ene mai le imuku pang di diene i, in ole ya taunu irautoo ene le idu lopo, inbe iyei ben kapraingi a ilon di tooltool nga le imot.”

³⁶Motong la ikaua kase mai tiap atu man ipatokode lo ikodo kataunu kidi. Motong la iwookoo, inbe iwete pang di galiunu nen,

³⁷“Kumata sei tool be lon tutau le ikaua kase mai tiap yo nen i a iloni nga, ngan ya in ikau au a ilonau lapau. Inbe kumata sei tool be ikau au a ilonau nga, ngan ya in ilonau leu tiap, bong ilono Tamak yo iwangau a asi i, in lapau.”

³⁸Motong la Yowan iwete pang Yesu nen, “Pannoongoo, am nga amkamata tool atu ipootoo em, inbe inganga di so sadi ye. Le amwete panga a amlele, yesoo ya in iyepe ye budanga kiidi tiap.”