Maga 9:7-38

⁷Gelë häu afädë maala ili neala hagula, gelëgi amilahilä ado afädë säia idogosalea, Goda nïe malö, na boba hamosamelë. Ea säse amo nabualola säi.

⁸Nabalahilä ilia fodolofalï sidawewela beahamelebe ilibalä dolö odoa made, Yesu emu neebe melï.

⁹Ili segebidaia amila digahalea Yesuea ilima gelola sähalea, Dolöïe Malö amo bauia amila aso, made nowela neëgi, dilia melï amo odoama säla ïmabiola säi.

¹⁰Säi amo nabala musügä negelahilä, hilidomu didiähalea, Bauia amila nowelola säi amo edodula didiäha nefolalo.

¹¹Ilia ema nabahalea, Mala dawadigi neebe amolia sähalea, Elaia dafidi moholömelëla säha neebe amo edoïela nabi.

¹²Ea ilima säla obëgësalea, Dofä Elaia dafidi maala nelebo sulubadela neala hahamogimolömelë. Ado abeahäla säla dëdëla negei dialea, Dolöïe Malö amo së yafie molömelë. Odoaea ema bimolö habobamolömelë.

¹³Na dilima säla ïahago, Elaia e misi gaso, ado säla dëdëla negei dibe amo gadola odoa nefolalo amolia ema hamomolö helësëi amo gadoi hamoimelëla säi.

¹⁴Ili awäla ïe bëgëla aulo odoa neebea ami beselagalai. Ilia beahamelebe udia dolö yafie gegedoi amolia ili amaleladigila nea, mala dawadigi amolia ilibalä gëgësa dibe melï.

¹⁵Udia dolö yafie nefolalo amolia Yesu maasebe amo siia bealahilä fodolofalï fudugila e neebea baluluia afufulahilä ilia e gausiai.

¹⁶Amasebegi, ea ilima nabahalea, Dilia ilibalä edo didiäha dialeala nabi.

¹⁷Udia dolö gegedoi amoligi dolö afädëa ema säla obëgësalea, Säla Olelelo, nïe nafegema mugabe fedai amea made adosebegi, di neebea sigi misimelë.

¹⁸Mugabe amo ema fedalahilä nagadaia nidala awälahilä, ïe nafiadi dibu besigala, bese nalëgëlahilä, ïe domalo gelola sosolahamelëla säla ï. Dïe bëgëla aulo nefolalo amolia mugabe fedai amo nesiladigimalai gaso, nesimolö ulïmelëla säi.

¹⁹Amala säsebegi, Yesuea ilima säla obëgësalea, Udia dolö walio nefolalebe dili asigi afädë negei made nebego. Ne dilibalä segeyo aboläia namolödu. Segeyo aboläiagi na dilile yöi gaula namolödu. E nema sigi misiëla säi.

²⁰Amala säsebegi, malö amo ema sigi misi. Sigi maasebegi, mugabe amea Yesu bealahilä fodolofalï malö amo gelola amulämelasilahilä, nagadaia nidala awäla fefede fefedelahilä, nafiadi dibu besigalasi.

²¹Amala hamosebegi, Yesuea malö amoïe eedoma nabahalea, Gowe gadola abodo gala mi gäwila hamosiola nabi. Eedoea säla obëgësalea, Holöfalïgila amaimelë.

²²Mugabea malö go baagomäia nulo gaamugige ödägige neala digalasisamu nelomelë. Dia hamomolöi galëda, nilï bobasëla ugila negemola säi.

²³Yesuea ema sähalea, Dia hamomolöi galëdala säi amo edoïe. Afädëa asigi afädë negei nea galëda, sulubadela hamosa maademolöi neamelëla säi.

²⁴Amala säsebegi, fodolofalï malö amoïe eedo amea üalaladigila sähalea, Na asigi afädë negei. Amai gaso, na asigi afädë negemolöïe dia ugila negemola säi.

²⁵Udia dolö yafie ili neebea baluluia mafula gegedosebe amo bealahilä, Yesuea mugabe amoma nemola sähalea, Dida mugabe, gëhe galasila, ado made adolasilo. Dima gelola sähago. Malö go dïgïla mosö, ema bu fedamabiola säi.

²⁶Amala säsebegi, mugabe amea üalala, gelola amulämelasilahilä doadigila awähalea, malö amo hame doala asi gadoi negesi. Udia dolö yafiea hame doala asi gabula säi.

²⁷Amala hamosebegi, Yesuea malö amo naabogi nabelela nowela ifosisebegi nowei.

²⁸Yesu e mosöa digalahilä ïe bëgëla aulo amolila hilidomu salea ema nabahalea, Nilïa mugabe nesiladigimolö ulï amo abisalea amaidula nabi.

²⁹Amala nabasebegi, Yesuea säla obëgësalea, Nelebo afädë hamose amea made, Godema adose ameamu mugabe amo gadoi nesiladigimolöi dialeamelëla säi.

³⁰Ili amilahilä Galili segeamadi awäla doadigila awäha nelo. Afädëa e abididula made helësëmäia nelo.

³¹Made helësëmäia amoïe mida, ea ïe bëgëla aulo amolima säla olelesalea, Dolöïe Malö amo dolöea gaumäia hololömolömelë. Gaulahilä ilia baagomäia nufulömelë. Baagomäia nufudaseda, segeyo osodagi hï nowemolömelëla säla ïaha nelo.

³²Säi amo nabalahilä ilia helësëi made nea, ema mi nabulö amo bedäi nelo.

³³Ili Gabaniama segea beselagalalahilä mosö afädëïe isogi digalahilä, Yesuea ïe bëgëla aulo amolima nabahalea, Idiafa maahalea dilia edo didiäila nabi.

³⁴Amala nabasebegi, ili maahalea dafidilo neebe amo nowëla didiäla aligi misi amo helësëlahilä, ema säla obëgëla made nelo.

³⁵E fia idogola salea giwilasi amolima mofiamolahilä sähalea, Afädë dafidilo namolöila helësëseda, dafidi hïdale made, udia dolö odoadale ugila negemolöi galeala säi.

³⁶Amala sälahilä ea malö holöbö afädë naabogi nabelela gaula maala ili mogogi ifosilahilä sogobala gaula nea ilima sähalea,

³⁷Afädëa nïe ëigila malö holöbö gowe gadoima obëbëla obeägïseda, nema obeägïsamelë. Afädëa nema obeägïseda, nema obeägïsa maademelë, ne digamalala sälo amoma obeägïsamelëla säi.

³⁸Yonea Yesuma sähalea, Säla Olelelo, dolö afädëa dïe ëi säla mugabe fedai nesiladigisebe amo nilïa bealahilä, amamabiola säimelë. Mida, dolö amoda nilïbalä nawelo made amea hamosebegi säimelëla säi.