SAN MARCOS 9:7-38

⁷Ex chil laqataun taputsꞌi, va laqꞌoqxtꞌaqyaukal. Chivinkal laka taputsꞌi, va naunkal: —Ni aniy kintsꞌal yu kꞌachaniy. La ox kꞌaꞌalasmaktꞌik.

⁸Ex va chuncha, va tus xvilin talakavananꞌol, va jantucha matichun katatꞌatayal. Vamuncha ni Jesús xꞌaman ixyal.

⁹Tejkan taminchoqochalcha ni aspajun ni Jesús va lakjunil ixtꞌaltanan ni jantu matichun katalaqputeꞌenil yu talaqtsꞌil tus tejkan kakujchoqoyaꞌ laka janinin ni yucha, yu Sasꞌatꞌa Lapanaki.

¹⁰Ex chuncha valiꞌiycha vak taval, jantu matichun kataputeꞌenil. Pero siya yuꞌuncha va ixtalalhisakmiy tisuncha naunputuncha ni kakujchoqoyaꞌ laka janinin.

¹¹Ex va chuncha va talhisakmil ni Jesús: —¿Valiꞌiycha yu xajamalaninin yuꞌuncha tanajun ni pꞌunaj kaminꞌelayaꞌ ni Elías ex astan kaminaꞌ ni Cristo yu kamalaqachayaꞌ Dios?

¹²Ex ni Jesús va naul: —Chun, laqsaval, ixchivinti Dios najun ni Elías pꞌunaj kaminꞌelayaꞌ, kalaqlaꞌoxiyaꞌ tachun. ¿Ex tacha lhitsꞌoqkanta la ixchivinti Dios yu Sasꞌatꞌa Lapanaki? Najun ni tejkan kaminaꞌ, va jantu ox katalaqtsꞌinaꞌ, ayaj kamaqanlqajnanaꞌ.

¹³Kitꞌin klajunau qayntaun tacha Elías kilatachilcha. Ni lapanakni jantu katalaqaꞌil, va tamakaꞌol tachun yu yuꞌuncha tamakaniputulcha, va xajchal tacha maqancha tsꞌoqkanta la ixchivinti Dios.

¹⁴Taval taminchoqolcha taꞌan ixtavilanal yu alati ixtꞌaltanan. Laqtsꞌil qaynlhuu lapanakni tus xvilin ixtamalaqachoqoxnuta. Vachu ancha ixtaꞌalinta yu ixtamalaniy ixlhachimoꞌonkꞌan. Yuꞌuncha ixtatꞌajun lalaqꞌaymanin kun ixtꞌaltanan ni Jesús.

¹⁵Tejkan talaqtsꞌil ni Jesús va tus tachun vak takꞌatsal, tatakyaulaqꞌalcha mastakꞌanan ni Jesús.

¹⁶Ex ni Jesús va lakjunil ixtꞌaltanan: —¿Tisuncha tꞌaunatꞌik lalhilaqꞌaymanin?

¹⁷Ex qayntaun xapay yu ancha ixyal, va naul: —Jamalaniniꞌ, yu kitꞌin klhiminitan ni kesꞌatꞌa, va lhitꞌajun yu jantu ox espíritu, va janunuꞌ makay.

¹⁸Mas va toꞌoxtaycha chꞌapayachalcha ni anchanuꞌ jantu ox espíritu tus maqtay lakatꞌun. Aqtayniycha qalpuputamay ni lakatꞌun, tus kꞌatꞌuj kꞌatꞌuj lakmakaniy ixtatsalati, tus ox evij jun ixlakatunaj. Chavay yu mintꞌaltanan klaklhijunil ni palay katamakal pero jantu lay palay katamakal.

¹⁹Ex ni Jesús va naul: —¡Yu uxiknan jantu lay lhakꞌapꞌupꞌinatꞌik! ¿Tus tavanancha kaktamakaunaꞌ kun uxiknan? ¿Tus tavanancha kaklatayaniyaucha? Kꞌalhitꞌantꞌikcha aniy ni tsꞌal.

²⁰Ex va lhiminkalcha ni tsꞌal. Yu jantu ox espíritu tejkan laqtsꞌilcha ni Jesús, va aaqtaun chꞌapachoqolcha. Va maqtal lakatꞌun, maxkapꞌiknil, va qalpuputamalcha.

²¹Ex ni Jesús va naul: —¿La maqancha aqtaynita? Yu japay va naul: —Vananajcha tus ixpulakatꞌunixtucha.

²²Yu jantu ox espíritu tsaj maqtay laka jikmi, vachu lakxkan, va laycha kamaqnilcha. Incha lay makꞌay tuꞌuchun, va knajun kilamapayniu, kilaꞌaqtayjuu.

²³Ex chuncha ni Jesús va naul: —Incha lay lhakꞌapꞌupꞌin. Yu lhakapuꞌanan tus tachun lay makaniꞌokan.

²⁴Ex chuncha yu ixpay va tus pꞌas tꞌasal va naul: —¡Chun! ¡Klhakapuꞌan! ¡Va knajun kꞌiꞌaqtꞌayꞌutꞌi para apalay ox kaklhakapuꞌal!

²⁵Ex chuncha ni Jesús tejkan jalaqtsꞌil ni tatakyauminta alati lapanakni va aqtaynil laqꞌaymay yu jantu ox espíritu, va naul: —¡Uxintꞌi janunuꞌ aqatapa espíritu kꞌatꞌi, kitꞌin kunan kꞌamakꞌaunchꞌoꞌocha ni aniy tsꞌal. Jantucha aaqtaun kachꞌapꞌachꞌoꞌo!

²⁶Ex va chuncha ni espíritu tus sqau tꞌasal, va aqtaun maxkapꞌiknil ni tsꞌal, ex chuncha va taxtunichoqolcha la ixlakatunaj. Va makaul tacha janinicha. Ex chuncha yu alati lapanakni va ixtanajun: —¡Ka va nilcha!

²⁷Pero yu Jesús maqchꞌapal, va maꞌostaulnil, ex ni tsꞌal va tayachoqolcha.

²⁸Ex chuncha ni Jesús va tatꞌatanul ixtꞌaltanan laqa chaqaꞌ. Ex yuꞌuncha va saq talhisakmil ni Jesús, va tajunil: —¿Valiꞌiycha ni kijnankꞌan jantu lay kakmaxtuu ni anchanuꞌ jantu ox espíritu?

²⁹Ni Jesús va jalakjunil: —Incha maxtꞌupꞌutꞌun tacha anchanuꞌ jantu ox espíritu, ex maqskꞌiniy kaskꞌin Dios kun taskꞌajati.

³⁰Ex chuncha tejkan taminchoqochalcha va tatapasal xalakatꞌun Galilea. Ni Jesús va ixnajun jantu matichun kakꞌatsal ni toꞌoxtay taꞌal.

³¹Va ixtꞌajun jalakmalaniniꞌ ixtꞌaltanan ixlaqꞌamankꞌan, va ixlakjuniy: —Kitꞌin yu Sasꞌatꞌa Lapanakni kakmaqxtaqnikanaꞌ la ixtamakakꞌan ni lapanakni. Kintamaqniyaꞌ pero tejkan katapasayaꞌ paqtꞌutu ex kaktakukchoqoyaꞌ.

³²Yu ixtꞌaltanan va jantu ixtamalaqasiy yu ixlakjunkan. Va ayaj ixtatalhauniy xlhiyucha jantu katalhisakmil tisuncha ixnaunputuncha ni anchanuꞌ chivinti.

³³Ex tachaꞌalcha ni laka putaulan Capernaúm. Tejkan ixtavilanal laqataun chaqaꞌ, ex ni Jesús va laklhisakmil, va lakjunil: —¿Tis va suncha ni lhilakchꞌivinatꞌikcha ni lakatin?

³⁴Yuꞌuncha va tus saq taval. Yu lakatin va ixtalhilakchivijminta taꞌayucha yu apalay ay.

³⁵Ni Jesús va taulalcha, va lakjuntaꞌil yu pumakautꞌuy ixtꞌaltanan, va lakjunil: —Incha matichun junputun yu apalay ay, ex maqskꞌiniy kaval yu apalay lakatꞌuniy, tacha qayntaun oqxtamati yu kalaqꞌaqtayjuꞌol tachun yu alati.

³⁶Ex ni Jesús va maqchꞌapaꞌil qayntaun jasꞌatꞌa, va ancha maqayaul la ixtalakaꞌukxpukꞌan. Va chꞌixtaulal ni jasꞌatꞌa, va lakjunil ixtꞌaltanan:

³⁷—Yu laqaꞌiy qayntaun jasꞌatꞌa tacha yu aniy va por chuncha klhinajun ni kitꞌin, yucha vachu kilaqaꞌiy ni kitꞌin. Yucha kilaqaꞌiy jantu vamun ni kitꞌin, vachu laqaꞌiy yu kimalaqachata.

³⁸Ni Juan va junil ni Jesús: —Jamalaniniꞌ, ni kijnankꞌan klaqtsꞌiu qayntaun lapanaki vachu maxtuy yu jantu ox espíritu, va mapaqaꞌuy mintaqaꞌuti. Pero ni yucha jantu kintꞌaltanakꞌan kaval, ex yu kijnankꞌan klaktanchaniu.