مَرَكِ 9:7-38

⁷نَ شَنبِ، نُشُي نَشَ فٌرٌ عٍ شُن مَ، شُي ندٍ نَشَ مِنِ نُشُي كُي، عَ عَ مَسٍن، «ﭑ مَ دِ مَشَنُشِ نَن يِ كِ. وٌ وٌ تُلِ مَتِ عَ رَ.»

⁸نَ عِكْرْشِ رَ، عِسَ قْشِرَبِرّيٍ تٌ عٍ يَ رَفٍ، عٍ مُ مِشِ يٌ تٌ عٍ يِرٍ قٌ عِسَ.

⁹عٍ تٌ نُ نَ فٌرٌقٍ فٍيَ قَرِ، عِسَ نَشَ عَ مَتِنتِن عٍ رَ، عٍ قٍ نَشَن تٌشِ عٍ يَ رَ، عٍ نَشَ عَ قَلَ مِشِ يٌ بّ، هَن بٍيمَنُن عَدَ مَ شَ دِ شَ كٍلِ قَشّ مَ.

¹⁰عٍ نَشَ نَ رَفَتَ عٍ شَشِلِ مَ، عٍ نُ عٍ بٌرٍ مَشْرِن، «عَ تٌ عَ قَلَ عَ عَ كٍلِمَ قَشّ مَ، نَ مُنسٍ مَسٍنشِ؟»

¹¹عٍ نَشَ عِسَ مَشْرِن، «مُنقٍ رَ سّرِيّ كَرَ مْشْيٍ عَ قَلَمَ عَ قٌ عَننَبِ عٍلِيَ نَن سِنفٍ شَ قَ؟»

¹²عَ نَشَ عَ مَسٍن عٍ بّ، «نْندِ نَ عَ رَ. عَننَبِ عٍلِيَ نَن سِنفٍ قَمَ يَتِ، عَ قٍ بِرِن يَءِلَن. عَ مَن سّبّشِ مُنقٍ رَ، عَ قٌ عَدَ مَ شَ دِ شَ تْورّ فبٍفبٍ سْتْ، مِشِيٍ عَ مَبٍرٍ؟

¹³كْنْ ﭑ شَ عَ قَلَ وٌ بّ، عَننَبِ عٍلِيَ حَن بَرَ قَ، كْنْ عٍ بَرَ عٍ وَشْنقٍ بِرِن نِيَ عَ رَ، عَلْ عَ شَ قٍ سّبّشِ كِ نَشّ.»

¹⁴نَ شَنبِ، عٍ نَشَ سَ قْشِرَبِرّ بٌورٍيٍ لِ، عٍ نُن سّرِيّ كَرَ مْشْيٍ نُ نَ شْرْشْقٍ عٍ شَ وْيّنيِيٍ كُي، حَمَ فبٍفبٍ قَن نُ نَ عٍ رَبِلِنيِ.

¹⁵حَمَ قّقّ عِسَ تٌ، عٍ نَشَ كَابَ، عٍ عٍ فِ، عٍ شَ سَ عَ شّيبُ.

¹⁶عِسَ نَشَ عٍ مَشْرِن، «وٌ نُن يٍيٍ نَ وْيّنقٍ يِ مْولِ رَ مُنقٍ مَ؟»

¹⁷شّمّ ندٍ نَشَ عَ يَابِ حَمَ تَفِ، «كَرَ مْشْ، ﭑ قَشِ ﭑ مَ دِ شّمّ نَن نَ عِ شْن، بَرِ مَ حِننّ نَ عَ قْشْ رَ نَشَن بَرَ عَ دّ بٌبٌ.

¹⁸عَ نَ كٍلِ عَ رَ دّدّ، عَ عَ رَبِرَ مَ نّ بْشِ، عَ دّ شُنقّ نُ قَ مِنِ، عَ نُ عَ حِنيِ رَشِن، عَ قَتٍ بِرِن شْرْشْ عَ رَ. ﭑ بَرَ عِ قْشِرَبِرّيٍ مَيَندِ عٍ شَ يِ حِننّ كٍرِ عَ قْشْ رَ، كْنْ عٍ مُ نْ.»

¹⁹عِسَ نَشَ عٍ يَابِ، «وٌ تَن دَنشَنِيَتَرٍ بْنسْي، ﭑ شَ لُ وٌ سّيتِ مَ هَن مُن تّمُي؟ ﭑ شَ تِ وٌ بُن مَ هَن مُن لْشْي؟ وٌ قَ نَ دِ رَ ﭑ شْن.»

²⁰عٍ نَشَ قَ عَ رَ عَ شْن. حِننّ تٌ عِسَ تٌ، عَ نَشَ دِ رَبِرَ كٍرٍن نَ، عَ نُ قَ عَ مَحِندِفِلِن بْشِ، عَ دّ شُنقّ نُ مِنِ.

²¹عِسَ نَشَ عَ بَبَ مَشْرِن، «يِ رَبَمَ عَ رَ كَبِ مُن تّمُي؟» عَ نَشَ عَ يَابِ، «كَبِ عَ دِ مّدِ تّمُي.

²²سَنمَيَ وُيَشِ يِ حِننّ عَ رَبِرَ مَ تّ شْورَ، شَ نَ مُ يٍ، عَلَكٌ عَ شَ عَ قَشَ. كْنْ شَ عِ نْمَ قٍ ندٍ رَ، مُشُ مَلِ. كِنِكِنِ مُشُ مَ!»

²³عِسَ نَشَ عَ مَسٍن عَ بّ، «عِ نَشّ، شَ ﭑ نْمَ. قٍقٍ مُ نَ نَشَن مُ نْمَ رَبَدٍ مِشِ بّ شَ دَنشَنِيَ نَ عَ بّ.»

²⁴دِ بَبَ قَن نَشَ عَ شُي عِتٍ كٍرٍن نَ عِسَ مَيَندِقٍ رَ، «دَنشَنِيَ نَ ﭑ بّ، كْنْ ﭑ مَلِ ﭑ مَ دَنشَنِيَتَرٍحَ شَ قٍ رَ!»

²⁵عِسَ تٌ حَمَ تٌ، عٍ قَقٍ عٍ فِ رَ، عَ نَشَ وْيّن حِننّ رَ، «عِ تَن حِننّ نَشَن بَرَ يِ دِ دّ بٌبٌ، عِ عَ تُلِ شْرِ، ﭑ بَرَ عِ يَامَرِ، فبِلٍن عَ قْشْ رَ، عِ مَن نَشَ عَ تْورْ سْنْن!»

²⁶حِننّ نَشَ سْنشْ، عَ دِ رَكٍتُن عَ رَ عَ حَاشِ رَ، عَ قَ فبِلٍن عَ قْشْ رَ. دِ نَشَ لُ عَلْ عَ قَشَشِ نّ. مِشِ فبٍفبٍ نَشَ عَ قَلَ، «عَ بَرَ قَشَ.»

²⁷كْنْ عِسَ نَشَ عَ سُشُ عَ بّلّشّ مَ، عَ عَ رَكٍلِ، دِ قَن نَشَ تِ.

²⁸عِسَ تٌ سٌ بَنشِ، عَ قْشِرَبِرّيٍ نَشَ عَ مَشْرِن عٍ دٌرٌ مَ، «مُنقٍ رَ مُشُ تَن مُ نْ نَ حِننّ كٍرِدٍ؟»

²⁹عِسَ نَشَ عَ مَسٍن عٍ بّ، «يِ حِننّ مْولِ تَن كٍرِ مَ مِشِ قْشْ رَ عَلَ مَشَندِ نَن تُن نَ.»

³⁰عٍ نَشَ كٍلِ مّننِ، عٍ فَلِلٍ بْشِ عِفِرِ. عِسَ مُ نُ وَ مَ مِشِيٍ شَ عَ يِرٍ كٌلٌن،

³¹بَرِ مَ عَ نُ نَ عَ قْشِرَبِرّيٍ شَرَنقٍ نّ. عَ نَشَ عَ مَسٍن عٍ بّ، «عَدَ مَ شَ دِ سَمَ نّ مِشِيٍ بّلّشّ، عٍ عَ قَشَ. عَ شَ قَشّ شِ سَشَن دَنفِ شَنبِ، عَ مَن كٍلِمَ نّ قَشّ مَ.»

³²كْنْ عَ قْشِرَبِرّيٍ مُ عَ شَ وْيّنيِ قَهَامُ، عٍ مَن مُ سُو سَ عَ مَشْرِندٍ.

³³عٍ نَشَ سٌ كَثّرّنَمُ. عٍ مَن تٌ سٌ بَنشِ كُي، عِسَ نَشَ عٍ مَشْرِن، «وٌ نُ نَ وْيّنيِ مُندُن كِرَ شْن؟»

³⁴كْنْ عٍ مُ سٍسٍ قَلَ، بَرِ مَ عٍ تٌ نُ وْيّنمَ عٍ بٌرٍ بّ كِرَ شْن، عٍ نُ وَ مَ عَ كٌلٌنقٍ نّ نَشَن تِدٍ فبٌ عٍ يَ مَ.

³⁵نَ كُي، عِسَ تٌ عَ مَفٌرٌ، عَ نَشَ يِ مِشِ قُ نُن قِرِن شِلِ، عَ عَ مَسٍن عٍ بّ، «شَ مِشِ يٌ وَ قِندِقٍ يَرٍرَتِ رَ، قٌ نَ كَنيِ شَ قِندِ بِرِن شَ شَنبِرَتِ رَ، عَ قِندِ بِرِن هَيِ قَنمَ رَ.»

³⁶عِسَ نَشَ دِ مّدِ ندٍ تٌنفٌ، عَ عَ تِ عٍ تَفِ. عَ نَشَ دِ مّدِ دْشْ عَ سَن مَ، عَ قَ عَ مَسٍن عَ قْشِرَبِرّيٍ بّ،

³⁷«مِشِ يٌ نَشَن يِ دِ مّدِ مْولِ رَ سّنّمَ ﭑ شِلِ رَ، نَ كَنيِ بَرَ ﭑ تَن يّتّ يَتِ رَ سّنّ. مِشِ يٌ ﭑ نَسّنّ، نَ كَنيِ مُ ﭑ تَن فبَنسَن شَ رَ سّنّشِ. عَ بَرَ ﭑ شّيمَ قَن نَسّنّ.»

³⁸يَيَ نَشَ عَ قَلَ عَ بّ، «كَرَ مْشْ، مُشُ بَرَ شّمّ ندٍ تٌ عَ حِننّ كٍرِ مَ مِشِ قْشْ رَ عِ شِلِ سَابُي رَ. مُشُ بَرَ كَتَ عَ شَ بَ نَ مَ، بَرِ مَ عَ مُ بِرَشِ وٌن قْشْ رَ.»