San Marcos 9:7-38

⁷Chiy horqui biat tuby zá bcuaa blda quiadeb. Ne láani záqui bíeny rsee tuby ni gunii: —Bnietré rac Llingaana ni la rcaaza. Gulcuadiag xtiidxbɨ.

⁸As bguiaadeb iranezte, per aquɨtru tu zuguanéti Jesús. Tubyziny azuguaany ruy.

⁹Chiy deni zedyiatdeb quia danyqui, ax raipy Jesús laadeb quɨt tu güénetideb diidx xte ni gunádeb axtisy chi agubíi gubány Bniety ni bxiaald Dios.

¹⁰Parzi ax laaizdeb nándeb xi gunádeb ne rnabdidxsaadeb xi zelo ni ibíi ibánny stuby.

¹¹Chiy gunabdiidxdeb Jesús: —¿Xínii rnii de maistrɨ ni nán ley dec nidoote Elías ná par gueed?

¹²Ax raipny laadeb: —Didxldíquɨy nidoote Elías gueed ne laab cuexnezbɨ irate. Per, ¿xínii rnii lo xquiits Dios dec Bniety ni bxiaald Dios ná par teedbɨ guelzii ne quɨt tu icaazti laab?

¹³Rguixtiia lot dec Elías abeedbɨ ax bannédeb laab zectisy ni bcaazdeb, zec ni rnii lo xquiits Dios ná par teedbɨ.

¹⁴Deni biecquideb rut zuguaa iraru de xpɨnny ax gunádeb dec zienguilliú de bniety zuguaa ruy. Chiy tuby tiop de maistrɨ ni nán ley cachaadeb lo diidx cun de xpɨny Jesús.

¹⁵Chi gunádeb zéed Jesús, iratedeb rdxalo ne rlluuinzadeb güechalodebny.

¹⁶Chiy gunabdiidx Jesús laadeb: —¿Xiy ruenétdeb?

¹⁷Ax cuaby tuby de bniety ni zuguaa ruy: —Maistrɨ, rurén zednía llingaana pur nuu tuby bɨndxab láanby ax absáaniy laaby gúp.

¹⁸Ne ruttispac zuguaaby rzáaldiy laaby chi rungui láanby. Chiy rdiia btsɨ́ny nez ruuby ne rolaiby chiy digaizy rllungby. Azagudiinia lo de xpɨnbiu par nibéedeb bɨndxabqui láanby, per quɨt güeleeti.

¹⁹Chiyru cuaby Jesús: —¡Xípalza laat niy quɨt reldilaaztɨ! ¿Xátidxaza rquiiny suguanía laat? ne, ¿xátidxa güelaaznía laat? Gultané bniinquɨ rurén.

²⁰Chiyru bdzɨɨdeb bniinqui lo Jesús. Per chi guná bɨndxabqui laany, hóracqui bannéy bniinqui zec ni rac guelguidx ratiia. Bzáaldiy laaby lo guɨchliu, rtuuibtiby ne rdiia btsɨ́ny ruuby.

²¹Chiy gunabdiidx Jesús xtadby: —¿Gúcti guzulo racby zeec? Ax cuaby xtadby: —Desde bichiinby.

²²Ne zienzi güelt abzáaldɨng laaby lo bal ne lo nis par gatyby. Ningui, bel chalee gacnébiu dunnɨ, gucnérubiu dunnɨ, bgábiu dunnɨ.

²³Chiy raipy Jesús laab: —¿Xínii rniiu dec bel chalee? Irate zelee par ni reldilaaz nare.

²⁴Chiyru gurɨxtia xtad bniinqui: —¡Reldilaazla laabiu, gucnébiu nare chaldilaazrupaca laabiu!

²⁵Chi guná Jesús dec zieny de bniety acadxasaa ax gudildnény bɨndxab ni nuu láani bniinqui, raipniy: —Bɨndxab gúp ne cuaat, nareniy canabiia liú idiuu láani bniinquɨ. Ne quɨtru yaicquitiu láanby stuby.

²⁶Chiy gurɨxtia bɨndxabqui ne bannéngui laaby zec ni rac guelguidx ratiia. Ax bdiiangui láanby, bsáaniy laaby zec tuby bɨnguty parzi rnii de bniety dec acpac gutyby.

²⁷Per Jesús gunaazny naaby par güesteby ax guzuldíby.

²⁸Chiyru biiu Jesús laniuu cunzi de xpɨnny, ax gunabdiidxdeb laany: —¿Xínii quɨt güeleeti nibéen bɨndxabqui láani bniinqui?

²⁹Chiy raipy Jesús laadeb: —Par idiia saa de bɨndxabré ná par icuuantɨ ne inaabtɨ lo Dios.

³⁰Chi bzadeb nezqui gudeeddeb nez Galilea. Per Jesús quɨt rcaaztiny gacbee de bniety cadeedny nezqui

³¹pur ni caguixteeny lo de xpɨnny, cayaipny laadeb: —Nare Bniety ni bxiaald Dios, zaca entriagu laznaa de bɨny ax sguinxúdeb naa. Per ni rion dxi ni agudindeb nare, sbíi ibánia stuby.

³²De xpɨnny quɨt racbeetideb xi zelo ni rniinyqui ne rdxibzadeb ninabdiidxdeb laany.

³³Chi bdzɨndeb Capernaum, deni bdzɨndeb yuu rut suguaadeb, chiy gunabdiidx Jesús laadeb: —¿Xiy rueet nez deni zioopnɨ?

³⁴Per laadeb quɨt xi guniitideb, te pur chi zéeddeb nez caniideb tu mazru sac lodeb.

³⁵Chiyru guri Jesús ax gurɨdxny irate tsɨbtiopdeb, raipny laadeb: —Belati nuu ni rcaaz gac ni mazru sac lot, ná par gúnbɨ laab zec tuby ni quɨt xi sacti ne gúnzacbɨ sirvɨ lo iratectɨ.

³⁶As cuáany tuby bniniin bzuubny glaydeb, chiy gudeezny laaby ax raipny laadeb:

³⁷—Tutix ni gacné tuby bniniin pur nare, laab cayacnéb nare, ne gati naaistia cayacnéb sino que néza ni bxiaald nare.

³⁸Chiy raipy Juany Jesús: —Maistrɨ, gunán tuby bniety ni rbée bɨndxab láani lazdoo de bniety pur guelrnabee xtenbiu. Per dunnɨ rdxaipnɨb quɨtru gúntib ziy te pur quɨt candzanétib dunnɨ.