Mak 9:7-38

⁷Eme ma asi kandrah asahan ma tubuluhi oro, ya sahou ari asahan bolo asi kandrah nane asehek i buku doh, “Idah naduk handru. Jo aseken iy labai, ya ado kanuhun sahou tan.”

⁸Eme suwi labai oro anyolom ili, ma oro batou ari lau hawe oro bwe, arile Jises le ari.

⁹Eme oro are bwele-e mandrei ame andri, Jises batanau oro i buku doh, “Saba lakou ado ndratou ma ndranuhun, ado sasehek sala ta ari ndramak, ili winiya le Nadu Ndramak Awas amak ereu bolo lek tan eme loken.”

¹⁰Eme oro basehek bwe, toro le, eme udu ndrokowa oro le, oro ndremenya oro ta saba moson, “Ta amak ta imek tan,” ma i buku sah handru.

¹¹Eme oro ndremenya Jises i buku doh, “Buku sah iri lau ta leheya kandriyen tiri Juwis anya Alaija kameh eme bwena op?”

¹²Eme iy tiye i toro anya, “Sahou badeh, handru. Alaija eme bwena handru ta lowosa iri lakou mari. Ya i buku sah handru ja sahou mene torowenei anya idah kameh Nadu Ndramak Awas kameh akohok sisi-in solo-an ma iri kameh bwale iri iy?

¹³Arile jo asehek tado i buku doh, Alaija ndrame, arile iri an hamon ta budon tiri amwenen, ya iri amekes iri kandriyen mari i badan, i buku none ndratorowenei sihiden.”

¹⁴Eme oro ame hawe oro lau ra-on ja ta Jises, eme oro anyolom lau solo-an solo-an awudi oro ma iri lau ta leheya kandriyen tiri Juwis ame andres hawe oro lau ta Jises.

¹⁵Eme nawin bwe, iri lau atou Jises ma mani iri atur ma iri sakaliye ala hawen ma sekesek ma anyumos badan.

¹⁶Eme ya Jises ndremenya oro lau tan, “Ado andres hawe iri ta sasah handru?”

¹⁷Eme ndramak ari udu bolo iri anya, “Ndramak ta leheya, jo atiye naduk eme hawem ai, tasah malawin ndra-in udu la-un, ya iy winiyan basehek sahou bwe.

¹⁸I buku none asahan, malawin ndra-in kameh moraha iy i andri bada ndren, ma bubusi bohon eme len ma iy andrebek lihin ale, ma iy sorokok en. Eme jo tiye oro lau tam katikahei malawin ndra-in doh ki-iu, arile oro winiyan batikahei ba-au bwe.”

¹⁹Eme Jises tiye i toro, “Ado lau mwan ma badih batehei budon tado handru bame tek bwe. Len sabe kameh jo kereu hawe ado, ano ado barala tanan boto-on ta Kindrei? Ado katiyani nah badeh, keme hawek.”

²⁰Eme oro tiyani iy i hawen. Eme malawin ndra-in anyolom Jises, ma iy morohani nah dah i andri bada ndren ma iy tundrundru ma bubusi bohon atau.

²¹Eme Jises ndremenya tama i nah nane dah, “Malawin ndra-in udu la-un len sabe handru?” Eme iy anya, “Iy ma nadu bwisik le badeh, asahan ai.

²²San solo-an iy moraha iy i jih ma i gwa anya kamekes iy kimek. Ya i buku none saba lakou ou winiyan mesekei, ya ou tikisi aso, ma ou sebenei aso!”

²³Eme Jises tiye i tan i buku doh, “I buku sah handru ou anya, i buku jo winiyan? Lakou mari winiyan asahan i tare lau i buku none budon tan handru in tek.”

²⁴Eme tama nah nane dah aloh, “Laban, jo badeh, budon tek sese le in tam, arile ou aseben jo ja ya budon tek handru ki tam.”

²⁵Eme ya Jises anyolom iri lau solo-an solo-an sakaliye a le se ame, eme iy tiye sahou boto-on i ta malawin ndra-in anya, “Ou malawin ndra-in, ou bohom bwe, ou ndranyem siu, jo tiye tam, ou ame len tan ma ou same hamon ja ai!”

²⁶Ano malawin ndra-in nane anyar ma iy morohani i nah dah i andri ma iy amei, eme ma malawin ndra-in nane udu bwele-en eme len, ya i nah mwan dah sorokok i buku none iy ndramak, eme iri lau solo-an anya ja, “Iy ndramak.”

²⁷Arile Jises tawi minen, ma suri iy eme loken.

²⁸Eme Jises iu i asiu, ma oro lau tan ndremenya iy anya, “Buku sah handru ya aso winiyan batikahei malawin ndra-in nane iu bwe?”

²⁹Eme iy tiye i toro, “Lakou i buku dah winiyan batikahei bame len na saba san ja bwe, arile na salom i ta Kindrei le winiyan ai.”

³⁰Eme ma, Jises hawe oro lau tan ruwani kon doh ame len, ma oro adek ales au ala bolo Galili. Ya Jises bwalen lau sala tanan ta iy udu heh handru.

³¹Tasah iy anya kaleheya oro lau tan, “Iri kameh atehei Nadu Ndramak Awas ili mine iri lau. Ya iri lau kameh adai iy imek. Ano len ma taloh ja kameh iy amak ja.”

³²Arile budon toro baleu ta sahou tan nane bwe, eme oro anoh ta ndremenya iy.

³³Eme oro ame asahan Kapena-um, oro ame ala ado bolo asiu ra-em. Eme Jises ndremenya oro lau tan, “Ado andres ta sasah nane an san?”

³⁴Arile, oro batiye randra sahou bwe, tasah oro adek san doh, oro le andres oro, ta are handru udu bwele-en toro mari.

³⁵Eme Jises manyah udu andri, ano iy luhi oro lau tan ma ronoh la-uh ame hawen, ano iy tiye i toro, “Are lau anya ki bwena badeh, iy ki-in ndrobek, ma iy ki ndrahu so-ok ta lau mari.”

³⁶Eme Jises andrei nadu nah ari nadu bwisik eme ales ereu ndrokowa oro. Eme iy awudi iy na minen ya eme iy tiye i toro,

³⁷“Ya buku none ari ndramak abudon jo, ya iy aseben ari nadu nah bwisik buku nah dah, badeh iy aseben jo. Ma are lau oro aseben jo, badeh, oro baseben jo le bwe, arile oro ale aseben Kindrei iy nane suni jo eme dah.”

³⁸Eme Jon tiye i ta Jises, “Ndramak ta leheya, aso atou ndramak ari atikah malawin ndra-in eme len na boto-on ta nyaram, ya eme aso anya kabarah iy, tasah iy badu hawe to bwe.”