Marcos 9:7-38

⁷Nu gorzee lee tub xkaw nze, nu ngu re xaa leen xkaw zee. Nu leen xkaw zee mroo tub bos kwaan nzhé: —Xaa ne nak xgaan na, xaa nkedoola na. Bin gu xtizh xaa.

⁸Gorna mwii re xaa stuba, nyentra cho mlu lo re xaa, techosa Jesús nzo.

⁹Gorna mla re xaa yek yi Jesús nzhé lo re xaa: —Nik tub lo nayét gu kwaan mlu lo gu, axta zhin mbizh kwaan lee na roban, Xaa Mzhin Ngok Myet.

¹⁰Mbin re xaa kwaane, nu nik tub lo nanzhét xaaya. Per zyen welt nabdizh xaa lo wechxinn xaa xomod nak kwaan roban xaa ba.

¹¹Zee mnabdizh yon xaa lo Jesús: —¿Chozhiin nzhé re maestr xaa nlu xtizh Dios, yanertlaka Li yaad?

¹²Jesús nzhé: —Wliya. Li nkin yaad yilo, zee dexkwaa xaa rese kwaan. ¿Chozhiin nzhé xtizh Dios: “Lee Xaa Mzhin Ngok Myet nzhaal ded doo bid, nu tira nangaknont xaa lo re myet”?

¹³Per lee na nii lo gu, mbiidla Li, nu nawent mle re xaa lo xaa, mod nzhekla re xaa mle xaa xaa, kwentaxa nkee lo Xkyech Dios.

¹⁴Leezha mbare Jesús kwaan Pér, Chag, nu Juan, leezha ngwa xaa yek yi, mzhin xaa paro nzhi stub naz re xaa mseed lo Jesús, nu ngune Jesús zyen doo xaa nzhi baa. Nu lee re maestr, xaa nlu xtizh Dios, kadildiizh kwaan re xaa mseed lo Jesús.

¹⁵Nu gorna ngune re xaa lo Jesús mdedyall xaa, nu mrexonn xaa nzhé xaa “dix” lo Jesús

¹⁶Nu lee Jesús mnabdizh lo re xaa: —¿Cho kwaan ndildiizh re gu kwaan stub naz xaa ne?

¹⁷Nu lee tub xaa nzo lo re xaa, mkeb nzhé: —Maestr, na nzeno xgaan na lo lu. Nzho tub mbi mal lextoo mad, nanlaata wdizh mad.

¹⁸Palpa nzo mad, nzen mbi mal mad nu ngobiya mad lo yo; nu nroo bchiin roo mad, nu ntaaw mad keleyy mad, nu nseli mbi mal mad. Ngunaab na jabor lo re xaa kaseed lo lu, zee koo xaa mbi mal lextoo mad per nangarlot ngoo re xaa mbi mal lextoo mad.

¹⁹Jesús mkeb nu nzhé: —Myet xaa ned, xaa nanet wii lo Dios. ¿Axta pa gor yiche lextoo na ne na re gu? ¿Axta zlak mbizh nzhaal zo na lo re gu? Teno xgann lu nee.

²⁰Zee mbe xaa mad lo Jesús. Nu gorna ngune mbi mal zee lo Jesús, mlebi mbi mal mad lo yo nu mle mbi mal mzhib mad tub yizhgutye. Nu mbaxche mad lo yo, nu mroo bchiin roo mad.

²¹Jesús mnabdizh lo xuz mad, nu nzhé: —¿Pok mzelo mad snee nzhak mad? Nu lee xuz mad mkeb nu nzhé: —Axta leezha win mad mzhiba.

²²Nu zyen doo welt ngobi mbi mal mad lo ki, leen nis, nel nzhekla mbi mal gut mad. Cheleeya nzho mod koo lu mbi mal lextoo mad, bles lextoo lu ne lu nu, le yudar nu.

²³Jesús nzhé: —¿Chozhiin né lu che nzho moda? Rese kwaan nzho mod chelee lu ngwii lu lo Dios.

²⁴Nu gorzee mkeb xuz mad dublegan, nu nzhé xaa: —Ngwii na lo Dios, ble yudar na zee nzho mod masra wii na lo xaa.

²⁵Nu gorna ngune Jesús zyenra xaa nzhazhin, zee mgalno Jesús mbi mal, nu nzhé xaa: —Mbi muud, nu mbi nkwee, na nabeey lo lu, broo lextoo mad nu nabaretra lu zeeb lu lextoo mad stub welt.

²⁶Nu lee mbi mal zee mrazhe, mle mzhib mad stub yizhgutye naro stub welt, nu lee mbi mal zee mroo lextoo mad, nu mlaa mbi mal mad mod mad ngut. Zee lee re xaa nzhi baa nzhé: —Ngulola ngut mad.

²⁷Nu lee Jesús mzen yaa mad nu mlis mad, nu lee mad mzoli.

²⁸Nu gorzee mzeeb Jesús leen yoo kwaan nebse re xaa mseed lo xaa, zee mnabdizh re xaa lo Jesús: —¿Chozhiin nyent mod ngoo nu mbi mal ba?

²⁹Jesús nzhé: —Rese klas mbi mal ne nagarlot roo sbaasa, yilotlaka nkin naab guya lo Dios.

³⁰Gorzee lee Jesús mroo zee, nu mded xaa yizhyo Galilea kwaan re xaa mseed lo xaa. Nzhekla xaa nik tub xaa nanet pa zo xaa.

³¹Kwaanzee kaseed Jesús re xaa mseed lo xaa nu nzhé xaa: —Na nak Xaa Mzhin Ngok Myet. Nu zaa xaa na lo xaa nak zhiin zee gut xaa na, per mbizh yon lee na roban.

³²Namlat wdizh ne yek re xaa, per nzheb re xaa nabdizh xaa lo Jesús.

³³Nu mzhin xaa yezh le Capernaum. Leezha mzhin xaa roo yoo, Jesús mnabdizh lo re xaa mseed lo xaa: —¿Cho kwaan tant mdildiizh guya naz?

³⁴Per nik tub xaa namkebt, nel leezha nzo re xaa naz nzhé re xaa: “¿Cho be nak xaa mas non?”

³⁵Zee mzob Jesús nu mrezh Jesús re chiibchop xaa mseed lo xaa, nu nzhé Jesús lo re xaa: —Chelee tub gu nzhekla gak xaa mas non, nkin gak gu xaa nadoo doo nu kee gu zhiin lo rese xaa.

³⁶Nu mzo Jesús tub madwin xsaww lo re xaa, nu mdeezh Jesús mad, zee nzhé Jesús lo re xaa:

³⁷—Loka cho kayaa madwin ne nel nkela xaa na, noka mkayaa xaa na; nu loka cho kayaa na, noka mkayaa xaa xaa mxaal na.

³⁸Juan nzhé lo Jesús: —Maestr, ngune nu lo tub xaa ngoo mbi mal kwaan le lu, per nanakt xaa tub xaa kaseed kwaan nu. Kwaanzee nzhé nu lo xaa: “Nalet lu kwaan ba”.