Mak 9:7-38

⁷Keu jaruba kiniga unuŋunuŋ tuat lalamŋi asakmararaŋambuk kunöŋ eta aumŋan esuhum eŋgiiga miaŋgö uruŋeyök qet kun kewö eriga mötket, “Azi ki nani wölböt nahöna akza. Mönö yaŋgö keuŋi möta malme.”

⁸Keu mi möta könöpuk liliŋgöm purik um jaruba tosatŋi kunbuk qahö etkeketka Jisösnöŋ nanŋök yembuk kinök. Mewö.

⁹Kunduŋeyök etketka Jisösnöŋ sörökŋi miaŋgöreŋ kewö jim kutum eŋgiyök, “Iŋini yuai ekzei, miaŋgö buzupŋi mi mönö ambazip kun kude jiget mötme. Suep gölmegö azi ölŋan kömupnöhök wahöriga miaŋgö andöŋe mi ölöp jim asariba malme.”

¹⁰Mewö jim kutum eŋgiiga gwarekurupŋi karöbut yeŋön keu mi uruŋine aŋgön köla “kömupnöhök wahötwahötkö” könaŋi mi nanŋini qesim aŋguba eraum mötket.

¹¹Eraum möta Jisös kewö qesim waŋgiget, “Köna keugö böhi yeŋön mönö keu kewö jimakze, ‘Kezapqetok azi Elaijanöŋ mönö Suepnöhök mutuk eta asuhuma.”

¹²Qesim waŋgigetka meleŋda kewö jiyök, “Elaijanöŋ mutuk eta asuhuba malmal pakpak möhamgöma. Keu mi ölŋa akzapmö, keu kun ki mönö wuanöŋgöra ohoget ahöza: Suep gölmegö azi ölŋan mönö sihimbölö gwötpuk möriga jijiwilit ak waŋgime.”

¹³Keu yahöt mi ahözahotmö, nöŋön kewö jibi mötme: Elaijanöŋ lök eta asuhuyökmö, yaŋgöra Buŋa keu ohoget ahözawaŋgö dop ambazipnöŋ i nanŋini sihimŋini wuataŋgöba laŋ ak waŋgiget.” Mewö.

¹⁴Jisös aka gwarek karöbut yeŋön kunduŋeyök eta gwarekurupŋi tosatŋi yeŋgöreŋ kaba yuai kewö eket: Köna keugö böhi tosatŋan kinda yembuk jitnakölik aka goranora keu jigetka ambazip jesöŋgöŋan liliköba eŋgeka kinget.

¹⁵Mewö kinda ambazip kambu pakpak yeŋön Jisös eka miaŋgöreŋök auruba kiŋkiŋgöba kösutŋe anda jölöŋi jiget.

¹⁶Jölöŋi jigetka kewö qesim eŋgiyök, “Iŋini wanatköra yembuk jitnakölik aka goranora keu jize?”

¹⁷Qesim eŋgiiga kambuŋineyök azi kunöŋ meleŋda kewö jii mörök, “Böhi! Nöŋgö nahöni ömenöŋ numbuŋi muhungöba töŋöt mem waŋgiiga waŋgita göhöreŋ kazal.

¹⁸Mi miaŋgöreŋ me miaŋgöreŋ memba mendawöla öröm giliga eta qeba numbuŋeyök qölqöl söutsöut eriga irimŋi yöhözömgöba sileŋan sölöpkömakza. Mewö ahiga kaba göhö gwarekurupki ulet eŋgiba öme mi wuataŋgömegö jizalmö, yeŋön osize.”

¹⁹Mewö jiiga meleŋ waŋgiba jiyök, “Gölmegö yaŋgiseŋ ambazip yei! Mönö nalö dawik embuk mala qatön eŋgubiga Anutu qahö möt narigetka sihimbölö mötmam. I mönö waŋgita nöŋgöreŋ kaget.

²⁰Mewö jiiga waŋgita yaŋgöreŋ kaget. Kagetka ömenöŋ Jisös eka miaŋgöreŋök morö utuköba urepköm waŋgiiga wölöhariba tala gölmenöŋ qeba pöraŋpöraŋ mitiba semben auba ahöiga numbuŋeyök qölqöl söutsöut kota erök.

²¹Jisösnöŋ mi eka iwiŋi kewö qesim waŋgiyök, “Nalö dawikö dop yuai ki lök asuhum waŋgiiga kotza?” Qesim waŋgiiga jiyök, “Mi lök morörökŋeyök asuhum waŋgiyök.

²²Mi mem bölim waŋgimamgöra nalö tosatŋe könöpnöŋ, nalö tosatŋe onöŋ metal waŋgiiga nalö gwötpuk geba qebayök kinahakza. Mewömö, miaŋgö kukösumŋi kun göhöreŋ ahöza ewö, mönö ak kömumba bauköm netkiman.”

²³Mewö jiiga jiyök, “‘Kukösumŋi göhöreŋ ahöza ewö,’ jizan. Anutugö kukösumŋan mönö yuai kungöra qahö qakömakza. Anutu möt narizawaŋön mönö yuai pakpak ölöp ahakŋa.”

²⁴Mewö jiiga iwiŋan miaŋgöreŋök qeta jiyök, “Anutu möt narizalmö, mötnaripnan lölöwöröŋi akza. Mötnaripni mönö mem köhöiman.”

²⁵Jiiga ambazip jesöŋgöŋan ösumŋinan kaba kingetka eka miaŋgöra öme mi kewö jim waŋgiyök, “Gi töŋöt aka kezapduhupkö ömeŋi, nöŋön jim kutum gihizal: Gi mönö azi ki mosöta kota anda kunbuk kude liliŋgöba kaman.”

²⁶Jim waŋgiiga qeta silata morö mi utuköba könöpuk urepköm waŋgii wölöhariiga utala kota anök. Kota aniga qeba qamöt tandök aka ahöiga gwötpukŋan mi eka “Wösöŋi alja!” jiget.

²⁷Mewö jigetmö, Jisösnöŋ böröŋe memba köbibiiga wahöta kinök.

²⁸Mewö kiniga Jisösnöŋ miri uruŋe öŋgöiga gwarekurupŋan nanŋinök tata kewö qesim waŋgiget, “Neŋön mönö wuanöŋgöra mi naninök wuataŋgöbingö osizin?”

²⁹Qesim waŋgigetka kewö jii mötket, “Öme tandökŋi mewöŋi mi mönö köuluköba nene siŋgi mala wuataŋgöbin. Yuai murutŋi kun ahinga qahö kota anma.” Mewö.

³⁰Jisösnöŋ gwarekurupŋi yembuk miri gölme mi mosöta anda Galili prowins uruŋe liliköba denike malgeri, mi kunŋan mötmapkö tököyök.

³¹Mia tököba gwarekurupŋi kusum eŋgimamgöra ölöŋ anget. Könanöŋ anda keu kötŋi kewö jii mötket, “Anutunöŋ Suep gölmegö azi ölŋi mi gölme ambazip yeŋgö böröŋine al waŋgii gema. Geiga i qegetka kömuma. I qeget kömui wehön karöbut teköiga miaŋgöreŋ mönö kömupnöhök wahötma.”

³²Keu kötŋi mewö jii mötketmö, mi qahö möt kutuget aka könaŋi denöwö, mi qesibingö kölköldömdöm aket. Mewö.

³³Mewö anda Kaperneam taonöŋ kaŋgotket. Miaŋgöreŋ kaŋgota nanŋi miri uruŋe öŋgöba gwarekurupŋi kewö qesim eŋgiyök, “Iŋini Könanöŋ kaba wani keuya eraum mötze?”

³⁴Yeŋön könanöŋ kaba ‘Daŋön öŋgöŋgöŋi akza’ mia nanŋinök eraum möta kaget. Miaŋgöra qesim eŋgiiga keu bök tatket.

³⁵Keu bök tatketka Jisösnöŋ geba tata gwarekurupŋi 12 eŋgoholi kagetka kewö jii mötket, “Kunŋan mutukŋi malmamgö mötza ewö, yaŋön mönö körek eŋgö nembö bapŋine eta qöndökŋi aka tosatŋi pakpak welen qem eŋgimakŋa.”

³⁶Mewö jiba namande moröŋi kun memba sutŋine ali kinök. Kiniga böröŋan memba tambuŋe ala kewö jii mötket,

³⁷“Kunŋan namande kewöŋi kun nöŋgö qetne miriŋe köl öröba köyan kölmawi, yaŋön mönö ni köl öröm niŋgima. Kunŋan mewö ak niŋgizawi, yaŋön niyök qahöpmö, daŋön melaim niŋgiyöhi, mönö i mewöyök köl öröm waŋgima.” Mewö.

³⁸Jonöŋ Jisös kewö jii mörök, “Böhi! Nini azi kun neŋgö andönine qahö kayöhi, yaŋön göhö qetnöŋ ömewöröme közöl eŋgiiga ehin. Yaŋön nembuk qahö liliköba maljawaŋgöra nini i qetal waŋgiin.”