1Purayitiyi mungarrtji palula tjana Yiitjunya kuḻpingka ngarritjunkula wantingu. Palulanguru Tjarritiyi palula, tjiṉṯu tjarrpanyingka ngaṉṯiya minyma tjuṯa yanu nyiṯi paṉṯi palya payimilantjaku. Tjana kuliṉu, “Nganaṉa aaḻilingku yankula Yiitjula mirringka nyapantjaku.” Minyma paluru tjana yini yalatjiya nyinangu, Miiri Makatalanya ngurrara, Tjalumanya, Miiri kutjupanya Tjayimitjaku maama.
2Tjuuntiyi, aaḻi tjiṉṯu pakantjalaya paluru tjana kuḻpi palulakutu yanangi.
3Ngururrpa yankula tjana wangkayinangi, yalatji, “Nganalulampa puḻi tiṉa ruulamilara alytjuranku?”
4Waṉmanguruya tjana nyangu, puḻi tiṉa palunya ruulamilara alytjura wantingutja ngarangu.
5Kuḻpingkaya yunngu tjarrparra yangupala mantarra tjulkuratjarraya nyangu, yunngu nyinanytjala. Nyakulaya puntura nguḻurringu.
6Palulanguru yangupala paluru tjananya watjaṉu yalatji, “Nguḻuwiyaya ngarama! Nintingku ngayulu kuliṉi, nyurrangarri ngurriṉi Yiitjuku, Natjaritjanya ngurraraku, waralyngarala mirrirringutjaku. Paluru kanarringkula pakaṉu. Ngalyankulaya nyawa ngaangka yunngu!, mirri ngarritjunutja, wiyalpi ngarrinyi.”
7Yangupala paluru tjananya piyuku watjaṉu, “Manta Kaliliyilakutu paluru maa yananyi. Ngurra palulanyurra yankula palunya nyaku. Ngurra palula nyurrangarrinya nyakunytjaku Yiitjulu yirriṯi watjaṉu. Wangka ngaatjanya nyurrangarri yankula tjakultjurra!, palumpa kutunguḻu tjuṯangka, Piitalaṯarra.”
8Minyma paluru tjana kuḻpinguru pakara nguḻu tititingarala tjalkaḻungu. Ngururrpa yankula tjana wiya yaṉangu kutjupangka watjaṉu, tjana tjukarurru Yiitjuku kutunguḻu tjuṯakutu yanu. Kutjupalu wangka ngaatjanya wakara tjunu.
9Yiitjunya Tjuuntiyi aaḻi mirringuru pakaṉu. Miiri Makatalanya ngurrarala yurrunpa yutitjarringu. Kutjupa tjuṯangka tjananya ngaṉṯi yutitjarringu. Miiri palula yirriṯi Yiitjulu mamu tjapanpala payira wantirriyaṉu.
10Aaḻi Miiri paluru Yiitjula wangkarra yanu palumpa kutunguḻu tjuṯangka wangkanytjaku. Miirilu tjananya nyangu kutu yulanyingka. Yalatjiya kuliṉingi, “Mayutjulampa kuunyi mirrirringu.”
11Miirilu Yiitjunya kana nyakula watjaṉulpi, tjananya palumpa kutunguḻu tjuṯangka. Palumpa wangka tjana kulira wantingu.
12Palulanguru Yiitjunya palumpa kutunguḻu kutjarrangka yutitjarringu, ngurra kutjupakutupula ruutuwana ngururrpa yananyingka. Paluru kutjarrangku Yiitjunya yuṉpa kutjuparrinytja nyangu.
13Nuumilaralpipula ngaṉṯikutu Tjarutjalumalakutu yankula watjaṉu tjananya Yiitjuku kutunguḻu kutjupa tjuṯangka. Wangka pulampa piyuku tjana kulira wantingu.
14Palulanguru Yiitjunya palumpa kutunguḻu lipinpalangkalpi yutitjarringu, mangarri tjana ngalkuntjala. Yutitjarringkula Yiitjulu tjananya payiṉu, mirringuru kana nyinanytja nyakulaya watjaṉingka, kulira tjana wantinytjala.
15Watjaṉu tjananya yalatji, “Yankulanyurra manta tjuṯawana ngayukuṉu wangka tjakultjurinama!, yaṉangu tjuṯangka.
16Tjinguru yaṉangu tjuṯangku wangka palunya kulira papatatji mantjintjala, Katutjalu tjananya kanara palumpa ngurrangka nyinatjunku. Ngayuku wangka kulira tjana wantinytjala Katutjalu yaṉangu palunya tjuṯa mirritjunku, wiya paluru tjana Katutjaku ngurrangka nyinaku.
17Yaṉangungku ngayukuṉu wangka kulira ngayukuṉu paawutjarrangku yalatji palyalku. Yini ngayunya watjara ngayukuṉu paawutjarrangku mamu payira wantirriyalku. Yaṉangu ngayuku walytja nyinarra, paluru wangka kutjupa nguwanpa wangkaku Katutjanya waḻkulkitja.
18Yaṉangu ngayuku walytjangku kutjupakutjura piḻkaṯi mantjira kanyilku patjantjawiya. Tjinguru palyakutjura puutjina tjikira ngayuku walytja palya nyinaku. Pikatjarra ngarrinyingka ngayuku walytjangku pampura kanalku. Yalatji paawutjarrangkuya palyantjala kutjupa tjuṯangkuya yalatji kulilku, ‘Yilta, Katutjakuṉu paawu tiṉatjarraya nyinanyi.’”
19Wangka palunya wangkarra mayutju Yiitjunya ilkarilakutu kaḻparra Katutjala tjungu nyinangu. Yalatji Katutjalu palunya ilkarilakutu katingu.
20Palulanguruya palumpa kutunguḻu tjuṯangku ngurra tjuṯawana Kurayitjakuṉu wangka tjakultjurinangi. Yalatjiya tjakultjurinanyingka, mayutju Yiitju Kurayitjalu tjanampa ngangkaritjarrangku kutjupa kutjupa palyarinangi yutitjawiyangku. Yiitjuku walytja tjuṯangku paawu puntutjarrangku palyantjala yaṉangu tjuṯangku nyakula kuliṉu, “Yilta, ngaa tjuṯangku nganaṉanya Katutjakuṉu wangka nintiṉi.”
