1Mni fruhu kna (Sabat) vagarege'za Makdalati Meriki, Maria Jemisi nereraki, Salomeki hu'za mananentake masave Jisasi avufare ome frentenaku miza se'naze.
2Ana knamofo ese zupa (Sonta) nantera zge nehnatige'za, Jisasi kerirega vu'naze.
3Nevu'za ontahige antahige hu'za, kerimofo kafantema rehiza hu'nea havea iza rekrehe hutregahie, hu'za hume vu'naze.
4Hianagi tusi'a haveagi, ko revahe hutrenege'za ome ke'naze.
5Anante have kerigampi ufre'za kazana, mago nehaza ne'mo efeke kukena huno tmaga'a kaziga mani'negeno ome nege'za zmagogogu hu'naze.
6Hianagi anage huno zmasami'ne tmagogogura osiho, Nazareti Jisasima keka zafarema ahe'naza ne'ku nehakaze. Hianagi Agra ko otine. Amafina omanine, avufa'ama ante'nazarera ami'nagi keho!
7Hianagi vutma amage'ma nentaza disaipol naga'ane, Pitanena ome zmasamiho, Agra vugota huno Galili vu'ne, koma tmasami'nea kante antetma anantega Jisasina ome kegahaze.
8Anagema hige'za zmagare'za keria atre'za atinerami'za, zmahirahi nerege'za zmagogogu hu'naze. Na'ankure zmagra koro nehu'za, mago vahere hu'za ozmasmi'naze.
9Hagi ana knamofo ese zupa (Sonta), nanterame Jisasi'a fri'nefinti otiteno, esera Makdala kumate a' Meri, 7ni'a havi avamu agu'afi maninegeno eri atrente'nea ate efore hu'ne.
10Jisasi'ene vano nehza vahe'mo'za zavi krafage nehazageno ana a'mo ome zmasmi'ne.
11Ana a'mo'a, Jisasi'a otino asimu erino maninege'na ke'noe hunoma hia kegura, antahi omi'naze.
12Ana'ma hutegeno tare ne'tremo'kea Jerusale atreke fegi'a nevakeno, Jisasi avufagamo'a ruzahe nehigeno znagrite efore hu'ne.
13Fore nehige'ne kete'ne rukrehe hu'ne e'ne, mago'a mani'namokizmi eme zmasamige'za, anankegura zamentinti osu'naze.
14Ana huteno 11ni'a amage'ma nentaza disaipol nagatera, ne'za nene'za maninageno, Jisasi'a zmagrite efore nehuno, frinefinti otine hu'za zmasaminaza kere antahi ozami'naza zankura, nahigeta tamentintia osu'naze huno ke zmasu'ne.
15Anage huteno, maka moparega vutma knare musenkea ome huama hutma, hakare vahera zmasamiho.
16Hagi iza'o Nagriku amentinti nehuno, mono ti fre snimofona Anumzamo'a agu'vazina knare huno manigahie. Hianagi iza'o amentinti osanimo'a, keagafi manino fanana hugahie.
17Hagi zamentinti hanamo'za amanahu avame'za erigahaze. Nagri nagirera havi avamura hunente'za, kasefa zamageru arugahaze.
18Ha' osifa'vea zmazanu aze'neri'za, avuataga zama nesnaza'zamo'a zmazeri haviza nosinke'za, kri vahete zmazama antesageno'a, krizamimo'a amane hinke'za, knare hu'za manigahaze.
19Anage huno zamasmitegeno, Anumzamo'a Jisasina avareno monafi marerino, azantmaga kaziga ome antegeno mani'ne.
20Ana huno vutege'za, amage'ma nentaza nagamo'za maka kaziga vano nehu'za, Ramofona kea huama nehazageno, Jisasi'a ana kezmia eri hanavetino avame'zane, kaguva'zanena anama hazankefina hu'ne.
