Marcos 16

1

2

3

4

5

6

7

8

9

10

11

12

13

14

15

16

¹Leettsa mriid wiz sabd, lee Mari Magdalen ne Mari xnaa Santiag ne Salomé, mzhii perfum kuu chul ndetsi, tsa ko zhay kwerp Jesús.

²Ne til wiz domin, ngwa re ngot roo baa ta ngoo Jesús, ne penta mlen wiz ora.

³Tsa nzhab ngot lo altaa ngot: ―¿Cho kib ke kuu now roo baa or tsinaa?

⁴Per or mzin yon ngot, tsa mwii ngot lee ke naro kuu now roo baa mbyiiba.

⁵Ne or mndaab re ngot leen baa, mwii re ngot lee thib nde ndob lad ban, nok thib lar kuu naguz ne nol kuu ndedoob asta dits nii nde, tsa kwathoz mzeb re ngot.

⁶Per lee nde nzhab: ―Tsebt goo. Goo ngekwaan Jesús zha Nazaret, zha kuu mkee zha lo kruz. ¡Mrobana zha! ¡Yent zha nzhee! Wii goo ta mloo zha zha.

⁷Tyee goo lo re zha kuu mteed lo Jesús ne lo Pey. Ne gab goo lo re zha: “Lee Jesús tener lo goo ya yezlyu Galilea, tya wii goo Jesús taxal ne Jesús lo goo”.

⁸Tsa lee re ngota mroo roo baa, ne mzhiit re ngot tak kwathoz mzeb re ngot. Ne yent cho lo nzhab re ngote, tak nzeb re ngot.

⁹Bluz or ngwalo mroban Jesús domin til, ner lo Mari Magdalen mloo Jesús, ngot kuu mloo Jesús gaz mbi fyer leettsoo.

¹⁰Ne lee ngota ngwalo diiz lo re zha kuu mteed lo Jesús, ne nzhonn re zha ne nabil nzo leettsoo re zha.

¹¹Or mbin re zha lee Jesús naban, ne lee ngota mwiiʼa Jesús, ngwalaazt re zhay.

¹²Ngwalo mriid kona, tsa ngwani Jesús tedib mod lo chop zha kuu ndo net nda wan.

¹³Tsa lee rop zha mretab; ne ngwalo zha diize lo re altaa zha, per neeka xkiiz rop zhaʼa ngwalaazt re zha.

¹⁴Mas bluz lee Jesús ngwani lo re tsiibthib zha kuu mteed lo Jesús. Or lee re zha ndob roo mes, tsa mkox re zha lo Jesús tak kwathoz nad leettsoo re zha, tak ngwalaazt re zha xkiiz re zha kuu mwii lee Jesús mroban.

¹⁵Tsa lee Jesús nzhab lo re zha: ―Gwataa goo kwent xkiiz Diox lo re men dib naxta lo yezlyu.

¹⁶Ne loka cho zha kuu yelaaz na ne gakleyy zha, tetsow zha gan yalnaban kuu thitanax; per lee zha kuu yelaazt na, Diox teriid zha yalti kuu thitanax gabil.

¹⁷Ne koree tsow re zha kuu nyelaaz na ne xkizʼn: Kon len koo zha mbi fyer; ne tediz zha tedib net diiz kub.

¹⁸Ne os lee zha ten zha mbeel kon yaa zha; ne os wu zha kwaan yent kwan tak zha, ne xoob zha yaa zha yek re mbyiz, ne lee re mbyiz gwe.

¹⁹Ne ngwalo mni Jesús lo re zha kuu mteed lo Jesús, tsa lee Jesús Zha Nabee loʼaa ngwazhoob yibaa, ne mndob Jesús lad ban lo Diox.

²⁰Ne lee re zha kuu mteed lo Jesús mroo, ne mndaa kwent Diiz Chul chaan Jesús reta ta, diiz kuu ndyaadno yalnaban kuu thitanax. Ne lee Zha Nabee ntsow ayud re zha, ne nloo Zha Nabee lee xkiiz Diox nak kuu wli, ne ntsow re zha re kuu thoz kuu gagt tsow re men, tsa ne re men lee re kuu ni re zha nak xkiiz Diox. ¡Tbaa nak diiz chul chaan Jesús!