1Ɓoaze liini taa ziɠidaʋɛ, é zei ná. Pɛtɛ, zɔi unmɔɔ fai ma losuʋɛ ɠɛni zea, nii Ɓoaze ná-fai woni, naa ʋaani, é ɗa leʋe. Ɓoaze ɠɛni ma: «Ʋaa lɛɛ ʋɛ, zei lɛɛ ʋɛ.» Naa ʋaani, é zei.
2Ɓoaze nu puugɔ zeɠeni taa ɠɛwolaiti saama, é ɠɛni ti ma: «À zei lɛɛ ʋɛ.» Ti zeini.
3Naa ʋolu é ɠɛni naama nui ma, nii unmɔɔ fai ma losuʋɛ ɠɛni zea: «È suɠwɛɛni ga Naomi ʋa, é zeɠe Moaɓe yooi zu. Toɠa pɔ é zou ɓuɠai ʋɔdi, nii é ga ade-ɠɛɛloin Elimeelɛke nɔnɔi.
4Gè ɠisiɛʋɛ ga gè naa wo è ma, ga è geya taa ʋeaiti gaazu, ta nà-nuɓusɛiti ta-ɠɛwolaiti gaazu. Ni ɗa pɔ è unmɔɔ, unmɔɔ. Ni è la unmɔɔsu, dɛɛ ga ze, gè ɠɛ kwɛɛ, mazɔlɔɔ ɗa ɠa mɔunpa ma losuʋɛ è ya. Nà ɠa é zèa ɗɔun è ʋoluma.» É gooɠaaʋoteni, é ɠɛ ma: «Nà pɔ gè zooi unmɔɔ.»
5Ɓoaze ɠɛni ma: «Foloi è zooi ɠeyazu la Naomi ma, ɗa Moaɓe nui Lute ɓalaagi zei naama ziɛgi zu, nii é ga poanzai, nii a kɛ vofoda ɠɛ sinigi ʋa, nii saai, niiti ta ná-poganii zeɠe.»
6Zɔi unmɔɔ fai ma losuʋɛ ɠɛni zea, naa gooɠaaʋote, é ɠɛ ma: «Ni naa ʋe, gè ɠɛlɛa unmɔɔ tosuʋɛ ʋa, gè mina ʋa nà-poganii ɠoloɠolosu. Unmɔɔ fai ma losuʋɛ zeɠe ga ɗɔnɔ, mazɔlɔɔ gè la zooga gè ʋa unmɔɔ.»
7Izelayɛle nuiti saama mɔungi, faa nɔpɛ a la ɠɛna ɠilia ba, é lo unmɔɔ faa ʋa, ɓaa anii maavalibo faa ʋa, gilagi ɓena ná-saʋalagi ɠula ɠɔɠɔi ɠa, é fe zɔi ya, naa ɓena ɠɛ ga poogi Izelayɛle nuiti bɛ ga naama vai ɓɛtɛa.
8Zɔi unmɔɔ fai ma losuʋɛ ɠɛni zea, naa ɠɛni Ɓoaze ma: «Zooi ɠeya ɓɔɠɔ ʋɛ,» é ná-saʋalagi ɠulani ɠɔɠɔa.
9Ɓoaze ɠɛni naazu kɛwolaiti ta nuɓusɛiti kpein ma: «Wo ɠɛa ga zeeleiti za, ga nii kpein é ɠɛa ga Elimeelɛke nɔnɔ ta Kiliyon, naa ʋɛɛ Maalon ʋa, gè naati pɛ geyaa Naomi ma.
10Gè Moaɓe nui Lute zeiɗa ɓalaa, é ɠɛ ga ànza, nii é ɠɛni ga Maalon anzai, ga nii saai naa laaseigi mina ɲɛɛlɛ ná-poganii zaama, naa ɠa a kɛ nii saai naa laaseigi yɛ ɠɔ kɛɛɠɛleaiti saama, sɔlɔɔ taa ziɠidaʋɛ. Wo ɠɛa ga ma zeeleiti za.»
11Nuɓusɛi niiti kpein ti ɠɛni taa ziɠidaʋɛ ta kɛwolaiti, ti ɠɛni ma: «Gá ga naama zeeleiti! Anzanui é lɛɛzu ɗa-ʋɛlɛi wu, Ɠɔoɠɔ GALAGI kɛ ga Zakɔɓe anzaiti Lasɛle ta Leani kɛʋele, niiti ti felegɔiti ti Izelayɛle ʋɛlɛyeɠei logai! Ɗa ɓɔɠɔi ɓalaa, tuyai ɠɛ è ma Efelata, ta è lɔɠɔ zɔlɔɔ Ɓɛteleyɛme!
12Vofodai nii Ɠɔoɠɔ GALAGI feezu è ya ga anzanu loungoi nii maaʋele, é ɗa-ʋɛlɛyeɠei ɠɛ ga Peelɛse ná-pɛlɛyeɠei ɠɛʋele, nii Tamaal sɔlɔɔni Zuda ʋɛ!»
13Ɓoaze Lute zeɠeni, é kɛ ga anza, é daani ʋolu. Ɠɔoɠɔ GALAGI vaani bu Lute kogi zeɠe, é doun zunu zɔlɔɔ.
14Anzanuiti ti ɠɛni Naomi ma: «Mamagi ɠa Ɠɔoɠɔ GALAGI ʋɛ, nii é la vaani bu, è ʋa ʋala za pɛlɛyeɠei makɛ nui ma, GALA ge kɛ daaseigi wɔɔlɔ Izelayɛle nuiti saama faan!
15Doin nii ɠa è-yɛnvui niinɛ, é è makɛ ɗa ʋɔlɔzaɠana, mazɔlɔɔ è-loun anzai nii è nɛai bɛ, ta fizɔgai è ʋɛ zunu loun lɔfela ʋa, naa ɠa é sɔlɔɔgai.»
16Naomi doin zeɠeni, é pɛɛ yii la. Tɔ ɠa é kulani su.
17Anzanuiti ti ɠɛni ga seiɲɔɠɔiti, naati ti ɠɛ ma: «Doun zunu zɔlɔɔga Naomi ʋɛ!» Ti daasei pɛɛni ga Wɔɓɛde. Toɠa é ɠɛni ga Izayi kɛɛɠɛ, é ɠɛ ga Davide kɛɛɠɛwola.
18Peelɛse mavofodaiti ta ga: Peelɛse Ɠɛselon zɔlɔɔni,
19Ɠɛselon Lame zɔlɔɔ, Lame Aminadaɓe zɔlɔɔ,
20Aminadaɓe Naason zɔlɔɔ, Naason Salema zɔlɔɔ,
21Salema Ɓoaze zɔlɔɔ, Ɓoaze Wɔɓɛde zɔlɔɔ,
22Wɔɓɛde Izayi zɔlɔɔ, ta Izayi Davide zɔlɔɔ.
