1Naomi zinigi ná-nui ta ɠɛni ná. É ɠɛni ga zobobɛ nu kpɛtɛai, Elimeelɛke ná-pɛlɛyeɠei wu, daaseigi ɠɛni ga Ɓoaze.
2Moaɓe nui Lute ɠɛni Naomi ma: «Nà è maanɛɛnɛzu ga è va bu, gè li molo ɠɔpɔ gaiziɛzuʋɛ kpalagaʋɛ, naama nui wosuʋɛ, nii a màawɔinɠa.» É ɠɛni ma: «Li, dòun anzanu.»
3É liini molo ɠɔpɔ gaiziɛzuʋɛ kpalagi ta zu, molo leʋe nuiti pogi zu. É zolooni nɔ kpein ga kpalagi naa ɠɛni ga Ɓoaze nɔnɔi, nii é ɠɛni ga Elimeelɛke ná-pɛlɛyeɠei wu nui.
4Ná tago kɛai ma, Ɓoaze ʋaani, é zeɠe Ɓɛteleyɛme, é ɠɛ molo leʋe nuiti ma: «Ɠɔoɠɔ GALAGI ɠɛ wo ʋa!» Ti gooɠaaʋoteni, ti ɠɛ ma: «Ɠɔoɠɔ GALAGI tuya loo è ʋɛ!»
5Ɓoaze ɠɛni ná-botiɠɛ zunui ma, nii é ɠɛni wɛlɛzu molo leʋe nuiti ma: «Anzanu loungoi nii ɠa ga ɓɛ ná-doun?»
6Botiɠɛ zunui é ɠɛni wɛlɛzu molo leʋe nuiti ma, naa gooɠaaʋoteni, é ɠɛ ma: «Moaɓe anzanu loungoi ta ʋe, nii ti ʋaai ta Naomi, ti zeɠe Moaɓe yooi zu.
7É bogɛ mà ga gè va bu, é ɗa molo ɠɔpɔgiti gaiziɛ, molo ɠiliiti zɔɠɔzu, molo leʋe nuiti polu ʋelei, é ɗa ti ɠaalɛ ba. Paa yee ma za sobui, toɠa loni nɔ eyɛsu niizu, é lago looɠogɛ nɔ kotai wu.»
8Ɓoaze ɠɛni Lute ma: «Woilo, dòun anzanu, mina li molo ɠɔpɔ gaiziɛzu kpala kili su, mina maaɠooza ʋɛ ʋa, yɛ nà-botiɠɛ anzanuiti ba.
9Wɛlɛ ʋɛ moloi leʋezu ná kpalagi zu, è li ti ʋolu. Gè nà-botiɠɛ zunuiti tɛnɛgɛ ga ti mina vɔɔɠu è ʋa. Siɛgi zu kpɔɔle wɔin è zosu da, ɗa li ziɛ liɠiiti pɔ bɛ, è ɓɔɔle ga nii botiɠɛ zunuiti ta saɠa.»
10É ʋilɛni ɲiibiɠa zooi ma, é nɔkɔ, é ɠɛ ma: «Gè zaalai zɔlɔɔgɛ ɠale è ɠaazu, ga è ɠɛɛzu mà bɛbɛ, nɛ̀i gè ga wɛɛn anzanui?»
11Ɓoaze gooɠaaʋoteni, é ɠɛ ma: «Ti naa kpein bogɛ mà, nii è kɛa è-leemɔɔn ʋɛ, è-zinigi zaa ʋoluma, ʋelei è zeɠeai la è-ɠɛɛ ta è-leeni ba, ta zooi è zɔlɔɔgai su, ga è ʋa nuɓusɛiti pɔ, niiti è la ɠɛa ti ɠwɛɛ pɔlɔmazu.
12Ɠɔoɠɔ GALAGI naa ɠɛ è ʋɛ, nii è kɛa. Ɠɔoɠɔ GALAGI, Izelayɛle ná-GALAGI, nii è ʋaa, è lɔɔɠu koʋegi wu, naa è ɠɔnɔkula ga gola.»
13Lute ɠɛni ma: «Ee, Màliɠii, gè zaalai zɔlɔɔga è ɠaazu! Mazɔlɔɔ è gàanɛɛnɛa, ta è ɓɔɛa pɔ̀, è zìila, nɛ̀i, gè ga ɗa-wotiɠɛ anzanui. Anɛɛ naa ʋe, nɔ̀un, gè la ga ɗa-wotiɠɛ anzanuiti gila kpalaa kɛʋele.»
14Daamii ziɛgi zu, Ɓoaze ɠɛni ma: «Maaɓuɠa, è daamii wo, ɗa-ɓulu ɓuɠai lɔ guulu daɓai wu.» É zeini molo leʋe nuiti kobaʋɛ. Ɓoaze ani ɠae ɠeegai veeni zea. É miini, é yiɠo, é mɔtai makɛ.
15Naa ʋolu é wuzeɠeni posuyɛʋɛi ma. Ɓoaze niima levei veeni ná-botiɠɛ zunuiti zea, é ɠɛ ti ma: «À yeezei bu ga é posuyɛʋɛi ɠɛ ɓalaa molo ɠiliiti zɔɠɔzu. À mina kpɔlɔ.
16Anɛɛ wa ma ɠɔpɔgi tanigaa ɠula ma ɠiliiti ba, ga wo zɛ ná, é zɛʋɛ, wo mina zelilo ma.»
17É posuyɛʋɛi ɠɛɛni kpalagaʋɛ eyɛsu kpɔkɔi. É naa loɠani, nii é zɛʋɛni. É kilo ʋuusaʋagɔ (30) ɓɔlɔ ɠila daaveni ga molo ɠaamagi nii daa ga wɔɔlezegi.
18Nii é zɛʋɛni, é naa zeɠeni, é lii la taa zu, é dɛɛni ga deemɔɔn. É ná-daamianigi mɔtai ɓalaa ɠulani, é ti ve zea.
19Deemɔɔn ɠɛni ma: «Mini ɠa è posuyɛʋɛi ɠɛai ná za? Mini ɠa è botii ɠɛai ná za? Tuya ɠa naa ʋɛ, zɔi é è zɛsɛbogai!» É naa kpein suɠulani deemɔɔn ma, nii kpein é ziɛni su. Naa ʋolu, é ɠɛni ma: «Zunui nii gè botii ɠɛai pɔ bɛ, daa ɠa ga Ɓoaze.»
20Naomi ɠɛni ná-doun anzai ma: «Ɠɔoɠɔ GALAGI tuya loo naama nui ʋɛ, tɛigi é maawɔinɠai ɠɛɛzu naati bɛ, ti vulua, ta naati bɛ, niiti ti zaai!» Naomi ɠɛni ma mɔnɔ: «Zunui naa ɠa ga da-nu ɠiteɠite, toɠa ga naati ti ta, niiti ti-losuʋɛ ga ti de unmɔɔ.»
21Moaɓe nui Lute ta laani ma, é ɠɛ ma: «Kɛɛʋɛ mà ɓalaa: ‹Yɛ nà-botiɠɛ nuiti ba, eyɛsu ti ɓe ga nà-moloi leʋe.› »
22Naomi ɠɛni ná-doun anzai Lute ma: «Naa ʋagɛ, dòun anzanu, ga è ɠɛ ná-botiɠɛ anzanuiti ba, naa ɠa a kɛ nu mina è ɓɔlɔ kpalagi taɠili su.»
23Naazu, é yɛni Ɓoaze ná-botiɠɛ anzanuiti ba, é ɗa posuyɛʋɛi ɠɛ, eyɛsu moloi nii daa ga wɔɔlezegi ta moloi nii daa ga ɓeleegi, naati ti leʋe vaiti kpein ti ɓe. Naa pɛ su é ɠɛɛni deemɔɔn ʋɔ bɛ.
