1मिनु बोआज सहर ङा गारो ङा ठेयब लाप्चोम लशा, मेकेर निश्शा बाक्माक्त। मिनु याम का नोले रूथ आ नेक्था ङा मुर जाक्शो तशा, बोआजमी आ नें थिशा “एके पिशा, निस्सो” दे ब्रेत्ता बाक्त। मिनु मेको निस्से बाक्त।
2मिनु बोआजमी १० जना सहर ङा खाल्पा आन कली यो तेक्शा “निस्सीने” देंमाक्त। मिनु मेकोपुकी निस्समा बाक्त।
3मिनु बोआजमी रूथ आ नेक्था ङा मुर कली “मोआब रागी रे जाक्शो नाओमीमी इं लोक्ब एलीमेलेक आ रू लेयचा चिक्शो बाक्ब।
4गो इ कली मो देंङ, देंशो नङ। एको सहर ङा मुरपुकी नु खाल्पा आन ङोंइती गे ग्याप्चा दाक्नेवे हना, ग्यापो। ग्याप्चा मदाक्नेवे हना, आं कली तुइक्पाइय्यी। मारदे हना इ नेक्था ङा मुर गो नङ” देंमाक्त। मिनु मेको मुरुमी “गो ग्याप्नुङ” देंमाक्त। लेवी २५:२५; येरमीया ३२
5मिनु बोआजमी “नाओमी रे मेको रू ग्यबी नाक्ती, गे बेक्शो मुर आ मीश मोआबी रूथ यो ताइनेवे। मेको बेक्शो मुर आ नें आ थेरशो रू नु लील, दे मो दुम्चा माल्ब” देंमाक्त। ब्यवस्था २५:५-६
6मिनु रूथ आ नेक्था ङा मुरुमी “गो ग्याप्ता हना, आं आंम थेरशो रू मरिम्शो दुम्ब। आं पचा माल्शो गेय गेन पावो। गो ग्याप्ने मचाप्नुङ” देंमाक्त।
7इस्राएल रागीमी ङोंइती रू ग्याप्मेनु, लेयङमेनु, रू ङा होव़प फांइसीमानु, रू लेयबमी ग्याप्ब कली आ जुत्ता प्रुइश्शा गेचा माल्बाक्माक्त। इस्राएलमी लोव़ फाइक्चा मततीके आ पर्बम मोदेंशो पचा माल्बाक्माक्त। ब्यवस्था २५:७-१०
8मिनु रूथ आ नेक्था ङा मुरुमी बोआज कली “गे ग्याम्सो” दे आ जुत्ता प्रुइश्शा गेवा बाक्त।
9मिनु बोआजमी खाल्पापुकी नु मेकेर बाक्ब मुर आन कली “गो एलीमेलेक, माहलोन नु किल्योन आन थेरशो रू नेल्ले नाओमी रे ग्याप्ता। गे मुलाक्ती सांकछी दुम्तीनी।
10माहलोन आ मीश, मोआबी रूथ यो बेक्शो मुर आ नें, आ थेरशो रू नु लील, दे चाक्ता। मोपा आ लोक्ब आन दातेमी नु आ जरमेशो बाक्तीकेम आ नें लील, दे मो पाता। गेपुकी मुलाक्ती सांकछी दुम्तीनी” देंमाक्त।
11मिनु ठेयब लाप्चोम बाक्ब नु खाल्पा नेल्लेमी “गो सांकछी दुम्तक। परमप्रभु यावेम एको इ खिंम जाक्शो मीश मुर कली राहेल नु लेआ खोदेंशो सेलल। मेको निक्शीमी इस्राएल आ खिं सेल्शो बाक्ताक्से। बेथलेहेम एफ्राथाहम इ नें ठेयब दुम्ल।
12तामारम यहूदा रे थिशो पेरेस आ खिं खोदेंशो पा, परमप्रभु यावेमी एको ठिटी मीश मुर रे थिशो आलम इ खिं सेलल” देंमा बाक्त। उत्पत्ती ३८:२९
13मिनु बोआजमी रूथ चाक्शा, मेको नु बाक्माक्त। मिनु परमप्रभु यावे आ आसीकमी रूथ कोव़ज कुरशा, तौ का थिमाक्त।
14मिनु मीश मुरपुकीमी नाओमी कली “परमप्रभु यावे ठेयब बाक्ब। मेकोमी इ कली मुल इ खाल ङा मुर नु वोइक्ते। परमप्रभुम इ कली चच का गेते। एको आ नें इस्राएलम ठेयब दुम्ल।
15एकोमी इ कली मुल नक ब्रोंइतीक गेशा, खाल्पी दुमेनु, इ कली थुल्ब। मारदे हना ७ जना तौ आन क्येङा इ कली दाक्ब चाइमीमी रिम्शो पशो बाक्ब” देंमा बाक्त।
16मिनु नाओमीमी मेको आल ताक्शा, आ थुकुम वोइश्शा, मेको कली कोव़ब दुम्माक्त।
17मिनु आ नेक्था ङा मीश मुरपुकीमी “नाओमी के चच का दुम्त। गो मेको आ नें ओबेद वोइय्य” देंमुमा बाक्त। मेकोन येस्से आ आफ, दाऊद आ बाजे बाक्माक्त। मत्ती १:५-६; लूका २:३२
18पेरेसम हेस्रोन थिमाक्त।
19हेस्रोनम राम थिमाक्त। राममी अम्मीनादाब थिमाक्त। १इतिहास २:९-१५
20अम्मीनादाबमी नहशोन थिमाक्त। नहशोनमी साल्मोन थिमाक्त। गन्ती १:७
21साल्मोनमी बोआज थिमाक्त। बोआजमी ओबेद थिमाक्त।
22ओबेदमी येस्से थिमाक्त। येस्सेमी दाऊद थिमाक्त। १सामुएल १६:१, ११-१३
